Isaías 50 - DIOSPA QHELQACHISQ

Tata Dios paypi atinikojkunata yanapan

¹ Tata Dios nin: Ama yuyaychejchu mamaykichej Israelta wijch'usqayta, imaynatachus uj runa warminta wijch'upun, jinataqa. Chayrí, yuyankichejchu mayqen manuyman wata runata jina vendeykususqayta? Mana jinachu, qankunaqa millay juchaykichejrayku vendechikunkichej. Diospa contranta oqharikusqaykichejrayku mamaykichej Israel wijch'usqa karqa.

² Imaraykutaj jamuspa, mana pitapis tariparqanichuri? Imaraykutaj wajyashajtiypis, mana pipis kutichiwarqachuri? Ima kajtinpis, manachu atiyman kacharichiytari? Manañachu atiyneyqa kasqa paykunata kacharichinaypaj? Ujta nispalla, mama qochata ch'akichini, mayukunatapis ch'aki pampaman tukuchini. Chaypi kaj challwakunapis yakumanta jina wañuraspa, asnanku.

³ Noqaqa janajta laqhayaywan p'achallichini, llakiy p'achawan jinataj qhataykuni, nispa.

⁴ Tukuyta Kamachej Tata Dios yachay parlayta simiyman churarqa, sayk'usqa runakunata parlaspa kallpachanaypaj. Sapa paqarin pay rijch'arichiwan, yachachisqanta sumajta uyarinaypaj.

⁵ Tukuyta Kamachej Tata Dios yuyayta qowarqa, noqataj mana k'ullukorqanichu, nitaj qhepamanpis kutirerqanichu.

⁶ Seq'owajkunaman wasayta jaywarqani, sunkhaytapis t'iranawankupaj jaywarqani. May jinata alqochakuwajtinku, thoqaykushawajtinkupis, mana uyayta pakarqanichu.

⁷ Tukuyta Kamachej Tata Dios yanapawasqanrayku, mana k'umuykachachisqachu kasaj. Chhanka jina sumajta sayasaj, yachanitaj mana p'enqachisqachu kanayta.

⁸ Kutikuwajneyqa qayllaypi kashan. Pitaj imamanta ch'ataykuwanqari? Jaku ari, juezpa ñawpaqenman rinachej. Pitaj noqata ch'ataykuwajri? Qayllaykamuwaspa, uyanta rikuchikuchun.

⁹ Tukuyta Kamachej Tata Diosmin yanapawan. Pitaj juchachawanqari? Tukuy awqaykuna phirisqa kanqanku, imaynatachus thutaj k'utusqan p'acha t'akakapun, ajinata.

¹⁰ Qankunamanta mayqenpis Tata Diosta manchachikoj kanmanchu? Diospa kamachinpa parlasqanta kasukoj kanmanchu? Laqhayaypi purejkuna, ni ima k'anchayta rikojkuna, Tata Diospi atinikuychej, paymantataj jap'ikuychej.

¹¹ Qankuna, munasqaykichejman jina kawsajkuna, sumajta qhawakuychej imatachus ruwasqaykichejta, imaraykuchus chay ruwasqaykichejpi tojllapi jina urmankichej. Tata Diosqa jasut'iyta apachimusonqachej, ñak'ariypitaj choqarayankichej, nispa.