Isaías 5 - DIOSPA QHELQACHISQ

Uva huertamanta takiy

¹ Chantá Isaías nerqa: Kunanqa munasqaypa sutinpi uva huertamanta takiysituta takirisaj. Munasqaypata uva huertan uj kinraypi sumaj jallp'api tiyapusqa.

² Paymin jallp'ata llank'asqa, rumintapis pallasqa, chaymantaj sumajnin kaj uvata mallkisqa. Chay uva huertaj chawpinpitaj qhawanapaj torreta ruwasqa, chantá uvata sarunapaj t'oqotapis ruwallasqataj. Munasqayqa uvankuna sumajta poqonanta suyasqa. Chaywanpis k'allku uvallata poqosqa.

³ Tata Dios nin: Kunanqa Jerusalén llajtamanta, Judá suyumantawan kajkuna, niychej ari: Pitaj juchayoj kanmanri? Uva huertachu, chayrí noqachu?

⁴ Imatawantaj uva huertayta ruwayman karqari? Manachu tukuy ima ruwanayta junt'arqani? Noqataj misk'i uva poqonanta suyarqani. Imajtintaj k'allku uvallata poqonri?

⁵ Kunanqa uva huertaywan imatachus ruwanayta nisqaykichej: Perqanta thuñisaj, jinamantataj huertay chinkanqa. Tukuy sarunankupajtaj perqanta urmarachisaj.

⁶ Ch'in t'ajra pampata ruwasaj. Manaña pipis uva sach'ata llimphuchanqachu, nitaj qhoranqachu. Manachayqa imaymana khishka qhorakuna junt'aykonqa. Phuyutapis nillasajtaj amaña chaynejman paramunanta, nispa.

⁷ Tukuy Atiyniyoj Tata Diospa uva huertanqa Israelmin. Judá suyupi runakunataj may munasqa uva sach'anmin kanku. Tata Diosqa israelitakuna justiciata ruwanankuta suyarqa. Aswanpis runa wañuchinakuyllata tarin. Payqa tukuy imapis cheqan kananta suyarqa. Aswanpis nanaywan qhapariyllata uyarin.

Millay runakunaj ñak'ariyninku

⁸ Imallachus kanqa qankunapaj, ashkha wasita, jatun jallp'ata jap'ikapojkuna. Wajkunapajtaj ni imata saqenkichejchu, qankunallapis kay jallp'a patapi kawajchej jina.

⁹ Tukuy Atiyniyoj Tata Dios tiluspa nin: Ashkha wasi thuñisqa kanqanku, jatuchaj k'achitu wasikuna kajtinpis, manaña pipis chaypi tiyakonqachu.

¹⁰ Chunka yunta puriy jallp'api uva mallkisqamanta vino uj wich'illa llojsenqa. Chunka arroba trigo mujumanta uj arroballa oqharikonqa.

¹¹ Imallachus kanqa qankunapaj tutamanta jatariytawan machakojkuna, ch'isiyanankama machasqa, vino ujyaspalla kajkunamanta.

¹² Qankunaqa jatuchaj mikhuykunata wakirichinkichej, chaypitaj tocarichinkichej arpakunata, salteriokunata, panderetakunata, qenakunatawan. Chantá ashkha vinota ujyarillankichejtaj. Chaywanpis mana Tata Diospi unanchankichejchu, nitaj makinwan ruwasqantapis cuentaman churankichejchu.

¹³ Chayrayku aylloyqa mana noqata rejsiwasqanrayku, waj suyuman apachisqa kanqanku. Tukuy runataj kurajninkukunawan ima, mikhunamanta yarqhaywan, yakumanta ch'akiywan ima wañonqanku.

¹⁴ Chayrayku ukhu pachapis yarqhasqa jina siminta jatunta kicharin, chaymantaj chinkaykonqanku qhapaj runakuna, mana kasuta ruwana runakunapis, jinallataj paykunawan raymipi kusikojkunapis.

¹⁵ Tukuy runakuna k'umuykachachisqa kanqanku. Mayta runaykachajkunapis chay jinallamantaj chayanqanku.

¹⁶ Tukuy Atiyniyoj Tata Diosrí justiciata ruwaspa, jatunchasqa kanqa. May Llimphu kaj Diosqa may llimphu kasqanta rikuchenqa cheqan kajta ruwaspa.

¹⁷ Chantá chay p'unchaypi corderokuna sumaj pastota tarenqanku, qhapajkunaj raqay wasillankupitaj runakuna cabrakunata michenqanku.

¹⁸ Imallachus kanqa qankunawan llullakuspa mana allin ruwayta aysamojkuna, carretata jina millay ruwayta aysajkuna.

¹⁹ Qankuna ninkichej: Diosqa imatachus ruwananta usqhayta ruwachun, noqanchej rikunanchejpaj. Israelpa May Llimphu kaj Diosnenqa ruwananta usqhayllata junt'achun, imaraykuchus noqanchej imachus kananta yachayta munanchej, nispa.

²⁰ Imallachus kanqa qankunawan mana allin kajta allin kasqanta nejkuna, allin kajtataj mana allin kasqanta nejkuna. K'anchaytaqa qankuna laqha ninkichej, laqhatataj k'anchay ninkichej. K'allku kajta misk'i ninkichej, misk'i kajtataj k'allku ninkichej.

²¹ Imallachus kanqa qankunawan yachaysapaman tukojkuna, may yuyayniyoj kasqaykichejta yuyakojkuna.

²² Imallachus kanqa qankunawan vinota ujyanapaj wapu kajkuna. Qankunataqa ni pipis machana ujyanata wakichiypi atipasunkichejchu.

²³ Qankunaqa juchayoj runawan lluk'ichikusqaykichejrayku, juchayoj runata mana juchayoj kasqanta ninkichej, mana juchayojtatajrí juchachankichej.

²⁴ Chayrayku imaynatachus nina ichhuta q'olaykun, lawraynintaj ch'aki laqheta ujllata rupharparin, ajinallatataj qankunapis chinkachisqa kankichej. Qankunaqa saphinmanta ismoj yura jina kankichej, t'ikantaj ñut'u jallp'aman tukupun, ajina, imaraykuchus Tukuy Atiyniyoj Tata Diospa kamachisqanta qhesacharqankichej, Israelpa May Llimphu Kaj Diosninpa nisqantataj pisipaj qhawarqankichej.

²⁵ Chayrayku Tata Diospa phiñakuynenqa ayllunpa contranta k'ajarin, makintataj jasut'inanpaj oqharin. Orqokunapis kharkatitinku, wañusqakunapis callepi q'opa jina wijch'urayashanku. Chay tukuywanpis Tata Diospa k'araj phiñakuynin manaraj thasnukunchu. Payqa jasut'inanpaj makin oqharisqallapuni kashan.

²⁶ Tata Dios wiphalata oqharenqa, uj karu suyumanta soldadokuna jamunankupaj. Silbarispataj, wajyanqa kay pachaj aswan karu k'uchunpi kajkunata. Paykunataj imata jina usqhayllata chayamonqanku.

²⁷ Chay karu suyumanta soldadokuna mana pisi kallpayojchu nitaj sayk'usqachu kanku. Paykunaqa purisqankumanta mana sayarenqankuchu samarinankupaj nitaj puñunankupaj. Tukuyninku sumaj chumpisqa kanqanku, juk'utankupis sumaj watasqa kanqa.

²⁸ Flechankoqa sumaj filochasqa kanqa, arconkutaj sumaj mat'isqa. Caballonkoj chaki sillunkunapis rumi jina kanku, carretankoj ruedankutaj muyoj wayraman rijch'akun.

²⁹ Paykunaqa león jina qhaparinku, imaynatachus malta león aychaman ch'ipaykukuspa qhaparin, ajinata. Chay aychata apashajtinpis, ni pi qhechuyta atinchu.

³⁰ Chay p'unchay chayamojtin, chay suyumanta kaj soldadokunaqa mama qocha jina Israelpa contranpi qhaparenqanku. Pillapis suyuntinta qhawarejqa llakiywan laqhayaykushajta rikonqa. Janajpi k'anchajkunatapis yana phuyu laqhayaykuchenqa.