Isaías 49 - DIOSPA QHELQACHISQ

Tata Diospa Kamachin

¹ Mama qocha kantupi kaj llajtakuna, karupi kaj jatun suyukuna ima, uyariwaychej: Manaraj paqarishajtiy, Tata Dios wajyawarqa. Mamaypa wijsanpi kashajtillayraj, pay ajllakuwarqa.

² Payqa simiyta filo espadata jina ruwarqa, maki llanthunwantaj pakaykuwarqa. Filo puntayoj flechaman jina tukuchiwarqa, jinaspataj, flecha waqaychananpi waqaychawarqa.

³ Chantá niwarqa: Israel, qanmin kamachiy kanki. Qannejta jatun kayniyta rikuchisaj, nispa.

⁴ Noqatajrí nerqani: Ruwasqayqa qhasi manakajlla, kallpaytapis qhasi manakajllata usucherqani, nispa. Chaywanpis imachus ruwasqayqa Tata Diospa makillanpi kashan, payllataj ruwasqaymanta t'inkata qowanqa.

⁵ Tata Diosqa mamaypa wijsanmantapacha kamachin kanaypaj ajllakuwarqa, Jacobpa ayllunta payman kutirichinaypaj, paywan ujlla kanankupajtaj. Tata Diosllataj allinpaj qhawasqata ruwawan, jinallataj kallpachawan.

⁶ Pay niwan: Qanqa kamachiy kanki, mana Jacobpa ayllullantachu watej sayarichinaykipaj, nitaj Israelmanta puchojkunallatachu kutirichimunaykipaj. Aswanpis waj suyukunapaj k'anchay jina kanaykipaj churayki, noqa qhespichej kasqayta tukuy kay pachaj k'uchunkama willamunaykipaj, nispa.

⁷ Israelpa May Llimphu Kaj Diosnin, qhespichej Tata Dios kay jinata nin pisipaj qhawasqa kajman, waj llajtakunaj chejnikusqankuman, ñak'arichejkunaj wata runanman ima: Kuraj kamachejkuna, kurajkuna ima qanta rikususpa, sayarikonqanku. Qanman k'umuykukonqanku, Israelpa May Llimphu Kaj Diosnin Tata Diosrayku, pichus nisqanta junt'anpuni, pitajchus ajllakusorqa, payrayku, nispa.

Tata Dios Jerusalenta watej sayarichenqa

⁸ Tata Dios nillantaj: Khuyakunay p'unchay chayamojtin, uyarerqayki, qhespichina p'unchaypitaj yanaparqayki. Noqa waqaychasqayki, qannejtataj uj tratota tukuy runawan ruwasaj. Chay suyuta watej mosojyachisaj, saqerpayasqa jallp'akunatataj watej rak'irasaj.

⁹ Jinapi presochasqa kajkunaman ninki: Qankunaqa kacharisqaña kankichej, nispa. Laqhapi kajkunatapis ninki: Llojsimuychej, rikuchikuychejtaj, nispa. Chantá paykuna oveja jina ñan kantupi mikhunata tarenqanku, jinallataj may orqokunapipis mikhuna kallanqapuni.

¹⁰ Mana yarqhachikonqankuchu nitaj ch'akichikonqankuchu. Manataj ruphaypis paykunata sonqorparenqachu, nitaj intipis ruphanqachu, imaraykuchus paykunamanta khuyakojqa yaku juturiman paykunata pusanqa.

¹¹ Noqaqa orqoyta jatun ñankunaman tukuchisaj, chaki ñankunataj sumaj pichasqa kanqanku.

¹² Aylluymanta kajkunaqa karumanta kutimonqanku. Wakenqa wichaynejmanta, wakintaj inti yaykuynejmanta jamonqanku, wakintaj Egipto suyupi Sinim llajtamanta.

¹³ Janaj, kusiywan takiy ari, kay pachapis, mayta kusikuy. Qankunapis orqokuna, kusiywan qhapariychej, imaraykuchus Tata Dios ayllunta sonqochan, ñak'arichisqa kajkunamantataj khuyakun.

¹⁴ Jinapis Sión llajta nin: Tata Diosqa saqerpariwan, qonqarpariwantaj, nispa.

¹⁵ Tata Diosrí kutichin: Uj warmi ñuñushaj wawitanta qonqarparinmanchu? Wijsanmanta llojsej wawanta manachu munakunman? Pay wawanta qonqapunman chaypis, noqaqa ni jayk'aj qanta qonqasqaykichu.

¹⁶ Noqaqa sutiykita makiyman qhelqani ama qonqasunaypaj. Muyuyniykipi kaj perqaykitapis qhawashanipuni.

¹⁷ Llajtaykita watej sayachejkuna usqhayllata chayamonqanku, tukuy imaykita chinkachejkunataj riponqanku.

¹⁸ Umaykita oqharispa, muyuyniykita qhawariy. Chay wawaykikunaqa tukuynejmanta tantaykukuspa, jamonqanku, nispa. Tata Dios nillantaj: Noqa kawsayniyrayku tiluni: Wawaykikunawan novia p'achawan jina sumajta p'achallikunki, chaykunawantaj sumaj k'achanchasqa kanki.

¹⁹ Llajtaykeqa thuñisqa, phirisqa karqa, ch'inpachataj. Kunantajrí ashkha kasqaykichejrayku jallp'a aylluykipaj k'ullku kanqa. Ñak'arichisojkunataj karupi kanqanku.

²⁰ Pikunachus waj suyupi jatun llakiypi kashajtiyki paqarikorqanku, chay wawaykikuna nisonqanku: Kay cheqaqa ancha k'ullku noqaykupajqa. Aswan jatunta wakirichipuwayku tiyakunaykupaj, nispa.

²¹ Qantaj sonqoykipi ninki: Pitaj kay chhika wawakunata qowarqari? Noqajtaqa manapuni churiykuna karqachu, nitaj wawayoj kayta aterqanichu. Noqa karuman apachisqa, wijch'usqataj karqani. Pitaj kaykunata uywanman karqari? Noqataqa sapayta saqerpariwarqanku. Kaykunarí maypitaj karqankuri? nispa.

²² Ajinata Tukuyta Kamachej Tata Dios nin: Noqa makiyta oqharispa, tukuy suyuman ujta kamachisaj. Wiphalata oqharispa, paykunapaj uj señalta wakichisaj. Chantá churiykikunata marq'ayninkupi apampusonqanku, ususiykikunatapis q'epinkupi apamonqanku.

²³ Kuraj kamachejkuna uywaqeykikuna kanqanku, qoyakunapis ñuñuchisojkuna kanqanku. Paykunaqa pampakama ñawpaqeykipi k'umuykukonqanku. Chakiykipi jallp'a kajtapis qallunkuwan llajwanqanku. Ajinapi qan yachanki noqa Tata Dios kasqayta. Pikunachus noqapi atinikojkunaqa mana jayk'ajpis p'enqachisqachu kanqanku.

²⁴ Pitaj soldadokunamanta imatachus maqanakupi qhechusqanta qhechuyta atinmanri? Uj runa presochasqa kasqanmanta ayqekuyta atinmanchu?

²⁵ Tata Diostajrí ninpuni: Presochasqa runaqa kallpayoj soldadoj makinmanta qhechusqa kanqa, presochasqa runapis millay runaj makinmanta kacharichisqallataj kanqa. Qanwan churanakojkunawan noqa churanakusaj, noqa kikiytaj wawaykikunata kacharichisaj.

²⁶ Chay ñak'arichisojkunaman kikin aychallankutataj mikhuchisaj, yawarnillankuwantaj vinowan jina paykunata machachisaj. Ajinamanta tukuy runakuna yachanqanku noqa Tata Dios pagota qospa kacharichisoj kasqayta. Noqaqa Jacobta kamachej kani, may atiyniyojtaj, nispa.