Isaías 48 - DIOSPA QHELQACHISQ

Tata Dios israelitakunata k'amin

¹ Jacobpa ayllun, kayta uyariychej, qankunaqa Israel sutiwan sutichasqa kankichej. Qankuna Judajpa miraynin kankichej, Tata Diospa sutinpitaj tilunkichej. Jinallataj Israelpa Diosninmanta mañakunkichej. Chaywanpis, mana cheqanta ruwankichejchu, nitaj cheqan sonqowanchu mañakunkichej.

² Qankuna ninkichej: Diospa llajtanmanta kayku, nispa, chantá nillankichejtaj Israelpa Diosninpi atinikusqaykichejta. Chay Diospa sutenqa Tukuy Atiyniyoj Tata Diosmin.

³ Imachus qhatirisunanta ñawpajmantaña willarqaykichej. Jinaqa mana yuyasqallamanta ruwaj churakorqani. Tukuy imatachus nisqaytaj junt'akorqapuni.

⁴ Chay ajina karqa k'ullu kasqaykichejta yachasqayrayku. Kunkaykichejqa fierro jina mana kuyurej, umaykichejpis bronce jina sinch'illataj.

⁵ Unaymantaña noqa willarqaykichej. Manaraj chay kashajtin, noqa chayta willarqaykichejña, ama ninaykichejpaj: Kayqa lantiypa ruwasqanmin. K'ullumanta ruwasqay lanti, chantá fierromanta ruwasqa diosniy kay tukuyta kamachin, nispa.

⁶ Chay nisqayta uyarerqankichej, junt'akusqantataj rikorqankichej. Yachankichej nisqayman jinapuni kasqanta. Kunantajrí mosoj imakunamanta uyarichisqaykichej, mana yachasqaykichejtataj sut'inchasqaykichej.

⁷ Chay nisqayqa mosojmin, ñawpajpitaj mana karqachu. Chayrayku mana niwajchejchu: Chaytaqa yacharqaykuña, nispa.

⁸ Arí, chay nisqaytaqa mana jayk'ajpis uyarerqankichejchu, nitaj rejserqankichejchu. Cheqapuni ñawpajtaqa mana uyariyta munajchu kankichej. Noqaqa wasanchanawaykichejta yacharqaniña, imaraykuchus paqarikusqaykichejmantapacha mana kasukoj kankichej.

⁹ Chaywanpis sutiyrayku sinch'i phiñakuyniyta ñit'iykukuni. Noqa jatunchasqa kanayrayku phiñakuyniyta ñit'iykukuspa, mana chinkacherqaykichejchu.

¹⁰ Noqa llimphucharqaykichej mana qolqe metalta jinachu. Manachayqa ñak'ariy hornopi ch'uyancharqaykichej.

¹¹ Noqarayku chayta ruwarqani, ama sutiy pisipaj qhawasqa kananpaj. Manataj saqesajchu qankuna lantikunata Diosta jina jatunchanaykichejta.

Tata Dios ayllunta kacharichenqa

¹² Jacobpa ayllun Israel, uyariway. Qanta wajyarqayki. Noqalla Dios kani, tukuy imaj qallariynin, tukukuynintaj.

¹³ Makiywan kay pachaj cimientonta churarqani, makillaywantaj janajtapis jatunman aysarqani. Chaykunata sutinkumanta wajyajtiy, rikhurerqankupacha.

¹⁴ Tukuyniykichej tantakuspa, uyariwaychej: Mayqen diostaj kay imakuna kananmanta sut'incharqari? Noqaj ajllakusqay runaqa wakichisqayta junt'anqa Babiloniaj contranpi, caldeokunaj contrankupiwan.

¹⁵ Noqa Cirowan parlarqani, chantá payta wajyarqani, pusamorqanitaj. Chayrayku maytachá purisqanpi allinpuni renqa.

¹⁶ Qayllamuwaspa, kayta uyariwaychej: Qallariymantapacha noqaqa sut'ita parlarqani, kay tukuy ima junt'akushajtinpis, noqa chaypi karqani. Kunantaj noqa Tukuyta Kamachej Tata Dios payman Espirituyta qospa, payta kacharqani, nispa.

¹⁷ Israelpa May Llimphu Kaj Diosnin, pagota qospa kacharichisoj Tata Dios ajinata nin: Noqamin Tata Diosniyki kani. Noqa yachachiyki imachus qanpaj allin kasqanta, jinataj may ñantachus purinaykita rikuchiyki.

¹⁸ Kamachisqaytachus kasuwankiman karqa chayqa, allin kawsay qanpaj mayu jina puririnman karqa, justiciataj mama qochaj qhollchoqeyasqan jina kanman karqa.

¹⁹ Mirayniykipis t'iyu jina mana yupay atina kankuman karqa. Qanmanta mirajkunaqa t'iyu jina ashkhapuni kankuman karqa. Noqa mana jayk'ajpis paykunata chinkachiymanchu karqa, manataj ñawpaqeymantapis paykunata wijch'uymanchu karqa.

²⁰ Chaywanpis kunan Babiloniamanta llojsiychej, caldeokunamantataj ayqekuychej. Kay imakunamanta kusiywan willamuychej, kay pachaj k'uchunkamataj uyarichiychej. Chaypacha niychej: Tata Dios pagota qospa kamachin Jacobta kacharichin, nispa.

²¹ Ch'innejta paykunata pusashajtin, yaku ch'akiymanta mana wañorqankuchu. Manachayqa Tata Diosqa chhankamanta yakuta phullchichimorqa. Chhankata lajrarqa, yakutaj purirerqa.

²² Millay runakunapajrí mana allin kawsay kanchu. Ajinata Tata Dios nin.