Isaías 47 - DIOSPA QHELQACHISQ

Babilonia suyu urman

¹ Tata Dios nillantaj: Babilonia suyu, tiyanaykimanta urayk'uy, ñut'u jallp'api tiyakuy. Kamachinayki tiyanamanta urayk'uspa, pampapi chukukuy. Ñawpajtaqa manaraj qharita rejsej sipas jina karqanki. Kunantaj manaña k'achita nisonqankuchu.

² Maran rumita jap'ispa, trigota kutay. Uma qhatanaykita qhatarakuy, qhoysu p'achaykita patakama oqharikuspataj, mayuta chimpay.

³ Q'ara ukhuyki rikukonqa, p'enqayniykipis sut'ipacha kanqa. Mana khuyarikuspa, qanmanta vengakusaj, manataj pipis jark'ayta atiwanqachu.

⁴ Tukuy Atiyniyoj Tata Diosqa qhespichiwajninchej. Israelpa May Llimphu Kaj Diosnenqa kay jinata nin:

⁵ Caldeokunaj ususin Babilonia, ch'inmanta chukuy, laqhayayman yaykuy. Kunanmantaqa manaña jayk'ajpis jatun suyukunata kamachej qoya nisonqankuchu.

⁶ Noqaqa Israel aylluypaj mayta phiñakorqani. Chayrayku ajllakusqay Israelta mana allinpajchu qhawarqani, makiykimantaj paykunata jaywaykorqani. Qantajrí mana khuyaspa, paykunata anchatañataj ñak'aricherqanki. Allin machu runakunatapis anchata ñak'arichillarqankitaj.

⁷ Qan nerqanki: Noqaqa qoya jina wiñaypaj kamachillasajpuni, nispa. Chaywanpis qanqa kay imakunamanta mana yuyarqankichu, manataj unancharqankichu imapichus tukukunaykita.

⁸ Chayrayku, kunanqa kayta uyariy, k'anchilla warmi: Kunan kamachinayki tiyanapi sumajta tiyarishanki, ni imamanta llakikuspa. Sonqoykipitaj nishanki: Noqa jinaqa ni pi kanchu. Noqamanta jawaqa waj mana kanchu. Manataj warmisapa jina qhepakusajchu, nitaj wawaykunapis wañonqankuchu, nispa.

⁹ Chaywanpis kay iskaynin llakiykuna ujllata, uj p'unchayllapi qhatirisonqa: Ujllapi mana wawayoj, mana qosayojtaj rikhurinki. Chay jina yatiriyoj, layqayoj kashajtiykipis, chay llakiykunaqa kaymanta jinalla chayamusonqapuni.

¹⁰ Qanqa millay ruwasqaykipi atinikuspa, nerqanki: Mana pipis rikuwanchu, nispa. Qantaqa yachasqayki, yuyasqayki ima q'otiyasunku. Qantaj sonqoykipi nerqanki: Noqalla kani, noqamanta jawaqa mana waj kanchu, nispa.

¹¹ Chayrayku sinch'i llakiypuni qanta qhatirisonqa, manataj ima layqeriyokunawanpis jark'akuyta atinkichu. Jatun ñak'ariy chayamusonqapuni, manataj chaymanta llusp'iyta atinkichu. Mana yuyashajtillayki, chay tukuy ñak'ariykuna urmaykamusonqa.

¹² Babilonia, kunanqa yatiriykikunawan, layqaykikunawan ima purillaypuni, pikunamanchus wawa kasqaykimantapacha k'askarqanki, chaykunawan. Ichapis allin risonqa, chaykunawantaj runakunata manchachiwaj.

¹³ Ashkha yuyaychajkunawan sayk'usqaña kanki. Kunanqa janajta qhawajkuna jamuchunku. Paykuna ch'askakunata qhawaspa, sapa killa watunku, imachus qhepaman jamunanta willasojkuna, chay llakiy qhatirisunanmanta jark'asuchunku.

¹⁴ Chaykunarí q'opa jinalla kanqanku. Ninaqa paykunata ruphaykonqa, manataj nina lawraymanta ayqekuyta atenqankuchu. Chay ninaj k'ajaynenqa mana ñawpaqenpi tiyarikuspa q'oñikunapajchu.

¹⁵ Chantá tukuy wawqeykikuna, pikunamanchus wawamantapacha qhatuta ruwaspa k'askasqa karqanki, chaykuna mana kacharichisonqankuchu. Maynintachus ripunankuta riponqanku, mayta qhaparikojtiykipis, mana uyarejman tukonqanku. Kunanqa mana pipis kacharichisoj kanchu.