Isaías 46 - DIOSPA QHELQACHISQBabiloniaj lantinkuna 1 Bel diosqa k'umpuykukun. Nebo diospis pampaman wijch'ukun. Chay lantikunaqa burropi chajnasqa rinku, llasa q'epita apajkunataj kharkatitinku llasa kasqankurayku. 2 Chay dioskuna k'umpuykukunku, pampamantaj wijch'ukunku. Mana qhespichikuyta atispa, paykuna kikinku mana munashajta waj suyuman apachisqa kanku. 3 Uyariwaychej, Jacobpa miraynin, israelitakunamanta tukuy puchojkuna: Paqarisqaykichejmantapacha noqa qankunata q'epiykacharqaykichej. Mamaykichejpa wijsanmantapacha sumaj ichuykachasqa karqankichej. 4 Kunantaj machuyajtiykichejpipis, noqaqa kikillanpuni kasaj. Yuraj chujchallaña kashajtiykichejpis, wawata jina apaykachasqaykichej. Noqa ruwarqaykichej, noqallataj q'epiykachasqaykichej. Tukuy imapitaj yanapasqaykichej, qhespichisqaykichejtaj. 5 Piwantaj rijch'achiwankichejmanri? Noqa jina pitaj kanmanri? Pimantaj kikinchawankichejmanri? 6 Wakinkunaqa wayaqankumanta qorita orqhonku, chayrí qolqe metalta romanapi aysanku. Chaymantataj lanti ruwajta mink'aspa, lantita ruwachinku. Chantá chay ruwasqa diosman qonqorikuspa, payta yupaychanku. 7 Lijrariykukuytawan, chay lantita apanku, maypichus kananmantaj churanku. Chaypitaj mana kuyurispa kakullan. Paymanta qhaparispa mañakunku, manataj uyarinchu, nillataj llakiyninkumantapis kacharichinchu. 8 Chayta yuyarikuychej, mana kasukoj runakuna. Yuyayniykichejman tukuspataj, allinta unanchakuychej, contraypi oqharikojkuna. 9 Yuyarikuychej ari ñawpamantapacha imachus kasqanta. Noqalla Dios kani. Noqamanta jawaqa mana waj dios kanchu, nillataj ujllapis noqaman rijch'akojqa kanchu. 10 Noqaqa qallariymantapacha qhepaman imachus kananmanta willani. Noqa unaymantapacha willani, manaraj imapis kashajtin. Nini: Noqaj wakichisqayqa junt'akonqapuni. Imatachá munasqayta ruwasaj, nispa. 11 Inti llojsimuynejmanta uj runata wajyani. Payqa karu suyumantapacha anka jina jamonqa wakichisqayta junt'ananpaj. Noqa ruwanayta nini, chay nisqaytataj junt'asajpuni. Imatachus wakichisqayta ruwasajpuni. 12 Uyariwaychej, rumi sonqo runakuna, cheqan kawsaymanta karunchakojkuna: 13 Noqaqa justiciayta qayllachimusaj, manataj karupichu kashan. Qhespichinaypis usqhayta chayamullanqataj. Noqaqa Sionta qhespichisaj, Israelpitaj jatun kayniypa lliphipiynin rikukonqa, nispa. |
Revisión Biblia Quechua Boliviano © Sociedad Bíblica Boliviana, 2017.
Bolivian Bible Society