Isaías 45 - DIOSPA QHELQACHISQ

Tata Diosqa Cirota kamachin kananpaj ajllakun

¹ Tata Diosqa Cirota kuraj kamachej kananpaj aceitewan jawichispa ajllarqa, paña makinmanta jap'ispataj, paynejta jatun suyukunata k'umuykachachenqa. Ajinamanta kuraj kamachejkunaj armankuta qhechuspa, llajtakunaj punkunkuta kicharenqa, mana ujtawan wisq'akunanpaj.

² Kunan Tata Dios Ciroman kay jinata nin: Noqa qanpa ñawpaqeykita rispa, orqokunata pampachasaj. Broncemanta ruwasqa punkukunata t'unarasaj, fierro barretakunatapis p'akirasaj.

³ Pakasqa valorniyoj imakunata noqa qosqayki, valorniyoj pakasqa kashan, chayta. Ajinamanta yachanki Israelpa Tata Diosnin noqa kasqayta, jinallataj sutiykimanta wajyasoj kasqaytawan.

⁴ Kamachiy Jacobta munakusqayrayku, ajllakusqay Israelrayku sutiykimanta wajyarqayki. Mana rejsishawajtiykipis, jatunpaj qhawasqa sutita churarqayki.

⁵ Noqamin Tata Dios kani. Noqamanta jawaqa mana waj dios kanchu. Qan mana rejsishawajtiykipis, noqa qanta maqanakunaykipaj sumajta wakichiyki.

⁶ Ajinamanta inti llojsimuynejmanta inti yaykuynejkama tukuy yachanqanku noqamanta jawa mana waj dios kasqanta. Noqamin Tata Dios kani, manataj waj dios kanchu.

⁷ Noqaqa k'anchayta, laqhayaytapis ruwani. Noqallataj allin kawsayta, llakiy kawsaytapis qoni. Noqa Tata Dioslla chay tukuy imata ruwani.

Tata Dioslla tukuy atiyniyoj

⁸ Noqaqa janaj pachamanta justiciata parachimusaj. Phuyukuna, qankunapis cheqan kayta paramuychej. Jallp'apis kicharikuchun, chantá qhespichisqa kay p'utumuchun, justiciataj wiñachun. Noqa Tata Diosmin chaykunata ruwarqani.

⁹ May llakiy qhatirenqa, pikunachus Ruwajninkuwan churanakunku, chaykunata. T'urumanta ruwasqa mankaqa ruwajninwan churanakunmanchuri? T'uru mankaqa ruwajninta ninmanchu: Imata ruwashanki? nispa. Chayrí ninmantajchu: Ruwasqaykeqa mana allinchu, nispari?

¹⁰ Imayna llakiychus kanman sichus uj wawa paqarikuytawan, tatanta ninman: Imapaj yumawarqankiri? nispa. Jinallataj mamantapis ninman: Imapaj paqarichikuwarqankiri? nispa.

¹¹ Israelitakunata ruwaj Tata Dios, May Llimphu Kaj Diosqa kay jinata nin: Kunanmanta qhepaman imachus kananmanta tapuriwaychej. Chayrí churiykunamanta, imaynatachus kay pachata ruwasqaymantapis tapurillawaychejtaj.

¹² Noqa kay pachata ruwarqani, runata ruwaspataj, chayman churarqani. Janajtapis makiywan jatunman aysarqani, kamacherqanitaj chayman ch'askakuna rikhurimunankuta.

¹³ Noqaqa Cirota churasaj kamachisqayta junt'ananpaj, may ñantachus purinantapis noqa pusasaj. Paymin llajtayta watej sayarichenqa. Pikunachus mana munashajta waj suyuman apasqa kashanku, chaykunatapis kacharichipuwanqa mana t'inkaraykuchu, nispa. Noqa Tukuy Atiyniyoj Tata Dios ajinata nini.

¹⁴ Chantá Tata Dios israelitakunaman nillantaj: Egipto suyumanta campo runakunata, Etiopiamanta ranqherokunata ima kamachinkichej. Jinallataj Sabá cheqamanta jatunkaray runakuna qankunaman k'umuykusonqanku, jinataj wata runaykichej kanqanku. Qhepaykichejta cadenawan watasqa jamonqanku. Ñawpaqeykichejman qonqoriykukuspataj, nisonqachej: Cheqapuni Diosqa qankuna ukhupi kashan, chay Diosmanta jawataj mana waj dios kanchu, nispa.

¹⁵ Cheqapuni Israelpa Diosnin kanki, qhespichej Diostaj. Qanqa mana rikukoj Dios kanki.

¹⁶ Lantita tukuy ruwajkunaqa k'umuykachachisqa, p'enqachisqataj kanqanku.

¹⁷ Tata Dios israelitakunata wiñaypaj qhespichenqa. Paykunataj manaña jayk'ajpis p'enqachisqachu nitaj k'umuykachachisqachu kanqanku.

¹⁸ Janaj pachata ruwaj Tata Dios, Paymin Diosqa. Paymin kay pachatapis ruwarqa, payllataj tukuy imata maychus kananman churarqa. Kay pachata ruwarqa kawsayniyojkuna chaypi tiyakunankupaj. Pay nin: Noqamin Tata Dios kani, noqamanta jawaqa mana waj Dios kanchu.

¹⁹ Noqaqa mana pakaypichu parlani, nitaj maynej laqha ukhupichu. Manallataj Jacobpa mirayninta nerqanichu: Maypichus mana ima kanchu, chaypi mask'awaychej, nispa. Noqa Tata Diosmin maychus kajta parlani, cheqantataj imatapis willaykichej.

Lantikuna qhasi manakajlla kanku

²⁰ Tantakuspa, kayman jamuychej. Tukuy suyupi wañuymanta llusp'ejkuna qayllamuwaychej. K'ullumanta ruwasqa lantikunata oqharispa apajkunaqa imatachus ruwashasqankuta mana yachankuchu. Mana qhespichiyta atej diosmanta qhasillata yanapananta mañakunku.

²¹ Qankuna allinta parlaychej. Ruwasqaykichejmanta sumajta rimanakuspa, imatachus ninaykichejta wakichikuychej. Pitaj qallariymantapacha chay imakunata ruwarqari? Pitaj unaymantapacha chay imakunata willanri? Manachu Noqa Tata Dios chay imakunamanta willarqaykichej? Noqamanta jawaqa mana waj dios kanchu. Noqalla cheqanta ruwaj Dios, qhespichejtaj kani. Noqamanta jawaqa manapuni ujpis kanchu.

²² Tukuy kay pachapi tiyakojkuna, qhespichisqa kanaykichejpaj noqaman jamuychej. Noqamin Dios kani, manataj waj Dios kanchu.

²³ Noqaj kawsayniyrayku tiluni, simiytaj cheqanta parlan. Kay nisqayqa junt'akonqapuni. Chaytaj kay jina kanqa: Noqaman tukuy runakuna qonqorikuwanqanku, sutiypitaj tilonqanku.

²⁴ Noqamanta nenqanku: Cheqapuni Tata Diosllamanta justiciawan, jatun atiywan ima jamun, nispa. Noqallaman tukuypis jamonqanku, pikunachus contraypi ruwajkunapis may p'enqaypi rikhurenqanku.

²⁵ Noqa Tata Diosrayku Israelpa miraynin cheqanpaj qhawasqa kanqanku, umankuta oqharispataj, kusikonqanku.