Isaías 44 - DIOSPA QHELQACHISQ

Tata Dios nisqanta junt'anpuni

¹ Kunanqa Jacobpa ayllun Israel, ajllakusqay kamachíy, uyariway, ari:

² Noqa ruwasoj Tata Diosniyki kani. Manaraj paqarikushajtiyki ruwarqaykiña, kunantaj qanta yanapasqayki. Munakusqay Jacobpa ayllun, ama manchachikuychu, imaraykuchus noqaqa kamachiy kanaykipaj ajllakorqayki.

³ Noqaqa ch'aki pampapi yakuta puririchisaj, ch'aki jallp'apipis yaku mayukuna kanqa. Mirayniykimanpis Espirituyta kachamullasajtaj, wawaykikunatataj saminchasaj.

⁴ Mirayniykeqa campo qhora jina wiñanqanku, imaynatachus mayu kantupi saucekuna q'omeryarinku, ajinata.

⁵ Chaypachataj nenqanku: Noqaqa Tata Diospata kani, nispa. Ujtaj nenqa: Noqaqa Jacobpa mirayninmanta kani, nispa. Ujkunataj makinkupi qhelqakonqanku: Noqaqa Tata Diospata kani, nispa. Israel sutiwantaj sutichakonqanku, nispa.

⁶ Israelpa kuraj kamachejnin Tukuy Atiyniyoj Tata Dios pagota qospa, Israelta kacharicherqa. Paytaj ajinata nin: Noqamin tukuy imaj qallariynin, tukukuynintaj kani. Noqamanta jawaqa waj dios mana kanchu.

⁷ Pitaj noqa jina kanmanri? Parlachun, ñawpaqeypitaj atiyninta rikuchichun. Chantá ñawpa p'unchaymantapacha aylluypaj imatachus ruwarqani, chayllatataj ruwachun, jinallataj qhepaman imachus kanantapis willachun.

⁸ Qankuna ama manchachikuychejchu nitaj kharkatitiychejchu. Noqaqa unaymantapachaña imachus kananta nerqaykichej, qankunataj chaymanta testigoy kankichej. Noqamanta jawa waj dios kanchu? Manapuni, mana waj pakakuna chhanka kanchu, ni ujpis kanchu, nispa.

Lantita yupaychanaqa yanqhalla

⁹ Lantikunata ruwajkuna qhasi manakaj kanku, may jina munasqa ruwasqankupis qhasi manakajlla. Chaykunata yupaychajkunaqa ñawsa kanku, nitaj imatapis yachankuchu. Chayrayku p'enqachisqa kanqanku.

¹⁰ Pichus lantita diosta jina yupaychanapaj ruwajqa qhasi manakajllata tiemponta usuchin.

¹¹ Lantikunata tukuy yupaychajkuna p'enqaypi rikhurenqanku, imaraykuchus lantita ruwajqa runallamin. Tukuyninku juicioman apasqa kanqanku, chaypitaj k'umuykuchisqa kaspa, manchachikuywan kharkatitenqanku.

¹² Uj herreroqa fierrota ninapi parichiytawan, martillowan wajtaspa, munasqanman jina q'ewin. Chaymantataj yarqhachikun, kallpanpis pisiyan. Yakumantapis ch'akin jinataj llawch'iyan.

¹³ Lanti ruwaj carpinteropis reglata jap'iytawan, lapizwan k'ullupi raqhen. Chaymantataj compaswan tupuytawan, t'illminawan t'illmiyta qallarin. Ajinata lantitaqa runaman rijch'akojta k'achituta ruwan. Chaymantataj uj temploman churamun.

¹⁴ Jinallataj runaqa montepi wiñaj cedro sach'ata, ciprés sach'ata, encina sach'atawan k'utun. Manachayrí pino sach'ata mallkin, chay sach'ataj parawan wiñan.

¹⁵ Sach'ata k'utuytawantaj, wakinta llant'an ninata jap'ichinanpaj, chaywantaj q'oñikun jinallataj hornotapis parichin t'antata chayachinanpaj. K'ullu puchojmantataj uj lantita yupaychananpaj ruwakullantaj, chaymantaj tukuy sonqo qonqorikun.

¹⁶ Wakin llant'atataj ninaman enqhaykun, chay nina k'ajaypi aychata kankaspa, sajsanankama mikhunanpaj. Jinallataj ninapi q'oñikushaspa, nin: May sumajmin nina qayllapi q'oñikoyqa, nispa.

¹⁷ Chay puchoj k'ullumantataj uj lantita ruwakun, chaypa ñawpaqenman qonqoriykukuspataj, yupaychan. Chay lantimantataj mañakun: Qhespichiway ari, imaraykuchus qanmin diosniy kanki, nispa.

¹⁸ Chay runakuna mana imatapis yachankuchu, nitaj entiendenkuchu imatachus ruwashasqankuta, imaraykuchus qhawashaspapis ñawsakuna kanku, manataj yuyayninkupipis imachus kasqanta jap'eqayta atinkuchu.

¹⁹ Chay runakuna manapuni unancharinkuchu, nitaj yuyayninku kanchu entiendenankupaj, nitaj sonqonkupi ninkuchu: Kay k'ullumanta wakinta ninaman enqhani, chay nina k'ajaypitaj t'antata chayachini, chayllapitaj aychatapis mikhunaypaj kankani. Puchojmantarí qhasi manakaj lantita ruwani. Uj k'ullumanchu qonqorikusaj? nispa.

²⁰ Chayta ruwajqa ushphata mikhuspa kawsayta munaj jina. Payqa mana cheqan yuyaykunawan q'otiyachikun. Chayrayku chay runaqa mana qhespichisqa kayta atinchu, nitaj tapukunchu: Makiypi jap'ishani chay lanti manachu qhasi manakaj q'otiriyojlla? nispa.

Tata Dios israelitakunata qhespichin

²¹ Jacobpa ayllun Israel, qan kamachiy kasqaykita yuyarikuy. Noqamanta ama qonqaychu, imaraykuchus noqa ruwarqayki, qantaj kamachiy kanki.

²² Noqa juchaykita, contraypi oqharikusqaykita ima phuyuta jina chinkachini. Noqaman kutirikamuy, imaraykuchus noqamin pagota qospa kacharicherqayki.

²³ Janaj, kusiywan takiy, imaraykuchus kaytaqa Tata Diosmin ruwan. Ukhu pacha, kusiywan qhapariy. Qankuna orqokuna, montepi tukuy sach'akuna ima kusiywan takirikuychej, imaraykuchus Tata Diosqa Jacobpa ayllunta pagota qospa kacharichin, ajinamantataj Israelpi jatun kayninta rikuchin.

²⁴ Manaraj paqarikushajtiyki, Tata Dios ruwasorqaña, chaymantataj pagaspa kacharichisorqa, paytaj ajinata nin: Noqamin tukuy imata ruwaj Tata Dios kani. Noqalla janajta jatunman aysarqani. Kay pachata ruwashajtiy, mana pipis noqawanchu kasharqa.

²⁵ Noqaqa llulla sut'inchajkunata pantachini, layqakunatapis p'enqayman churani. Yachayniyojkunata qhepaman kutirichini, yachayninkutataj manakajman tukuchini.

²⁶ Chaywanpis kamachiykunaj nisqanku junt'akunanta ruwani, jinallataj kachasqay runakunaj yuyasqankupis. Paykunanejta Jerusalenman nini: Kay cheqapi runakuna watej tiyakonqanku, nispa. Nillanitaj: Judá suyupi llajtakunapis watej ruwasqa kanqanku, nispa. Kamachillanitaj laqayakunapis watej sayarichisqa kanankuta.

²⁷ Noqaqa mama qochata ch'akichiyta atini, jinallataj mayukunatapis.

²⁸ Kuraj kamachej Cirotapis nini: Qanqa michejniy kanki, jinataj munasqaytapuni ruwanki, nispa. Jerusalentapis nini: Qanqa watej ruwasqa kanki, nispa. Templotapis nillanitaj: Cimientoyki churasqa kanqa, nispa.