Isaías 43 - DIOSPA QHELQACHISQ

Tata Dioslla qhespichin

¹ Jacobpa miraynin Israel, pichus qanta ruwasorqa, chay Tata Dios nisunki: Ama manchachikuychu, imaraykuchus noqa pagaspa, qanta kacharicherqayki. Noqa sutiykimanta wajyarqayki, qantaj noqajta kanki.

² Mayuta chimpashajtiyki, noqa qanwan kasaj, manataj mayupis apasonqachu. Nina chawpita purishaspapis, mana ruphachikunkichu, lawrayninpis mana q'aspallasonqapischu.

³ Noqa Tata Diosniyki kani, Israelpa May Llimphu Kaj Diosnin, qhespichisojniykitaj. Kacharichisunaypaj noqa Egiptota, Etiopiata, Sebatawan ima qanmanta pagota jina qorqani.

⁴ Noqapaj may k'acha kanki, may allinpaj qhawayki, chantá munakuykitaj. Chayrayku kacharichisunaypaj waj runakunata, waj suyukunata ima pagota jina qosaj.

⁵ Ama manchachikuychu, imaraykuchus qanwanpuni kashani. Chantá inti llojsimuynejmanta, inti yaykuynejmantawan runaykikunata tantamusaj.

⁶ Wichaynejpi kaj suyuta nisaj: Paykunata kutichimuy, nispa. Uranejpi kaj suyutapis nillasajtaj: Ama paykunata jap'ikuyñachu. Kay pachaj aswan karu k'uchunmantapacha churiykunata, ususiykunatawan apampuway.

⁷ Pikunachus sutiyta oqharejkunata, jinallataj pikunatachus noqata jatunchanawankupaj ruwarqani, chaykunata apampuway, nispa.

⁸ Tata Dios nillantaj: Aylluy ukhumanta wajyamuychej, pikunachus rikushaspapis mana rikunkuchu, uyarishaspapis mana uyarinkuchu, chaykunata.

⁹ Uj cheqallaman suyukuna, runakunapis tantakuchunku. Mayqen lantinkutaj chay kananta sut'incharqari? Jinallataj mayqenkunataj ñawpajta imachus kasqantapis willallarqatajri? Chayta rikojkunata testigota jina pusakamuchunku, runakuna chayta uyarispa, ninankupaj chayqa ajinapuni kasqanta, nispa.

¹⁰ Tata Dios nillantaj: Qankunaqa testigoy kankichej. Israel, qanqa ajllakusqay kamachiy kanki noqata rejsikapunawaykipaj, noqapi atinikunawaykipaj, pichus noqa kasqayta allinta yachanaykipaj ima. Noqamanta ñawpajtaqa mana ima diospis karqachu, manallataj qhepamanpis kanqachu.

¹¹ Noqamin Tata Dios kani, noqamanta jawataj mana waj qhespichejpis kanchu, nispa.

¹² Tata Dios nillantaj: Noqa qhespichisunayta willarqani. Chantataj qhespichisuspa, chayta tukuynejman rejsicherqani. Noqamin chayta ruwarqani, mana waj dioschu, qankunataj chaymanta testigoy kankichej.

¹³ Wiñaynintinmantapacha wiñaynintinkama noqamin Dios kani. Mana pipis makiymanta imatapis qhechunmanchu, nillataj pipis noqaj ruwasqayta phaskaranmanchu, nispa.

¹⁴ Israelpa May Llimphu Kaj Diosnin, pagota qospa kacharichisoj Tata Diosqa ajinata nin: Qankunarayku Babiloniaman soldadokunata kachasaj, Babiloniapi tiyakojkunatataj ayqechisaj. Jinallataj barcokunapi purej runaykachaj caldeokunapis may llakiypi rikhurenqanku.

¹⁵ Noqamin Tata Dios kani, May Llimphu Kaj Diosniykichejtaj, pichus Israelta ruwaj, kuraj kamachejnintaj, chay.

¹⁶ Noqa Tata Dios aylluyta nini: Noqa mama qochaj chawpinta khallaspa, uj ñanta kicharerqani, manchana jina yakoj chawpintataj uj ñanta kicharerqani.

¹⁷ Chantá Egiptomanta kallpasapa soldadokunata wajyarqani, carretakunata, caballopi lloq'ajkunata, mayta wapuykachaj soldadokunatawan ima. Jinaspataj, tukuyninkuta yakupi p'ultiracherqani, chinkacherqanitaj q'oshñishaj mecherota jina, nispa.

¹⁸ Noqa chay tukuy imata ruwaj Tata Dios nillanitaj: Ñawpa imakunata ama yuyarikunkichejñachu, nitaj qaninpa imachus kasqanmanta unanchaychejñachu.

¹⁹ Kunan noqa uj mosoj imata ruwasaj, chaytaj rikhurishanña. Manachu chayta qankuna reparashankichejri? Ch'innejpi watej uj ñanta kicharisaj, mayukunatataj ch'aki pampakunapi rikhurichisaj.

²⁰ Chantá tukuy k'ita animalkunawan, k'ita alqokunawan, surikunawan ima jatunchawanqanku, imaraykuchus ch'aki jallp'api yakuta rikhurichisaj, ch'innejpitaj yaku mayukunata puririchisaj, ajllakusqay ayllu yakuta ujyanankupaj.

²¹ Israel aylluytaqa noqata yupaychanawanpaj ruwarqani. Aswan qhepamantaj paykuna tukuynejpi sutiyta jatunchanqankupuni.

²² Chaywanpis Jacobpa miraynin Israel, qanqa sutiyta mana oqharerqankichu, manachayqa noqawan amichikorqanki.

²³ Mana ovejakunata apamuwarqankichu ñak'aspa q'olachinapaj, nitaj uywa ñak'asqa q'olachinakunawan jatunchawarqankichu. Noqaqa mana sayk'ucherqaykichu, ch'aki mikhuy jaywanata mañasuspa, nitaj mat'iykorqaykichu sapa kuti inciensota q'oshñichinawaykipaj.

²⁴ Manallataj noqapaj sumajta q'apaj jawinakunata ranterqankichu, nillataj uywa ñak'asqaj wirantapis tukuy sonqo apamuwarqankichu. Manachayqa jucha q'epiykiwan llasaykuchiwarqanki, chay jina millay juchata ruwasqaykiwantaj sayk'uchiwarqanki.

²⁵ Chaywanpis Diosniyki kasqayrayku, chay millay juchaykita llimphuchasaj. Juchaykikunatataj qonqayman churasaj.

²⁶ Contraypi ima niwanaykipaj kajtenqa, jamuy chaymanta sut'iman orqhonanchejpaj. Ichapis mana juchayoj kasqaykita rikuchiwankiman.

²⁷ Ñawpa tatayki contraypi juchallerqa, yachachejniykikunapis contraypi oqharikorqanku.

²⁸ Sacerdoteykikuna Temployta pisipaj qhawasqankurayku p'enqaypi rikhurichisaj. Jacobpa aylluntaqa chinkarparichisqa kananpaj churasaj, Israel ayllutataj p'enqayta qhesachasqa kananpaj churallasajtaj.