Isaías 4 - DIOSPA QHELQACHISQ

¹ Chay p'unchaykunapi pisi qharikuna kanqanku. Chayrayku qanchis warmikuna uj qharillaman ch'ipakuspa, nenqanku: Noqaykoqa mikhunallaykumanta mikhusqayku, p'achallaykuwantaj p'achallikusqayku. Chaywanpis noqaykuwan casaraspa, warmiykipaj rejsikapuwayku, ama p'enqaypi warmisapa qhepakunaykupaj, nispa.

Qhepanejman Jerusalenpaj kusikuymin kanqa

² Chaywanpis aswan qhepamanqa Tata Diospa ijichisqan manchay k'achitu kanqa. Chantá puchoj israelitakuna jallp'aj poqoyninmanta mayta kusikonqanku, chaynejtataj may uyarisqa kanqanku.

³ Pikunachus Sionpi qhepakojkuna, chantá Jerusalén llajtapi tiyakushankuraj chaykuna “Diospaj t'aqasqa”, nispa sutichasqa kanqanku.

⁴ Chay kanqa, maypachachus Tukuyta Kamachej Dios juicionwan, ninawan ima Sionpa ch'ichi kayninta llimphuchanqa, jinallataj Jerusalenpi yawar jich'asqankuta pichanqa, chaypacha.

⁵ Chantá Tata Dios tukuynin Sión orqota, tantasqa runakunatapis p'unchaypi phuyuwan llanthuykonqa, tutantaj q'oshñita, nina lawray k'anchayta ima rikhurichenqa. Patapitaj Tata Diospa jatun kayninpa lliphipiynin qhatana jina paykunapaj kanqa.

⁶ Chayqa toldo jina paykunata qhataykonqa ruphaypi llanthunanpaj, chantá paramanta, sinch'i wayramantawan waqaychananpaj ima.