Isaías 39 - DIOSPA QHELQACHISQ

Babiloniamanta kachakuna

¹ Chaypacha Baladanpa churin Merodac Baladán Babiloniamanta kuraj kamachej karqa. Jinapi kuraj kamachej Ezequías onqoyninmanta qhaliyasqanta yachaspa, kachakunawan cartata, waqetawan kuraj kamachej Ezequiasman apacherqa.

² Ezequiastaj chay kachakunata kusisqa wasinman wajyarikorqa, paykunamantaj tukuy kapuyninta rikucherqa: Qolqe metalta, qorita, sumaj q'apaj jawinata, sumajnin kaj aceiteta, arma jallch'ana wasikunata, tukuy iman kajtawan. Kamachinan wasipi, tukuy suyupipis manapuni imatapis paykunamanta pakarqachu.

³ Chay qhepata Isaiasqa kuraj kamachej Ezequiasman rispa, taporqa: Maymantataj chay runakuna jamusqankuri? Ima nisunkutajri? nispa. Ezequiastaj nerqa: Karu suyu Babiloniamanta watukuwaj jamusqanku, nispa.

⁴ Chantá Isaías tapullarqataj: Imatataj wasiykipi rikorqankuri? nispa. Ezequiastaj kuticherqa: Paykunaman rikucherqani imakunachá wasiypi kaj chhikata. Wasiypi kajmantaqa mana imatapis paykunamanta pakarqanichu, nispa.

⁵ Chantá Isaiasqa Ezequiasta nerqa: Uyariy Tukuy Atiyniyoj Tata Diospa nisusqanta:

⁶ Uj p'unchay chayamonqa, chaypachataj Babiloniamanta kajkuna jamuspa, kunankama ñawpa tataykikunaj waqaychasqankuta apakaponqanku. Chaykunamanta ni ima puchonqachu. Tata Dios ajinata nin.

⁷ Jinallataj Babiloniamanta kajkuna mirayniykimanta wakinkunata presota apakaponqanku. Paykunata capaspataj, Babilonia kuraj kamachejpa kamachinan wasipi kamachi ruwanayoj kanqanku, nispa.

⁸ Chantá Ezequías Isaiasman kuticherqa: Tata Diospa nisqanta parlasqaykeqa sumajpacha, nispa, imaraykuchus sonqonpi yuyarqa: Noqa kawsanaykamallapis k'acha kawsakuy, sonqo tiyaykuytaj kachun, nispa.