Isaías 38 - DIOSPA QHELQACHISQ

Ezequías onqoyninmanta qhaliyapun

¹ Chaypacha Ezequías onqoykuspa, wañuy patapi kasharqa. Jina kashajtintaj, Amozpa churin sut'inchaj Isaías watukoj rispa, nerqa: Tata Dios kayta nisunki: Aylluykiman allinta encargakuy, imaraykuchus onqoyniykimanta mana qhaliyankichu, wañupunkipuni, nispa.

² Ezequiastajrí perqa ladoman kutirikuspa, Tata Diosmanta kay jinata mañakorqa:

³ Tata Dios, noqamanta yuyarikuy imaynatachus ñawpaqeykipi purisqayta, tukuy sonqo cheqan kajta ruwaspa, nispa. Chantá Ezequías sonqo nanayta waqarqa.

⁴ Jinapi Tata Dios ujtawan Isaiasta nerqa:

⁵ Rispa, Ezequiasman nimuy: Ñawpa tatayki Davidpa Tata Diosnin kay jinata nisunki: Mañakusqaykita, waqasqaykitapis uyarini. Chayrayku noqa niyki chunka phishqayoj watatawanraj kawsanaykita.

⁶ Noqallataj Asiriata kuraj kamachejpa makinman urmanaykimanta kacharichisqayki, jinallataj Jerusalén llajtatapis, nispa.

⁷ Kunantaj kay señalta Tata Dios qosonqa, nisusqanta junt'ananpaj.

⁸ Qhawariy, Ajazpa inti watananpi llanthuta chunka patillata qhepaman kutirichisaj, nispa. Chantataj llanthoqa chay urayk'amusqanmanta chunka patillata qhepaman kutirerqa.

⁹ Chantá Judata kuraj kamachej Ezequías onqoyninmanta qhaliyaytawan, kay yarawita qhelqarqa:

¹⁰ Noqaqa yuyarqani: Kallpaypi kashaspallaraj wañupusaj, unay kawsayta manaña rikusajchu, manachayqa ukhu pachaman yaykupusaj, nispa.

¹¹ Nillarqanitaj: Tata Diosta manaña rikusajchu kawsashajkunaj jallp'ankupi. Manaña wawqeykunatapis rikusajchu, nitaj kay pachapi kawsajkunawan khuska kasajñachu.

¹² Tata Dios kawsayniyta oqharikapun uj michejpa toldonta jina. Awaj runa imaynatachus awasqanta k'utuspa mayt'ukapun, ajinata kay onqoywan kawsayniyta k'uturparin. Uj p'unchayllapi kawsayneyqa tukukapun.

¹³ Noqaqa nanaywan qhaparikuspa sut'iyarqani, uj leonpis tulluykunata mitharparinman jina. Uj p'unchayllapi kawsayniy tukukapun.

¹⁴ Para p'isqo jina waqani, urpi jinataj ayqoni. Patata qhawasqaypi ñawiypis k'arawanña. Tukuyta Kamachej Dios, kay jina ñak'ariypi kashajtiy, yanapariway ari.

¹⁵ Chaywanpis noqa, imatataj niymanri? Tata Dios kay onqoyta kachamuwan. Tukuy kawsayniypi k'umuykuspa kawsasaj, kay jinamanta ñak'arichisqa kasqayrayku.

¹⁶ Tata Dios, ñak'arichiwasqaykeqa noqapaj allinmin, imaraykuchus kawsayta qowan. Qanlla qhaliyachiwanki, kawsajtataj saqewanki.

¹⁷ Arí, kay jina ñak'arisqayqa noqaj allinniypaj karqa, imaraykuchus wañuymanta qhespichiwarqanki, tukuy juchaytapis pampacharqanki.

¹⁸ Wañusqakunaqa aya p'ampanapi mana qanta jatunchasunkuchu, nillataj jatun kayniykimanta takinkuchu. Pikunachus ukhu pachaman yaykojkunaqa nisqaykita junt'anaykita mana suyankuchu.

¹⁹ Kawsajkunalla yupaychasuyta atinku, imaynatachus noqapis kunan yupaychashayki, ajinata. Nisqaykita junt'aj kasqaykimanta tatakunaqa wawankukunaman willanku.

²⁰ Tata Dios qhaliyachiwanqa. Chayrayku Tata Diospa Templonpi sapa p'unchay arpata tocaspa takinachej tukuy kawsayninchejpi, nispa.

²¹ Isaiasqa ñawpajta Ezequiaspa kamachinkunata nisqaña: Higota q'aperqospa, chaywan chay ch'upunman laq'aykuychej, qhaliyanqataj, nispa.

²² Ezequiasrí nillasqataj: Ima señal kanqa qhaliyaspa Tata Diospa Templonman rinaypajri? nispa.