Isaías 37 - DIOSPA QHELQACHISQ

Ezequías Tata Dios yanapananta mañakun

¹ Kuraj kamachej Ezequías chayta uyarispa, llakiywan p'achanta llik'irakorqa, qhashqa p'achata churaykukuytawantaj, Tata Diospa Templonman rerqa.

² Chantá Ezequías kamachina wasipi mayordomo Eliaquinta, qhelqeri Sebnata, sacerdotekunaj kurajninkukunata ima nerqa qhashqa p'achata churakuspa, Amozpa churin sut'inchaj Isaiasman rinankuta.

³ Chayaspataj, Isaiasman willarqanku: Kay jinata nin kuraj kamachej Ezequías: Kunan p'unchay may llakiypi kashanchej, turiyasqa, k'umuykachachisqataj. Imaynachus wijsallisqa warmi paqarichikunanpachapi mana kallpayoj llawch'ipacha kashan, ajinata rikhurinchej.

⁴ Ichapis Tata Diosniyki Asiriamanta soldadokunata kamachejpa nisqanta uyarin, pitachus Asiriata kuraj kamachej kachamun kaypi Kawsaj Diospa contranta parlananpaj, chaypata. Tata Diostaj payta imatachus parlasqanmanta jasut'ichun. Chayrayku Tata Diosmanta mañapuwayku ari, kaypi mashkhachus puchunchejraj, chaykunapaj, nispa.

⁵ Chaymanta Ezequiaspa kachankuna Isaiasman willajtinkukama,

⁶ Isaías paykunaman kuticherqa: Kamachiykichejman ajinata nimuychej: Tata Dios ajinata nin: Ama chay runaj nisqanmanta llakikuychu, noqaj contrayta Asiriamanta kuraj kamachejpa kamachinkuna millayta rimasqankumantaqa.

⁷ Noqa paypa sonqonta mancharichisaj, uj willayta uyarispataj suyunman kutiponqa. Chantataj chaypi espadawan payta wañuchichisaj, nispa.

⁸ Chaykamataj Asiriamanta soldadokunata kamachej Laquis llajtaman kutispa, mana Asiriata kuraj kamachejta tarerqachu, imaraykuchus Libna llajtaj contranta maqanakoj risqa.

⁹ Jinapi Asiriata kuraj kamachej uyarerqa Etiopiata kuraj kamachej Tiracá paypa contranta ashkha soldadota kachasqanta. Chayta uyarispa, ujtawan kuraj kamachej Ezequiasman runakunata kacharqa kay jinata ninankupaj:

¹⁰ Kay willayqa Judata kuraj kamachej Ezequiaspaj: Pipichus atinikushanki, chay Diosniykiwan ama q'otiyachikuychu. Jerusalenqa Asiriata kuraj kamachejpa makinman mana urmanqachu, nispa nisojtin.

¹¹ Qan allinta yachanki imaynatachus Asiriamanta kuraj kamachej tukuy suyukunata tukuchisqanta. Chaychu qan makinmanta llusp'iwaj?

¹² Ñawpa tataykuna Gozán llajtata, Jarán llajtata, Resef llajtata, chantá Telasarpi tiyakoj Edén runakunata ima chinkachishajtiyku, diosninkukuna paykunata kacharichiyta aterqankuchu?

¹³ Jamatmanta, Arfadmanta, Sefarvayin, Henamanta, chantá Guivamanta ima kuraj kamachejkuna maypitaj kashankuri? nispa.

¹⁴ Chantá Israelta kuraj kamachej Ezequías chay kachakunaj jaywasqanku cartata ñawiriytawan, Tata Diospa Templonman kachaykukorqa. Chaypi chay cartata mast'aspataj,

¹⁵ Ezequías Tata Diosmanta ajinata mañakorqa:

¹⁶ Tukuy Atiyniyoj Tata Dios, Israelpa Diosnin, querubinkunaj chawpinkupi tiyakoj Dios, kay pachapi kaj chhika suyukunaj Diosninku. Qanmin ruwarqanki janajta, kay pachatawan.

¹⁷ Uyariway ari Tata Dios, ñawiykita kicharispa, qhaway ari. Senaqueribpa tukuy nisqanta uyariy ari. Pay kayta apachimuwan, kawsaj Diospa contraykita millayta rimaspa.

¹⁸ Tata Dios, Asiriamanta kuraj kamachejkuna jamuspa, tukuy suyuta, jallp'antinta tukuchisqankoqa jinapuni.

¹⁹ Chay suyukunaj diosninkukunata ninaman enqhaykorqanku, imaraykuchus chaykuna mana dioskunachu kanku, manachayqa k'ullumanta rumimanta ima, runaj ruwasqallan kanku. Chayrayku chaykunata phiriyta aterqanku.

²⁰ Kunanrí Tata Diosniyku, asiriokunaj makinmanta kacharichiwayku ari, ajinamanta kay pachapi kaj chhika suyukuna yachanankupaj qan k'atalla Tata Dios atiyniyoj Dios kasqaykita, nispa.

Isaías sut'inchan Tata Dios Judá suyuta kacharichinanta

²¹ Chantá Amozpa churin Isaiasqa Ezequiasman willacherqa: Ajinata Israelpa Tata Diosnin nisunki: Asiriata kuraj kamachej Senaquerib imatachus nisqanmanta mañakuwasqaykita uyariyki.

²² Tata Diosqa Senaqueribpa contranta kay jinata nin: Kuraj kamachej Senaquerib, Sión llajtaqa sipas jina pisipaj qhawasunki, uyaykipitaj asiykukusunki. Jerusalén llajtaqa qhepaykimanta umanta khiwirispa, asiykukusunki.

²³ Qan, pipajtaj rimankiri? Pimantataj alqochakunkiri? Pejpa contrantataj chhika jatunmanta qhaparqachanki, may kasqaykita yuyakuspataj, umaykita oqharinkiri? Chaytaqa Israelpa May Llimphu Kaj Diosninpa contranta ruwashanki.

²⁴ Qanqa kamachiykikunata kachamorqanki kaypi Tukuyta Kamachej Diospa contranta millayta rimaspa, ninankupaj: May ashkha carretaykunawan jatuchaj orqo pataman wicharini, Líbanoj kinraykunaman ima. Jatuchaj kaj cedro sach'akunata k'utuni, sumachaj kaj pinokunatawan. Aswan jatuchaj kaj orqo pataman wicharini, jinallataj aswan k'iski montekunamanpis yaykullanitaj.

²⁵ Waj suyukunapi noqaqa pujyuta allaspa, chaymanta yakuta ujyani. Noqaqa chakiywan saruspalla, Egiptopi kaj chhika mayukunata ch'akichini, nispa.

²⁶ Noqa Tata Diosrí kayta niyki: Qan manachu yacharqanki, noqa unaymantapacha kay imakunata wakichisqayta? Unay unaymantapacha imatachus wakichisqayta kunan ruwashani. Chayraykullamari qanqa pakakuna jark'achasqa llajtakunata urmarachinki, raqay rumi qollullamantaj tukuchinki.

²⁷ Chaypi tiyakoj runakuna pisi atiyniyoj karqanku, mancha manchalilla, musphasqataj. Paykunaqa campo qhora jina karqanku, chaypachallaraj p'utusqa qhora jina. Wasi patapi wiñaj qhora jina karqanku, mayqenchus inti llojsimuynejmanta wayramojtinkama ch'akirpayan, chay jina.

²⁸ Noqa allinta rejsiyki imaynachus kasqaykita, llojsisqaykita, yaykusqaykitapis rikullanitaj, jinallataj noqapaj phiñakusqaykitapis.

²⁹ Qanqa noqaj contrayta oqharikorqanki. Noqaj contraypi mayta phiñakusqaykita uyarini. Kunanrí senqaykiman fierro ganchota churasqayki, simiykimantaj frenota. Chantaqa may ñantachus jamorqanki, chayllatataj kutirichisqayki, nispa.

³⁰ Chantá Isaías kuraj kamachej Ezequiasta nillarqataj: Qankunapaj kay uj señal kanqa: Kunan wata, qhepan watatawan k'ipa trigo poqojta mikhunkichej. Kinsa watamantataj qankuna tarpunkichej, poqoynintataj oqharinkichej. Uva sach'atapis wiñachinkichej, chaymantataj poqoyninta mikhunkichej.

³¹ Judá ayllumanta puchojkunaqa sach'a jina sumajta saphichakunkichej, chaymantataj poqonkichej.

³² Jerusalenmanta puchojkuna kanqanku, Sión orqomantataj llojsejkuna kallanqankutaj. Tukuy Atiyniyoj Tata Dios may jatun munakuyninnejta chayta ruwanqa.

³³ Tata Diosqa Asiriaj kuraj kamachejninmantapis kay jinata nillantaj: Jerusalén llajtaman manapuni yaykonqachu, nitaj arconwan uj flechallatapis kachaykonqachu. Manataj escudontapis maqanakunanpaj jap'enqachu, manallataj llajtaj muyuyninpi perqata wicharinanpaj jallp'a moqokunata ruwanqachu.

³⁴ Manachayqa Asiriata kuraj kamachej may ñantachus jamorqa, chayllatataj kutiponqa. Kay llajtamanqa manapuni yaykonqachu, nispa noqa Tata Dios nini.

³⁵ Tata Dios nillantaj: Noqamin kay llajtamanta sayaykusaj, jark'akusajtaj. Noqarayku, jinallataj kamachiy Davidta munakusqayrayku chayta ruwasaj, nispa.

³⁶ Chantá chay ch'isipacha, maypichus Asiriamanta soldadokuna jarakusharqanku, chayman Tata Diospa angelnin rispa, 184.000 soldadokunata wañuracherqa. Q'ayantintaj soldadokunamanta mana wañojkuna tukuynejpi wañusqa soldadokunata rikorqanku.

³⁷ Chaymantá Asiriamanta kuraj kamachej Senaquerib tukuy imanta oqharikuspa, Nínive llajtaman kutiporqa.

³⁸ Aswan qhepamantaj kuraj kamachej Senaquerib, Nisroc sutiyoj diosninta yupaychashajtin, iskaynin churinkuna Adramelecwan, Sarezerwan ima tatankuta espadawan wañurparicherqanku, chaymantataj Ararat cheqanejman ayqerqanku. Chantá Senaqueribpa churin Esarjadón paypa cuentanmanta kuraj kamachej karqa.