Isaías 36 - DIOSPA QHELQACHISQ

Asiriata kuraj kamachejqa Jerusalenpa contranpi jamun

¹ Chunka tawayoj watata jinaña kuraj kamachej Ezequías kamachishajtin, Asiriamanta kuraj kamachej Senaquerib Judáj contranta maqanakoj jamorqa, chaypitaj tukuy jark'achasqa llajtakunata jap'erqa.

² Chantá Asiriamanta kuraj kamachejqa soldadonkunaj kamachejninkuta Laquismantapacha Jerusalenman kacharqa, kuraj kamachej Ezequiaswan maqanakunanpaj. Chay soldadokunataj jarakorqanku patanejpi yaku qocha kantupi, Telata T'ajsaj nisqa cheqaman rina ñan patapi.

³ Jinapi chay kurajwan parlamoj llojserqanku kamachina wasipi mayordomo Hilciaspa churin Eliaquín, qhelqeri Sebna, chantá Asafpa churin yuyaychaj Yoajwan ima.

⁴ Chantá Asiriamanta soldadokunata kamachej paykunata nerqa: Kayta Ezequiasman willamuychej: Asiriata kuraj kamachej jinata nisunki: Imapitaj qan chay jinatapuni atinikunkiri?

⁵ Qan ninki: Maqanakunapaj allin wakichisqa kashani ashkha soldadoykunawan, nispa. Chay nisqaykirí qhasi manakajlla. Kunan qanqa, pipitaj atinikunki noqaj contraypi oqharikunaykipajri?

⁶ Noqa yachani Egiptoj yanapayninpi atinikusqaykita. Egipto suyurí ch'ejtarpayasqa soqoso jinalla. Pipis chayman atinikojqa makinta t'ojsiykukuspa, pasarparichikonqa. Chay jinamin kuraj kamachej faraonqa paypi atinikojkunapajqa.

⁷ Sitajchus qan niwankiman: Noqaykoqa Tata Diosniykupi atinikuyku, nispa chayqa, imajtintaj chantá Diosta yupaychana altarkunata, loma patapi yupaychana cheqakunatawan qan Ezequías urmaracherqanki? Chantá Judá suyupi kajkunata, Jerusalenpi tiyakojkunatawan kamacherqanki Jerusalenpi kaj altarllapi Diosta yupaychanankuta, nispa.

⁸ Kunanqa uj tratota ruway ari Asiriamanta wiraqochi kuraj kamachejniywan. Chantá noqa qosqayki 2.000 caballokunata, sichus chay caballokunapi lloq'anankupaj soldadokunata tariwaj chayqa.

⁹ Qanqa mana atiwajchu tukuy asirio soldadokunata kamachejkunamanta aswan mana kasu ruwana kajllatapis ayqechiytaqa. Qanqa qhasillata suyakushanki Egipto suyumanta carretakunata, jinallataj caballokunapi purejkunata kachamusunanta.

¹⁰ Chantapis, qanqa yuyankichu noqa Senaquerib mana Tata Diosllawan kay llajtata chinkachej jamusqayta? Paypuni niwan kay llajtaman jamuspa chinkachinayta, nispa.

¹¹ Chaymantaqa Eliaquinwan, Sebnawan, Yoajwan ima Asiriamanta soldadokunata kamachejta nerqanku: Ama jina kaychu, arameo rimayllapi parlariwayku, imaraykuchus noqaykoqa arameo rimayta yachayku. Amataj Judá suyoj rimaynin hebreopi parlawaykuchu, imaraykuchus kay perqa patapi kajkunaqa tukuyninku uyarimushanku, nispa.

¹² Chayta uyarispa, Asiriamanta soldadokunata kamachej kuticherqa: Kaytaqa kamachej wiraqochiy mana qankunallamanchu, nitaj wiraqochi kamachejnillaykichejmanchu ninaypaj kachamuwan. Manachayqa perqa patapi tukuy kajkunamanwan ninaypaj kachamuwan, imaraykuchus paykuna, qankunawan ima yarqhaymanta jatun jisp'ayniykichejta mikhunkichej, jisp'ayniykichejtataj ujyankichej, nispa.

¹³ Chantá Asiriamanta soldadokunata kamachej sayariytawan, Judamanta kajkunaj parlayninkupi jatunmanta qhaparerqa: Asiriata kuraj kamachejpa nisqanta uyariychej:

¹⁴ Ama Ezequiaswan q'otiyachikuychejchu, imaraykuchus payqa mana qankunata kacharichiyta atisonqachejchu.

¹⁵ Ezequías nisojtiykichej: Tata Diospi atinikuna, nispa, ama payta uyariychejchu. Pay nillasonqachejtaj: Cheqapuni Tata Dioslla jark'akuwasunchej. Kay llajtaqa mana Asiriata kuraj kamachejpa makinman urmanqachu, nispa.

¹⁶ Qankunatajrí ama Ezequiasta kasuychejchu. Aswanpis Asiriata kuraj kamachej nisunkichej: Noqawan tratota ruwaspa, noqaman k'umuykamuychej. Ajinatachus ruwankichej chayqa, sapa ujniykichej uva sach'aykichejmanta, jinallataj higo sach'aykichejmantapis mikhunkichej. Yakutapis sapa uj pujyuykichejmanta ujyankichej.

¹⁷ Chaymanta qhepaman noqa kay jallp'aykichejman rijch'akoj waj suyuman apachisqaykichej, chaypitaj trigo, uva, vino chantá t'antapis kallantaj.

¹⁸ Chayrayku Ezequiaswan ama q'otiyachikuychejchu. Pay nillasonqachejpuni: Tata Dios kacharichiwasun, nispa. Ima suyoj diosnintaj pitapis Asiriaj atiyninmanta kacharichiyta aterqari?

¹⁹ Maypitaj kashan Jamatpata, Arfadpatapis diosninkuri? Maypitaj kashan Sefarvayinpa diosninpisri? Pay aterqachu Samariata Asiriata kuraj kamachejpa atiyninmanta qhechuyta?

²⁰ Mayqen suyoj diosnintaj llajtanta makiymanta kacharicherqari? Jina chayqa, imajtintaj qankuna yuyankichej Tata Dios Jerusalenta kacharichinantari? nispa.

²¹ Chaypi kaj tukuy runarí soldadokunata kamachejpa nisqanta uyarillarqanku, manataj imatapis kuticherqankuchu, imaraykuchus Ezequías kamachisqa ch'inlla kanankuta: Amapuni imatapis kutichinkichejchu, nispa.

²² Chantá kamachina wasipi mayordomo Hilciaspa churin Eliaquín, qhelqeri Sebna, Asafpa churin yuyaychaj Yoaj ima mayta llakikuspa, p'achankuta llik'irakorqanku. Chaymantataj Ezequiaspaman kachaykukorqanku, Asiriamanta soldadokunata kamachej imatachus parlasqanta willanankupaj.