Isaías 35 - DIOSPA QHELQACHISQ

Israelitakuna Jerusalén llajtaman kutimponqanku

¹ Ch'inkuna, t'ojra pampapis kusikuchun. Watejmanta qhallallarishaj rosa jina t'ikanqa.

² Chay ch'in pampaqa qhallallarispa t'ikanqa, mayta kusikuspataj takenqa. Tata Diosqa Libanota jina may k'achituta ruwanqa, Carmelo orqo jina, Sarón valle jinataj sumaj poqoj jallp'a kanqa. Ajinamanta paykunaqa Tata Diospa jatun kayninpa lliphipiyninta rikonqanku, Diosninchejpa kuraj kamachej jina kayninta.

³ Sayk'usqa kajkunata kay willaykunawan kallpachaychej, llawch'iyasqa moqoyoj kajkunata sumajta sayachiychej.

⁴ Manchachikojkunamantaj niychej: Kallpachakuychej, amataj manchachikuychejchu. Qhawariychej, Diosniykichej jamushan awqanchejkunata ñak'arichispa, ruwasqankuman jina pagachikunanpaj, kacharichinawanchejpajtaj, nispa.

⁵ Chaypacha ñawsakunapis rikonqanku, joq'arakunaj ninrinkupis kicharisqa kanqa.

⁶ Cojokunapis taruka jina phinkiykachanqanku, mana parlayta atejkunapis kusiywan takirenqanku. Yakupis ch'innejpi phullchirenqa, ch'in ch'aki jallp'apitaj yaku purirenqa.

⁷ Chay ch'aki jallp'aqa yaku qochaman tukonqa, mana jayk'aj yaku tarinapitaj yaku juturikuna t'ojyanqa. Maynejkunapichus k'ita alqokuna puñoj kanku, chay cheqapi soqosowan, t'uturawan ima wiñanqanku.

⁸ Chaypitaj rumiwan chakasqa uj sumaj ñan kanqa, sutintaj kanqa “Juchamanta May Llimphu Kaj Ñan”. Chayninta mana llimphuchasqa runakuna manapuni riyta atenqankuchu, nitaj ima wampu runapis chay ñanta purenqachu.

⁹ Chaypeqa mana leonkuna kanqachu, nitaj phiña k'ita animalkunapis chaynejta purenqankuchu. Manachayqa chay ñannejta, pikunatachus Tata Dios preciota pagaspa kacharicherqa, chaykunalla kutimponqanku.

¹⁰ Ajinata Tata Diospa qhespichisqan kajkuna kutimponqanku, Sionmantaj takirikuspa yaykuponqanku. Jatun kuseyqa pillu jina umankupi kanqa. Chaypacha paykunata jatun kusiy taripanqa, llakiywan, ayqoywantaj paykunapaj tukukaponqa.