Isaías 34 - DIOSPA QHELQACHISQ

Tata Diosqa Edom suyuta jasut'in

¹ Tukuy suyukuna, llajtakuna ima, qayllamuychej allinta uyarinaykichejpaj: Kay pachapi tukuy ima kajpis sumajta noqaj nisqayta uyarichun.

² Tata Dios manchay phiñasqa kashan tukuy suyupaj, jinataj tukuy soldadonkupaj ima. Chaykunata chinkarparichenqa, wañurachisqa kanankupajtaj paykunata jaywaykonqa.

³ Chay wañusqakunaqa pachanpi wijch'urayanqanku, ayankutaj millayta asnanqanku, orqokunapitaj yawar mayu purirenqa.

⁴ Janajpi ch'askakunapis phirikuspa chinkaraponqanku, kikin janajpis papel jina mayt'uykakaponqa. Tukuy ch'askakuna urmaramonqanku, uva sach'aj qawisqa laqhenkuna urmaran jinata, chayrí higoj laqhenkuna jina.

⁵ Janaj pachapi Tata Diospa espadanqa wakichisqa kashan. Chaytaj Edom suyupi tiyakojkunaman urmamonqa, wañunankupaj juchachasqa runakunaman.

⁶ Tata Diospa espadanqa sumaj yawarchasqa, wirawan qhoshqorishajtaj kashan. Chayqa ovejakunaj, cabrakunajpata yawarninku, chay wirataj carnerokunaj lurunninpa wiran. Tata Diosqa uywa ñak'asqa jaywanakunata Bosra llajtapi ruwan, Edom suyupitaj may chhika runakunata wañurachin.

⁷ Chay runakunawan khuska wañonqanku k'ita torokuna, torokuna, torillokuna ima. Chay jallp'ataj yawarwan ch'aranchasqa kanqa, wirawan qhoshqochasqataj.

⁸ Cheqapuni Tata Diospa vengakunan p'unchay chayamun. Chay watapitaj Tata Diosqa Edomwan pagachikonqa Sionta ñak'arichisqanmanta.

⁹ Chaypacha Edompa mayunkunaman brea junt'aykonqa, ñut'u jallp'ataj azufreman tukonqa, jallp'ataj brea jina lawranqa.

¹⁰ Chaytaj tuta p'unchay lawrallanqapuni, q'oshñintaj wiñaypaj q'oshñillanqapuni. Jinamanta chay jallp'aqa watan watan ch'inpacha kanqa, ni pipis chaypi ujtawan tiyakonqachu.

¹¹ Chaypeqa jukukuna, ch'useqakuna, qharqañakuna, wajchillakuna imallaña tiyakonqanku, Tata Dios chay suyuta ch'usaj ch'inpachaman tukuchisqanrayku.

¹² Chay llajtata kamachinanpaj mana kuraj kamachej kanqachu, imaraykuchus tukuy kurajkuna chinkaponqanku.

¹³ Kamachina wasikunapi khishkakunallaña wiñanqanku, sumaj jark'achasqa llajtakunapitaj ithapalluwan, qhorallawanña wiñanqanku. Chaykunapi k'ita alqokunallaña puñonqanku, pationkunapitaj surikunaj thapallanña kanqa.

¹⁴ Ch'innejpi kawsaj phiña animalkunaqa k'ita alqokunawan tinkonqanku, k'ita cabrakunapis chaypi wajyanakonqanku. Tuta purej k'ita animalkunapis chayman samarikoj renqanku.

¹⁵ Chaypi jukupis thapachakuytawan, runtunta churanqa, ojllaspataj, irpankunata t'ojyachenqa, lijran urapi sumajta pakaspataj uywanqa. Chayllamantaj suwintukunapis tantakonqanku, sapa uj ch'ullanwankama.

¹⁶ Tata Diospa qhelqanta ñawiriychej. Chaypi willanqa tukuynin chay uywakunamanta, sapa uj yanantin ima, imaraykuchus kikin Tata Diospuni chayta kamachin, Espirituntaj ujllaman chaykunata tantaykonqa.

¹⁷ Sapa k'ita animalman maypichus tiyanankuta rikuchin, chay jallp'apitaj wiñaypaj kawsanqanku, watan watanta kikin jallp'api miraspa.