Isaías 33 - DIOSPA QHELQACHISQ

Tata Diosllamanta allin kajta suyakuna

¹ Ay, ima llakiyrajchus kanqa qankunapaj, asiriokuna. Qankuna wajkunata thuñerqankichej chaypis, qankuna mana jayk'aj thuñisqachu karqankichej. Qankuna tukuyta wasancharqankichej, qankunatatajrí mana pipis wasanchasorqachejchu. Chaywanpis qankuna thuñiyta tukojtiykichej, qankunatapis thuñillasonqachejtaj. Wasanchayta tukojtiykichej, qankunatapis wasanchallasonqachejtaj.

² Tata Dios, noqaykumanta khuyarikuwayku ari. Noqaykoqa qanllapi atinikuspa suyakuyku. Qanqa sapa paqarin kallpachawayku ari, llakiy p'unchaypipis kacharichiwajniyku kay.

³ Parlasqaykita uyarispa, runakuna ayqenku, qan sayarejtiykikamataj, tukuy suyupis ch'eqerakunku.

⁴ Imaynatachus phinki phinkikuna phuyu jina aywirimuspa, tukuy chajrata tukuykunku, ajinata asiriokunaj awqanku tukuy kapuyninkuta qhechonqa.

⁵ Tata Dios janaj pachapi tiyakushaspapis, pay allin kajwan, justiciawantaj Sionman junt'achin.

⁶ Paymin allin kawsayta qosunkichej, jinallataj yachayta, yuyayta qosonqachej, chantá kacharichillasonqachejtaj. Tata Diosta may jatun respetowan qhawayqa may jina valorniyojpuni.

⁷ Uyariychej imaynatachus wapu kajkuna callekunapi qhaparisqankuta. Uyarillaychejtaj allinyakuyta mask'anapaj kachakunapis sonqo nanayta waqasqankuta.

⁸ Ñankunapis ch'inman tukupun, manaña pipis chayninta purej kanchu. Asiriokunaqa trato ruwasqankutapis p'akinku, testigokunaj ñawpaqenpi imatachus nisqankutapis qhesachanku, manataj pi runatapis jatunpaj qhawankuchu.

⁹ Israel suyu llakisqa, onqosqataj kashan, Libanopis may p'enqaywan qawisqa kashan. Sarón vallepis q'ara pampaman tukupun, Basán jallp'awan, Carmelo jallp'awanqa t'ojrapacha kashan.

¹⁰ Tata Diosrí nin: Kunan sayarikuspa, atiyniyta, kallpaytawan rikuchisaj.

¹¹ Asiriamanta kajkuna, yuyasqaykichejqa paja jinalla, wakichisqaykichejtaj q'opa jinalla. Samayniywan ninawan jina q'olaykuchisqaykichej.

¹² Chaypacha llajtaykichejkunaqa cal chayasqa jina kanqanku. K'utusqa khishka jina ninapi ruphachisqa kanqanku.

¹³ Karupi kajkuna, imatachus ruwasqayta uyariychej, qayllapi kajkunataj atiyniyta rikuychej, nispa.

¹⁴ Juchasapakuna Sionpi mayta kharkatitinku, puraj uyakunatapis t'ukuylla jap'in. Noqanchejmanta pitaj kay q'olaj nina ukhupi kawsanmanri? Pitaj wiñaypaj nina lawraywan khuska tiyakunmanri?

¹⁵ Kay jina runalla chaypi tiyakonqa: Pichus cheqanta ruwaspa kawsan, cheqan kajtataj parlan, pichus runata waqachispa, qolqe jap'inata chejnikun, manataj lluk'ichikunchu, pichus runata wañuchimuna nejtinkupis, ninrinta wisq'aykun, ñawintapis wisq'aykullantaj chay millaykunata mana ruwananpaj ima.

¹⁶ Chay runamin ni imamanta manchachikuspa kawsanqa, pakakunanpis chhankapi jina kanqa. Mikhunanwan, ujyanan yakuwanqa mana tukukonqachu.

¹⁷ Uj kuraj kamachejta atiyninpi sumaj lliphipishajta rikunki, suyuntapis may karukama chayashajta.

¹⁸ Ñawpajta mancha manchalla kawsasqaykimanta yuyarikuspa, sonqoykipi ninki: Maytaj impuestota sik'ejri? Maytaj impuestota pesaj runari? Maytaj torrekunata yupaj runari? nispa.

¹⁹ Manaña chay wapuykachaj runakunata rikunkichu, pikunajtachus parlayninku mana entiendey atina karqa, siminku ukhullapi mana ch'uwata parlasqankurayku, chaykunata.

²⁰ Qhawariy Sionta, maypichus mayta kusikuspa raymita ruwankichej, chay llajtata. Ni imamanta llakikuspa tiyakuna Jerusalén llajtata ñawiyki rikonqa. Chayqa sumaj sayachisqa toldo jina kanqa, watana estacanpis mana sik'ikonqachu, nitaj watananpis p'itikonqachu.

²¹ Tata Diosqa chaypimin tukuy atiyninta rikuchiwasun. Payqa jatun mayu jina kanqa, sumajta rishaj ashkha yaku jinataj. Awqakunaqa chay mayuta mana chimpayta atenqankuchu juch'uy barcowan, nitaj jatun barcowanpis.

²² Tata Diosqa Juezninchej, kamachisqakunatataj churapuwanchej. Tata Diosqa kuraj kamachejninchej. Jinataj pay kikinmin qhespichiwasunchej.

²³ Chay awqaj barconkunaj watananqa llawqheyanqanku. Jatun kaj k'aspintaj mana sumajtachu sayanqa, barcota wayrawan purichinan carpapis llawch'iyallanqataj. Chantá Diospa ayllonqa awqankumanta qhechusqa qhapaj kaynintapis rak'inakonqanku. Cojokunapis maqanakuspa qhechusqankuta jap'illanqankupuni.

²⁴ Mana pipis nenqachu: Onqosqa kani, nispa. Manachayqa Tata Diosqa Sión llajtapi tiyakojkunaj juchankuta pampachanqa.