Isaías 32 - DIOSPA QHELQACHISQ

Cheqan kajta ruwaj kuraj kamachej

¹ Qhawariychej, cheqanta ruwaj kuraj kamachej jamonqa, kamachiyninpi kaj kurajkunapis justiciawan kamachenqanku.

² Chaypacha paykunaqa sapa runapaj wayramanta pakakunapaj jina kanqanku, llojlla para wayramanta pakakunapaj jinataj. Ch'aki jallp'api qarpanapaj larq'a jina kanqanku, jinallataj ch'in pampapi jatun chhankaj llanthun jina.

³ Chayrayku rikojkunaqa sut'ita rikonqanku, jinallataj uyarejkunaj ninrinkupis sumajta uyarenqa.

⁴ Wampu runakunapis yachaywan imatapis ruwanqanku, khakuta parlajkunapis sut'ita parlanqanku.

⁵ Chaypacha wampu runata mana k'acha runa kasqanta nenqankuchu, nitaj ch'awkiyaj runatapis sumaj runapaj qhawanqankuchu.

⁶ Wampu runaqa manakaj imata thawtin, yuyayninpitaj millay imakunata wakichin. Mana allin kajta ruwayllata mask'an, Tata Diospa contrantataj mana allinkunallata parlan. Yarqhasqa kajta mana imayojta, ch'usajllata kacharpayan, yakumanta ch'akichikojmanpis manallataj yakuta jaywarinchu.

⁷ Ch'awka runaqa millayta ruwayman amañasqa. Llullakuspa, ima sajratapis wakichin, jinallatataj llullakuspa, wajcha runakunatapis juchachan, wajcha runa justiciata mañakojtinpis.

⁸ K'acha runarí allin kajtapuni ruwayta yuyan, jinamanta k'acha ruwasqanrayku sinch'ita sayanqa.

Jerusalenmanta warmikunaj contrankupi willay

⁹ Qankuna, allinpi kawsayman amañasqa warmikuna, kay nisqayta uyariwaychej. Ni ima llakiyniyoj warmikuna, kay parlasqayta kasuwaychej.

¹⁰ Qankunaqa mana imamanta llakiyniyoj kashankichej chaypis, uj watamanta jina mancharikuspa kharkatitinkichej, imaraykuchus uva pallaypis tukukaponqa, poqoyta oqhariypis manaña kanqachu.

¹¹ Qankuna, ni imamanta llakikoj warmikuna kharkatitiychej, mana imamanta llakiyniyoj warmikuna, pawichikuychej. K'achitu p'achaykichejta lluch'ukuspa, qhashqa p'achata churakuychej, llakisqa kasqaykichejta rikuchinaykichejpaj.

¹² Qhasqoykichejta takakuspa, sumaj poqoj jallp'aykichejmanta waqaychej, jinallataj uva huertaykichejmantapis.

¹³ Aswan qhepaman aylluypa jallp'anpi khishkawan, ithapalluwan imalla wiñanqanku, jinallataj maypichus manchayta kusirikoj, kanku chay wasikuna thuñisqa kanqanku.

¹⁴ Kuraj kamachejpa wasenqa ch'inpacha saqerpayasqa kanqa, jinallataj chay chhika runayoj llajtapis ch'inpachallataj qhepakonqa. Qhawana torrekuna, pakakuna wasikunapis saqerpayasqa qhepakonqanku. Chaypitaj k'ita burrokunalla sunt'irenqanku, jinallataj uywakuna ima chaypi mikhonqanku.

¹⁵ Chayqa ajina kanqa, Diospa Espíritun patamanta noqanchejman kachamusqa kanankama. Chaypacha ch'innejkuna chajra llank'anaman tukonqa. Sumajta chajra poqonan jallp'akunataj may chhika poqoyniyoj kanqanku.

¹⁶ Ch'innejpi tukuy ima cheqan ruwaylla kanqa, sumajta poqoj jallp'akunapipis justicia ruwayllapuni kanqa.

¹⁷ Chay cheqan kajta ruwaypa poqoynenqa allin kawsay kanqa, apamullanqataj ni imamanta manchachikuyta, wiñaypaj kusiy kawsayta ima.

¹⁸ Aylloyqa ni imamanta llakikuspa tiyakonqa, ni pej ima ninan tiyakunapi, chaypitaj samarikonqa.

¹⁹ Chijchi parapis sach'akunata q'ara k'aspillata saqerparichun chaypis, llajtapis thuñisqa kachun chaypis,

²⁰ qankunaqa kusisqa tiyakunkichej qarpanapaj ashkha yakuyoj tarpuna jallp'api. Burroykichej, wakaykichejwan ima sumaj pastopi michisqa kanqanku.