Isaías 31 - DIOSPA QHELQACHISQ

Egiptopi atinikuy qhasi manakajlla

¹ Ay imallachus kanqa, pikunachus yanapata mask'aspa Egiptoman urayk'unku, chaykunapaj. Paykunaqa Egiptomanta caballokunapi atinikunku, maqanakunapaj ashkha carretakunapi, jinallataj wapu soldadokuna carretata apaychajkunapi ima. Chaywanpis manapuni Israelpa May Llimphu Kaj Diosninku yanapananta mañakunkuchu, nitaj Tata Diosta mask'ankuchu.

² Tata Diosrí yuyayniyoj kasqanman jina ashkha llakiykunata chayachimonqa, imatachus nisqantataj junt'anqapuni. Payqa millayta ruwajkunaj contrankuta oqharikonqa, jinallataj millayta ruwajkunata yanapajkunaj contrankutapis.

³ Egiptomanta kajkunaqa runakunalla kanku manataj dioskunachu. Caballonkunaqa aychallamanta kanku, manataj espirituchu. Chayrayku Tata Dios atiyninwan ñak'arichejtin, pichus yanapaj urmanqa, jinallataj yanapachikojpis. Jinamanta iskayninku ujllapi urmachisqa kanqanku.

⁴ Tata Dios kay jinata niwarqa: Uj león uñanwan ima ovejata wañuchispa, mayta phiñarikun. Michejkuna mancharichinankupaj tantakuspa mayta qhaparejtinkupis, león mana manchachikunchu. Ajinallatataj Tukuy Atiyniyoj Tata Diosqa Sión orqoman israelitakunaj awqankoj contranta maqanakoj urayk'amonqa.

⁵ Imaynatachus p'isqo thapan patata phawaykachaspa irpanta jark'akun, ajinata Tukuy Atiyniyoj Tata Dios Jerusalenta jark'akonqa, jinallataj qhespichenqa, waqaychanqa, kacharichenqataj, nispa.

⁶ Diospa ayllun israelitakuna, Tata Diosman kutirikamuychej ari, pejpa contrantachus oqharikorqankichej, chayman.

⁷ Chay p'unchay chayamojtin, sapa ujniykichej qolqe metalmanta chayrí qorimanta ruwasqa lantiykichejta pampaman choqankichej, mayqenkunatachus juchasapa makiykichejwan ruwakorqankichej, chaykunata.

⁸ Chaypachallataj Asiriaqa maqanakupi tukuchisqa kanqa mana runaj espadanwanchu. Asiriokunaqa maqanakumanta ayqenqanku, sumajta maqanakoj wayna soldadonkunapis wata runapaj apasqa kanqanku.

⁹ Asiriamanta soldadokunaqa sinch'i manchariywan mana kallpayoj rikhurenqanku, kurajninkukunapis maqanakuna wiphalankuta saqerparenqanku mayta manchachikusqankurayku. Tata Dios chayta nin. Sionpi nina lawraynin tiyan, Jerusalenpitaj ruphachina hornon tiyan, chaywan awqankunata ñak'arichinanpaj.