Isaías 30 - DIOSPA QHELQACHISQ

Egipto yanapananta mask'ajkunaj contrankupi willay

¹ Tata Dios ajinata nin: Mana kasukoj wawaykunata may llakiy qhatirenqa, imaraykuchus imatapis wakichikunku mana tapuwaspalla. Paykunaqa wajkunawan tratota ruwakunku mana Espirituypa yuyaychasqallan. Chay jinamantataj juchankoj patanman astawan juchata yapakunku.

² Usqhay usqhayta Egiptoman rerqanku mana noqata tapuriwaspalla, faraonwan yanapachikunankupaj, Egiptoj ojllayninpitaj waqaychasqa kanankupaj.

³ Chayrayku paykunata nini: Faraonpa kallpanman atinikusqaykichejqa p'enqaypi rikhurichisonqachej. Egiptoj ojllayninpi pakakuyta munasqaykichejtaj k'umuykuchisqa kanaykichejpaj kanqa.

⁴ Qankunarayku parlajkunata Soán llajtaman, Janés llajtamanwan kachajtiykichejpis,

⁵ tukuyniykichej p'enqaypi rikhurinkichej chay manakaj suyupi atinikusqaykichejrayku. Egiptoqa mana yanapasonqachejchu, nitaj paykunamanta ima allin kajtapis tarinkichejchu. Manachayqa qankunapaj llakiylla, p'enqayllataj kanqa, nispa.

⁶ Chantá Tata Dios niwarqa: Neguevpi k'ita animalkunamanta kayta sut'inchay: Llakiy ñak'ariy jallp'anejta, maypichus leonkunalla, chantá imaymana nina katarikuna ima tiyan, chaynejta aylloyqa valorniyoj imakunata burrokunapi apanku, qhapaj imankutataj camellokunapi, mana yanapayta atej Egipto suyuman.

⁷ Cheqamanta Egiptoj yanapaynenqa qhasi manakaj. Chayrayku noqaqa chay suyuta sutichani: Ni imapi yanapaj Rajab, nispa.

⁸ Kunanqa jamuy, mosqoypi jina rikusqaykita uj p'anqaman qhelqaykuy, qhepanejman wiñaypaj testigo jina kananpaj.

⁹ Kay runakunaqa mana kasukoj kanku, llullataj, manataj ni imarayku Tata Diospa kamachisqanta uyariyta munankuchu.

¹⁰ Paykunaqa mosqoypi jina sut'inchajkunata ninku: Amaña mosqoypi jina imatapis rikuychejchu, nispa. Jinallataj Diosmanta sut'inchajkunamanpis nillankutaj: Ama cheqan kajtaqa sut'inchawaykuchu, manachayqa misk'illata parlaykuwayku, llullallata willawayku, amataj sut'inchasqaykichejwan q'enaqachiwaykuchu.

¹¹ Ñanmanta t'aqakuychej, cheqan chaki ñantataj saqeychej. Israelpa May Llimphu Kaj Diosninwan amaña uyapurachiwaykuchu, nispa ninku paykunaqa.

¹² Chayrayku Israelpa May Llimphu Kaj Diosnin nin: Qankunaqa kay k'amisqayta qhesachaspa, mana allin ruwaykunapi, millayta ruwaykunapi ima atinikunkichej. Chay millay imakunaman sayasqa kankichej.

¹³ Chayrayku mana yuyayllamanta jatun ñak'ariy qankunata qhatirisonqachej. Qankunaqa thanta perqa urmashajmanña rijch'akunkichej. Chay perqaqa mana yuyasqallamanta urmaykonqa.

¹⁴ Qankuna t'unasqa k'analla jina kankichej. Chay jinatapuni kallpawan phirisqa kasqanrayku, mana uj chhikan k'anallallapis qhepakunchu, q'onchamanta ninata orqhonallapajpis, nitaj yakuta wisinallapajpis, nispa.

¹⁵ Tukuyta Kamachej Tata Dios, Israelpa May Llimphu Kaj Diosnin ajinata Israelta nin: Kutirikamuwaychej qhespichisqa kanaykichejpaj, noqapitaj atinikuychej. Ajinapi mana phutikuspalla, tukuy sonqo atinikuspataj kallpata jap'inkichej, nispa. Qankunatajrí chayta mana munarqankichejchu.

¹⁶ Aswanpis qankuna nerqankichej: Mana qanman chimpayta munaykuchu, aswanpis caballokunapi ayqesqayku, nispa. Arí, ajinatapuni ayqenkichej. Chaymantá nillarqankichejtaj: Sumajta correj carretakunaman wicharisqayku, nispa. Arí, chaywanpis qankunata qhatiykojkunaqa imata jina taripasonqachej.

¹⁷ Uj runa manchachejtillan, waranqa runakuna ayqekunkichej. Phishqa awqakunata rikuspataj, tukuyniykichej ayqerikapunkichej, orqo patapi uj sapan sayashaj k'aspi jinalla qhepakunaykichejkama, chayrí ch'in lomapi uj wiphala jinalla, nispa.

Tata Diosqa Israelmanta khuyakonqa

¹⁸ Chaywanpis Tata Dios qankunaman khuyakuyninta, munakuyninta ima rikuchinasuykichejpaj suyashasunkichej, imaraykuchus payqa cheqanta ruwaj Diosmin. Pay yanapananta tukuy suyakojkunaqa may kusikuyniyojmin kanqanku.

¹⁹ Sionmanta runakuna, pikunachus Jerusalén llajtapi tiyakushankichej, qankuna manaña astawan waqankichejchu. Khuyakoj Tata Dios yanapananta mañakusqaykichejta uyarisonqachejpacha.

²⁰ Tukuyta Kamachej Dios qankunaman ñak'arinata mikhuchishaspapis, jinallataj llakiyta yakuta jina ujyachishaspapis, payqa qankunallawanpuni kanqa yachachisunaykichejpaj. Yachachisojniykichejtaqa kikin ñawiykichejwan rikunkichej.

²¹ Chantaqa lloq'eman chayrí pañaman rejtiykichejpis, kayta nishajta uyarinkichej: Kaymin cheqan ñanqa. Mana pantaykuspa chayninta riychej, nispa nejta.

²² Chantá qhesachankichej qolqe metalmanta ruwasqa lantiykichejta, jinallataj qoriwan lluch'isqa lantiykichejtapis. Qankunaqa chaykunata millay ch'ichi thantata jina qhawankichej, ninkichejtaj: Llojsiychej kaymanta, nispa.

²³ Chaypacha Tata Dios parachimonqa tarpuna tiempopi, chay tarpusqaykichejtaj sumajta poqonqa. Uywaykichejpis sumaj q'omer pampakunapi michisqa kanqanku.

²⁴ Chaypacha llank'aj bueyniykichejkuna, burroykichejkuna ima jorkawan sumaj wayrachisqa granota mikhonqanku.

²⁵ Maypachachus manchay wañuchinaku p'unchay awqaykichejpaj chayamonqa, torrekunataj urmaranqanku chaypacha, jatuchaj orqokunapi, jatuchaj lomakunapi ima yaku mayu jina phajcharimonqa.

²⁶ Chaypacha killaj k'anchaynenqa intej k'anchaynin jina kanqa. Inteqa k'anchasqanmanta qanchis jinatawan jina k'anchanqa, qanchis intikunapis ujllapi k'anchamushanman jina. Chaypachallataj Tata Diosqa ayllunpa k'irisqanta jampenqa, mayqenkunatachus payllataj k'iriykorqa, chayta.

Asiria suyupaj jasut'i kanqa

²⁷ Tata Diosqa karumantapacha jamushan, k'araj phiñakuynintaj lawrarispa, yanata q'oshñirishan. Simenqa manchay phiñakuywan junt'a kashan, qalluntaj q'olaykoj nina jina.

²⁸ Paypa samaynenqa yaku mayu llump'irishaj jina kanqa, awqankunaj kunkankukama chayaj jina. Payqa waj suyukunaman yugota churan, paykunata chinkayman pusananpaj. Jinallataj tukuy suyumanta runakunaj siminkuman frenota churanqa, paykunata pantachinanpaj.

²⁹ Qankuna Diospa ayllunmanta kajkunapajrí takiykuna kanqa, Pascua jatun raymi ch'isipi jina. Sonqoykichejqa kusisqa kanqa, imaynatachus qenata tocarej runaqa israelitakunata Tata Diospa orqonman kusiywan pusan israelitakunaj pakakunanku Tata Diosta jatunchanankupaj, ajina.

³⁰ Chaypacha Tata Dios jatunmanta parlasqanta uyarichenqa. Atiyniyoj makinwan k'araj phiñakuyninta rikuchenqa manchayta q'olarparej ninawan, chantá llojlla parawan, manchay muyoj wayrawan, jatuchaj rumi jina chijchi parawan ima. Ajinamanta pay atiyninta rikuchenqa.

³¹ Tata Diospa parlasqanta uyarispa, Asiriamanta runakuna manchachikuywan kharkatitenqanku, imaraykuchus yachanqanku ima jasut'ichus paykunata qhatirinanta.

³² Asiriata Tata Dios sapa seq'ojtin, israelitakuna panderetakunawan, arpakunawan ima kusikonqanku. Ajinata Tata Dios asiriokunata sinch'ita jasut'enqa.

³³ Unaymantapacha Asiria llajtayojkunapaj, kuraj kamachejninkupajwan ima, Tofet nisqa q'olachina cheqa wakichisqa kashan, manchay jatun, ukhutaj, ashkha llant'ayoj, ninayoj ima. Chaymantaj Tata Diosqa azufre mayuta jina samayninwan jap'iykuchenqa.