Isaías 29 - DIOSPA QHELQACHISQ

Jerusalén llajtaj contranpi sut'inchay

¹ Tata Dios ajinata nerqa: Ay, qanmanta Ariel, Ariel, Davidpa jarakunan llajta. Watamanta wata raymikunata ruwallaychej.

² Chaywanpis noqaqa Arielta llakiywan mat'iykusaj, chaypitaj llakiy, waqay ima kanqa. Chay llajta lawrarenqa imaynatachus uywata ñak'aspa, altarpi noqapaj q'olachipuwanku, ajinata.

³ Qanpa contraykita soldadoykunawan muyuykuchisqayki. Perqata wasaykunankupaj torrekunata muyuyninpi sayaykuchisaj, contraykipitaj sumaj phatu perqaykita wasarinankupaj jallp'a moqota ruwachisaj.

⁴ Chantá k'umuykuchisqa kaspa, ukhu pachamanta parlamunki, parlasqaykitaj ñut'u jallp'a ukhumanta uyarikonqa. Parlasqaykeqa almaj parlasqan jina kanqa, jallp'a ukhumantataj chhichimonqa.

⁵ Chantá awqaykunapis ñut'u jallp'a jina ñut'usqa kallanqankutaj. Manchay kallpawan contraykita jamojkuna wayrawan apachikoj q'opa jina apaykachasqa kanqanku. Mana yuyasqallamanta ujllata

⁶ noqa Tukuy Atiyniyoj Tata Dios paykunata jasut'isaj, qhon qhonkunawan, jallp'a ikhakuywan, manchay ch'ajwawan, sinch'i wayrawan, llojlla parawan, tukuyta q'olaj ninawan ima.

⁷ Tukuy suyumanta chay chhika runakuna Arielwan maqanakusqankoqa mosqoypi jinalla kanqa. Arielpa contranta tukuy maqanakojkuna, chantá pakakunan wasinta urmachejkuna, jinallataj llakiyman churajkunapis mosqoypi jinalla chinkaponqanku.

⁸ Yarqhasqa runa mosqoynillanpi mikhuspa, yarqhasqa rijch'arin. Jinallataj mosqoynillanpi manchayta yakumanta ch'akichikuspa yakuta ujyan. Chaywanpis may ch'akisqa, siminpis may pharalla rijch'arin. Ajinallataj kanqa chay chhika runakuna Sión orqoj contranta maqanakojkunawanqa.

Israelitakunaj puraj uya kayninku

⁹ Israelitakuna, wampullapuni kaychej, ñawsakuna jinataj ama imata rikuychejchu. Machasqa jina chankaykachallaychejpuni, mana machachej ujyanata ujyashaspapis.

¹⁰ Noqa Tata Dios qankunaman uj sinch'i puñuyta apachimuykichej. Noqamanta sut'inchajniykichejtapis puñurparichini, ñawinkuta velowan jina qhataykuspa.

¹¹ Mosqoypi jina tukuy rikuykunaqa qankunapaj wisq'aykusqa p'anqa jina. Chayta pichus ñawirejman jaywaspa, ninkichej: Kayta ñawiriy, nispa. Paytajrí kutichisonqachej: Mana ñawiriyta atinichu wisq'asqa kasqanrayku, nispa.

¹² Sitajchus mana ñawiriyta yachajman jaywaspa niwajchej: Ñawiriy kayta, nispa chayqa, paytaj kutichisunkichejman: Mana ñawiriyta yachanichu, nispa.

¹³ Tukuyta Kamachej Diostaj nin: Kay runakunaqa simillankuwan jatunchawanku, simillamanta yupaychawanku, sonqonkutajrí noqamanta karupi kashan. Noqata yupaychawasqankoqa runaj wakichisqallan, mayqentachus runakunalla yachachinku, chay.

¹⁴ Chayrayku noqaqa jatuchaj t'ukuna imakunata ruwaspa, kay runakunata t'ukushajta saqesaj. Yachayniyoj runankoj yachayninkoqa chinkaponqa, jinallataj yuyaysapaj yuyayninpis manaña kanqachu, nispa.

¹⁵ Ay Tata Diosmanta pakakojkuna, pikunachus wakichisqankuta mana rejsichiyta munankuchu. Imatapis pakayllapi ruwaspa, sonqonku ukhupi ninku: Mana pipis rikuwanchejchu, manataj reparawanchejchu, nispa.

¹⁶ Chay jina wampu kanaykichejri. Mankata ruwajtaqa t'uruta jinalla qhawankichej. T'urumanta ruwasqa imaqa ruwajninta ninmanchu: Mana qanchu ruwawanki, nispa? Ruwasqan p'uñoqa ruwajninta ninmanchu: Mana yachankichu imatachus ruwasqaykita, nispa?

Israel kacharichisqa kanqa

¹⁷ Uj pisimantawan Líbano orqopi kaj monteqa sumaj llank'ana jallp'aman tukonqa. Llank'ana jallp'apis sach'araraman tukonqa.

¹⁸ Chaypacha pipis p'anqata sinch'ita ñawirejtin, joq'arakuna uyarenqanku. Ñawsakunapis laqha ukhupi kaspa, sut'ita rikonqanku.

¹⁹ Tata Diosqa llamp'u sonqoyojkunata mayta kusichenqa, aswan wajcha kajkunapis Israelpa May Llimphu Kaj Diosninkurayku maytapuni kusikonqanku.

²⁰ Kallpankuman atinisqa tukuy ñak'arichejkuna tukukaponqanku, alqochakojkunapis chinkachisqa kanqanku. Millayta ruwayta tukuy munajkunapis chinkachisqallataj kanqanku.

²¹ Mana juchayojta tumpaspa llulla juezkunapis chinkanqanku, jinallataj mana juchayojta imaymana llullakuywan ch'awkiyajkuna, chantá mana cheqan justiciata ruwajkunapis, tukuyninku chinkarparichisqa kanqanku.

²² Chayrayku pichus Abrahamta qhespichej Tata Diosqa Jacobpa mirayninta nin: Kunanmanta ñawpajman Jacobqa manaña p'enqachisqachu kanqa, manataj uyanpis mancharikuywan q'elluyanqachu.

²³ Chantá chay chhika wawankukunapaj imatachus ruwasqayta rikuspa, paykuna noqata May Llimphu Kaj Diospaj rejsikapuwanqanku. Noqata may jatunpaj qhawawanqanku. Jinallataj may jatun respetowan qhawawanqanku, Jacobpa May Llimphu Kaj Diosnin kasqayrayku.

²⁴ Chaypacha pantasqa kajkunaqa yachayniyojman tukonqanku, thutojkunapis Diosmanta yachaqakonqanku, nispa.