Isaías 28 - DIOSPA QHELQACHISQ

Samaria suyoj contranpi sut'inchay

¹ Ay, Samaria llajtamanta, qanqa Efraín suyupi machajkunaj uma oqharinan llajta kanki, qawisqa t'ika pilluwan jina k'achanchasqa. Sumaj vallepi kaspapis, vinoj atipasqan llajta kanki.

² Tukuyta Kamachej Dios kallpasapa soldadokunata kachamonqa. Paykunaqa chijchi para jina, sinch'i wayra jinataj jamonqanku, jinallataj loco para jina, ashkha yaku llump'imoj jinataj. Chantá tukuy kallpankuwan Samariata pampaman ch'allpanqanku.

³ Chay runaykachaj Samaria llajta, Israel suyupi machajkunaj uma oqharinan llajta, awqannejta sarurparisqa kanqa.

⁴ Sumaj valle patapi kaj, qawisqa t'ikakunawan k'achanchasqa kajqa, higoj mishkha poqoynin jina kanqa. Chayta pillapis rikuytawan, makinwan p'itispa mikhukaponqa.

⁵ Chaypacha Tukuy Atiyniyoj Tata Dios israelitakunamanta puchojkunapaj may sumaj lliphipishaj k'achanchasqa pillu jina kanqa.

⁶ Jinallataj juezkunata yuyaychanqa justiciata ruwanankupaj. Llajta punkupi awqakunaman sayaykoj soldadokunatapis kallpachanqa.

Tata Diosqa Jerusalenta jasut'inanta nin

⁷ Chaywanpis kunan sacerdotekuna, Diosmanta sut'inchajkunapis vinowan machasqa thampiykachanku, tragowan machasqa yuyay chinkasqa kashanku, vino ujyasqankuwantaj chankaykachanku. Imatachus mosqoypi jina rikusqankuta pantasqata rikunku. Justiciata ruwananku kashajtinpis, paykunaqa machasqa kashanku.

⁸ Mesankupis millay lansaykukusqankuwan junt'a kashan, nitaj uj cheqallapis llimphu kanchu.

⁹ Paykunaqa Tata Diosmanta ninku: Pay yachachinawanchejpajchu jamun? Tata Dios imatachus nisqan chayta yachachiyta munawanchejchu, ñuñumanta p'itisqallarajpis kasunman jinata?

¹⁰ Kutin kutinta chayllatapuni parlawanchej. Watejmanta watej, pisimanta pisi, aqó aqó niytapis kunallanraj yachakushasunmanpis jinata yachachiwanchej, nispa.

¹¹ Chayrayku kay suyupi tiyakojkuna mana kasukojtinku, Tata Diosqa khaku parlajkunaj parlayninkupi, mana rejsisqa parlaypitaj paykunaman yachachenqa.

¹² Paykunaman Dios nisqaña: Kaypi samarikuy tiyan, sayk'usqa kajkunaqa samarikuchunku, nispa. Paykunatajrí mana kasorqankuchu.

¹³ Chayrayku Tata Diosqa juch'uy wawakunaman jina paykunaman parlanqa. Kutin kutinta, kikin simikunallawan, uj k'ata parlayllatapuni yachachenqa. Watejmanta watej, pisimanta pisi, aqó aqó niytapis willallanqataj. Paykunatajrí wawa jina purishaspa, wasamanta wijch'ukonqanku, chaypitaj k'iriykukonqanku, tojllaman urmaspataj, ch'ipasqa qhepakonqanku.

¹⁴ Chayrayku Tata Diospa nisqanta uyariychej, alqochakoj runakuna, Jerusalenta kamachejkuna:

¹⁵ Qankuna nisqankichej: Uj tratota wañuywan ruwayku, ukhu pachawantaj tratoyoj kayku. Manchay jasut'iy jamojtinpis, mana chayamuwasqaykuchu, imaraykuchus llullakuypi pakakuyku, jinallataj ch'awkiyaypipis, nispa.

¹⁶ Chayrayku Tukuyta Kamachej Tata Dios nin: Sión orqopi uj rumita churani, sumaj ajllasqa rumi cimiento sumaj kananpaj. Pichus chaypi atinikojqa mana kuyurispa sayallanqapuni.

¹⁷ Justiciataqa plomadata jina churasaj, cheqan kajtataj hilota jina churasaj, nispa. Chantá llullakuypi pakakunaykichejta chijchi para chinkachenqa, ch'awkiyaypi pakakunaykichej cheqatapis yaku apakaponqa.

¹⁸ Wañuywan trato ruwasqaykichejqa chinkachisqa kanqa. Ukhu pachawan tratoyoj kasqaykichejpis mana sayanqachu. Manchachikuna jasut'i chayarparimuytawan, qankunata p'ampaykusonqachej.

¹⁹ Sapa kuti jamojtintaj, qankuna apasqa kankichej, ajinata ch'isin paqarin sapa p'unchay jamonqa. Chayta uyarispallaraj, runakuna manchayta kharkatitenqanku.

²⁰ Chay kanqa uj juch'uy puñunapi winkuykuwajchej jina, uj juch'uy qhatanawanpis qhatakuwajchej jinataj.

²¹ Tata Dios jamonqa, imaynatachus Perasín orqopi filisteokunaj contranta jamorqa, ajinata. Imaynatatajchus Gabaón vallepi amorreokunapaj phiñakorqa, ajinallataj mayta phiñakonqa. Imatachus kunankama mana ruwasqanta, chay t'ukuna ruwanata ruwananpaj jamonqa.

²² Chayrayku amaña alqochakuychejchu. Pajtataj, imawanchus watasqa kashankichej, chaywan astawan mat'iykusunkichejman. Tukuy Atiyniyoj Tata Dios kay pachata chinkarparichinanta uyarini.

²³ Sumajta uyariychej. Imatachus nisqayta allinta uyariwaychej. Sumajta unancharispa, parlasqayta uyariychej.

²⁴ Jallp'ata llank'ajqa llank'allanpunichu mana tarpuspari? K'urpatapis wajtallanqapunichu mana tarpuspari?

²⁵ Ajinata jallp'ata sumajta wakichiytawan, manachu chayman anista, chayrí cominotapis t'akan? Chayrí manachu chay wakichisqa jallp'aman trigota t'akan, kantunmantaj cebadata, avenatawan?

²⁶ Tarpojqa imatachus ruwananta sumajta yachan, imaraykuchus Diosmin payman yachachin imaynatachus ruwananta.

²⁷ Anistaqa mana trigo jina trillanachu, cominotapis carretaj ruedanwan mana saruchinachu. Manachayqa anista, cominotawanqa ñañu k'aspiwan wajtaspalla oqharina.

²⁸ Trigota trillaspa oqharina chaypis, mana trillaspallapunichu kana. Carretaj ruedan sarojtenqa, grano t'akakun, chaywanpis mana p'akirakunchu.

²⁹ Chay tukuy imamanta yachayqa Tukuy Atiyniyoj Tata Diosmanta jamun. Paypa wakichisqanqa t'ukuna, yachaynintaj may jatun.