Isaías 27 - DIOSPA QHELQACHISQ

Israelitakuna kacharichisqa kanqanku

¹ Chay p'unchaypi Tata Diosqa jatun, manchay atiyniyoj espadanwan Leviatán sierpeta jasut'enqa, may jinata suchoj, ch'uwirakoj Leviatán sierpeta, mayqenchus mama qochapi tiyakun, chayta.

² Chaypacha Tata Dios nenqa: Sumaj misk'ita poqoj uva huertamanta takirikuychej.

³ Noqa Tata Dios chay huertata qhawani, sapa kutitaj qarpani. Tuta p'unchay waqaychani, ama pipis imanananpaj.

⁴ Chay huertapaj manaña phiñasqachu kani. Chaywanpis sichus chaypi khishka, chayrí qhora kanman chayqa, noqa chayta t'iraytawan, saruyman, ruphachiymantaj.

⁵ Sichus pipis chaymanta waqaychasqa kayta munanman chayqa, noqawan allinyakuchun. Arí, noqawan allinpi kawsakuchun, nispa.

⁶ Qhepa p'unchaykunaman Jacobqa sumajta saphinchakonqa. Ajinamanta Israelqa ijispa t'ikanqa, poqoynintaj tukuy kay pachaman junt'aykonqa.

⁷ Tata Diosqa Israelta jasut'in. Chaywanpis imaynatachus ñak'arichejkunata jasut'erqa, mana ajinallatatajchu Israelta jasut'enqa. Mana israelitakunata wañuchenqachu, imaynatachus Israelta wañuchejkunata wañucherqa, ajinataqa.

⁸ Chaywanpis Dios ayllunta karu suyuman wijch'uspa jasut'in. Payqa manchachikuna samayninwan paykunata wijch'un, inti llojsimuynejmanta sinch'i wayrawan jina.

⁹ Ajinamanta Jacobpa millay ruwasqan pampachasqa kanqa. Chay runakunaj juchanku pampachasqa kasqanmantataj paykuna kayta ruwanqanku: Lantikunaj altarninkoj tukuy ruminta, cal rumita jina ñut'usqata ruwanqanku. Lanti Asera k'ullukunatapis manaña sayajta saqenqankuchu, nitaj lantiman inciensota q'oshñichina altarkunatapis.

¹⁰ Cheqapuni sumaj jark'achasqa llajtaqa ch'inpacha laqayalla qhepakun, ch'usajpacha, mana imayoj, nitaj runayoj. Manachayqa uywata michinallapajña kanqa. Chaypi uywakuna sach'aj thansanta mikhonqanku, llanthunpitaj winkurispa samarikonqanku.

¹¹ Samariapi tiyakojkunaqa ch'aki sach'a jina kanku, mayqentachus warmikuna pallaytawan, q'onchapi ninaman enqhanku wayk'unankupaj, ajina. Israelitakunapis wampu mana yuyayniyoj kanku. Chayrayku paykunata Ruwajqa mana paykunamanta khuyakonqachu, manataj sonqontapis nanachikonqachu.

¹² Chay p'unchaypi Tata Dios erapi trigota jina trillanqa, Éufrates mayumantapacha Egipto mayukama. Chantá Israelpa miraynin kajkunata ujmanta uj pallaspa, tantanqa.

¹³ Chaypacha jatun trompetata waqachenqanku. Chantá Asiriapi ch'eqerasqa kajkuna jamponqanku, jinallataj Egiptoman wijch'usqa kajkunapis. Chayamuspataj, Jerusalenpi kaj Diospaj t'aqasqa orqopi Tata Diosta yupaychanqanku.