Isaías 26 - DIOSPA QHELQACHISQ

Tata Diospa yanapayninmanta takiy

¹ Chay p'unchaypi kay takiyta Judá suyupi takenqanku: Kunanqa perqawan sumaj jark'achasqa llajta tiyapuwanchej. Tata Dios qhespichinawanchejpaj jatuchaj perqakunata sayarichipuwarqanchej.

² Kunantaj chay llajtaj punkunkunata kichariychej, chayninta cheqan runakuna yaykunankupaj, pikunachus Diosta mana wasanchankuchu, chaykuna.

³ Tata Dios, pichus qanpi sonqonta churajta sonqon tiyaykunanta ruwanki, imaraykuchus pay qanpipuni atinikun.

⁴ Wiñaypaj Tata Diosllapipuni atinikuychej, imaraykuchus payllamin wiñaypaj pakakunanchej chhankaqa.

⁵ Payqa mayta runaykachajkunata urmachin. Mayta jatunchakoj llajtata k'umuykuchin pampaman tukunankama.

⁶ Ajinamanta tukuy wajcha runakuna, llakisqa kajkuna ima chay llajtata saruranqanku, nispa.

⁷ Cheqan runaj ñannenqa cheqanpuni. Qantaj, Cheqan Kaj Tata Dios, cheqan runaj ñanninta pichanki.

⁸ Noqaykoqa Tata Dios, mana manchachikuspa kashayku, kamachisqayki ñanta rikuchiwasqaykuta purispa. Tukuy sonqo qanllapi yuyayta munayku.

⁹ Ch'isenqa tukuy sonqo qanllapi yuyani, sut'iyaytataj tukuy munakuyniywan mask'ayki. Qan kay pachapi justiciata ruwajtiyki, kay pachapi runakuna yachanqanku imachus cheqan justicia kasqanta.

¹⁰ Chaywanpis sichus millayta ruwajkunata khuyanki chayqa, paykuna mana yachaqakunkuchu imachus cheqan kajta. Allinta ruwaj runakunaj suyunpi kashaspapis, paykunaqa millayllatapuni ruwanku, Tata Diospa jatun kaynintataj mana cuentaman churankuchu.

¹¹ Tata Dios, qanqa ñapis paykunata jasut'inaykipajña kashanki, paykunatajrí mana reparakunkuchu. Chay aylluykipaj munakuyniykita rikuspa, millayta ruwajkuna p'enqaypi rikhurichunku, k'araj phiñakuyniykej lawraynintaj awqaykikunata tukuchichun.

¹² Tata Dios, qanlla allin kawsayta qowasqayku, kunankama tukuy ima tarisqaykutapis qanllataj qowayku.

¹³ Tata Diosniyku, qan kamachinawaykutaqa waj runakunalla munayninkuman jina kamachiwayku. Chaywanpis qanllata Diosniykupaj rejsikapuyku.

¹⁴ Ñawpajpi pikunaj makinkupichus karqayku, chaykuna wañusqaña kanku, manataj ujtawan kawsarimonqankuchu. Paykunaqa llanthu jina kanku. Manañataj ujtawan jatarimonqankuchu, imaraykuchus qan paykunata jasut'erqanki, chinkacherqankitaj. Paykunamanta yuyarikunatapis chinkachillarqankitaj.

¹⁵ Qan, Tata Dios, kay suyuykuta jatunyacherqanki, sutiyki jatunchasqa kananpaj. Kay suyuykoj mojonninkunatapis aswan jaqayman churarqanki.

¹⁶ Tata Dios, may jina llakiypi rikhurispa, noqayku qanta mask'asorqayku. Allin ñanman churayta munaspa ñak'arichiwashajtiyku, qantapuni mask'arqayku.

¹⁷ Imaynatachus wijsayoj warmej paqarichikunan chayamojtin, nanaywan mayta q'ewiykachakuspa qhaparikun, ajinallatataj Tata Dios, noqaykupis ñawpaqeykipi karqayku.

¹⁸ Paqarichikoj warmi imaynatachus nanaywan q'ewiykachakun, ajinallatataj noqaykupis q'ewiykachakuyku. Chaywanpis wayrallata paqarichikorqayku. Mana kay suyuykuta kacharichiyta aterqaykuchu, nitaj runakunata paqaricherqaykuchu kay pachapi tiyaykunankupaj.

¹⁹ Chaywanpis aswan qhepaman llajtaykumanta wañusqakuna kawsarimponqanku, ayankupis sayarimponqanku. Jallp'a ukhupi puñojkunaqa rijch'arimonqanku, kusiywantaj qhaparenqanku, imaraykuchus qanqa k'anchayta chhullata jina apachimunki. Chantá wañusqakunaqa jallp'a ukhumanta p'utumonqanku.

²⁰ Kunanqa, aylluymanta kajkuna, rispa, wasiykichejman yaykuychej, punkuykichejtataj wisq'akamuychej. Chaypitaj uj pisita pakakuychej Tata Diospa k'araj phiñakuynin tukukunankama.

²¹ Qhawaychej, Tata Diosqa tiyakunanmanta llojsimonqa, kay pachapi tiyakojkunata juchankumanta jasut'inanpaj. Chaypacha jallp'aqa manaña wañuchisqakunata pakanqachu, manachayqa patanpi yawar jich'asqankuta rikuchenqa. Manañataj wañuchisqa kajkunatapis pakayta atenqachu.