Isaías 25 - DIOSPA QHELQACHISQ

Tata Diosta yupaychanapaj takiy

¹ Tata Dios, qanmin Diosniy kanki. Sutiykita pataman oqharispa jatunchasqayki, yupaychasqaykitaj, imaraykuchus qanmin t'ukuna imakunata ruwarqanki. Chaykunata unaymantapacha wakicherqanki, kunantaj chayta junt'arqanki.

² Jatun llajtakunata rumi loqhoman tukuchinki, perqawan sumaj jark'achasqa llajtakunatataj laqayaman tukuchinki. Awqakunaj k'achitu kamachinanku wasikunata thuñinki, chaykunatataj manaña pipis ujtawan watej sayachenqachu.

³ Chayrayku may jina kallpasapa suyukuna jatunchasonqanku, may jina manchana atiyniyoj llajtakunapis manchachikusonqanku.

⁴ Wajchakunapajrí qan pakakunanku kanki, llakisqa pisichikojpaj jark'akojnintaj. Jinallataj para wayramanta waqaychaj kanki, ruphaymanta llanthojtaj. Ajina kanki, imaraykuchus mana khuyakuyniyojkunaj ruwasqanku rijch'akun, chiri tiempopi loco para imaynatachus perqata wajtan, ajinaman.

⁵ Chayrí q'ara pampapi ruphayman rijch'akunki. Chaywanpis qanqa millay awqaykukunaj ch'ajwasqankuta ch'inyachinki. Imaynatachus phuyu llanthunwan ruphayta chiriyachin, ajinata manchachikuna atiyniyoj runakunata ch'inyachinki.

⁶ Chaypachataj Tukuy Atiyniyoj Dios Sión orqopi tukuy suyupaj jatun mikhuyta wakichenqa misk'i mikhuykunawan, sumaj kaj vinowan ima. Chantá sumaj kaj aycha mat'akunata mikhuchenqa, aswan sumaj poqosqa vinotawan ujyachenqa.

⁷ Kay orqopi payqa llakiyninkuta phuyuta jina picharenqa, jinallataj kay tukuy suyupi wañuypa llanthunta chinkachenqa.

⁸ Tukuyta Kamachej Tata Diosqa wañuyta wiñaypaj chinkachenqa, tukuypa waqaynintataj pichanqa. Ayllunpa mana allinpaj qhawasqa kayninkutapis tukuy kay pachamanta chinkachillanqataj. Ajinata Tata Diosqa nin.

⁹ Chaypacha tukuy runakuna nenqanku: Qhawaychej, kaymin Diosninchejqa, paypi atinikunachej, paytaj kacharichiwasun. Kaymin Tata Dios, pipichus atinikorqanchej, chay. Kunanqa qhespichiwasqanchejmanta jatun kusiywan kusikunachej, nispa.

¹⁰ Tata Dios makinwan Sión orqota waqaychanqa, Moab suyutatajrí pachanpi sarurparenqa, imaynatachus pajata q'opata jich'anapi sarunku, ajinata.

¹¹ Moabqa puraj makinta jaywarenqa, imaynatachus yakupi wayt'aj runa makinta jaywarakun, ajinata. Diostajrí jatunchakuyninta k'umuykuchenqa, jinallataj makinpa kallpantapis tukuchenqa.

¹² Diosqa chay chhikachaj jark'akuna sinch'i perqankunata urmachenqa, pampaman tukunankama jallp'aman wijch'onqa.