Isaías 24 - DIOSPA QHELQACHISQ

Tata Dios kay pachata juzganqa

¹ Tata Dios kay pachata ch'usajllata, q'arallatataj saqenqa. Jallp'a patata t'ustirparenqa, chaypi tiyakojkunatataj ch'eqerachenqa.

² Chay ñak'areyqa tukuypaj kanqa: Tukuy runapaj jinallataj sacerdotekunapajpis, kamachipaj jinallataj patronpajpis, warmi kamachipaj jinallataj patronapajpis, rantikojpaj jinallataj vendejpajpis, qolqeta manojpaj jinallataj manukojpajpis, interesniyojta manojpaj jinallataj manukojpajpis.

³ Jallp'aqa ch'usajpacha tukuy iman suwasqa kanqa. Chaytaqa Tata Diospuni nin.

⁴ Jallp'aqa ch'akipun, chaypi kajtaj qawishan. Kay pacha onqospa umphushan. Kay pachapi jatunpaj qhawasqa runakunapis ñak'arishallankutaj.

⁵ Kay pachaqa chaypi tiyakojkunanejta ch'ichichasqa, imaraykuchus yachachisqanta mana junt'ankuchu, nitaj Tata Diospa kamachisqankunata kasunkuchu, wiñaypaj ruwasqa tratotapis p'akillankutaj.

⁶ Chayrayku maldicionqa kay pachata tukuchin, chaypi tiyakojkunapis juchachasqapuni kananku tiyan. Chaynejta kay pachapi tiyakojkunaqa pisiyachisqa kanqanku. Jinamanta pisillaña qhepakonqanku.

⁷ Vinoqa pisiyan, uva sach'akunatapis onqoyta jap'irparin, tukuy kusisqa kawsajkunataj mayta llakikushanku.

⁸ Panderetakunata, arpakunatawan tocaspa kusikojkuna ch'inyapunku, kawsaqenkuwan mayta ch'ajwaspa kusikojkunapis ch'inyapullankutaj.

⁹ Raymipi vino ujyanapis tukukun, machachina ujyanakunapis jayaman tukun.

¹⁰ Chay t'ustisqa llajtaqa ch'inpacha. Tukuy wasikuna llavewan wisq'asqa ama pipis yaykunanpaj.

¹¹ Runakunaqa tukuy callekunapi mana vino kasqanmanta waqashanku. Tukuy kusiyninkutaj llakiyman tukun. Kusikoyqa kay pachamanta qhechusqa.

¹² Llajtaqa laqayaman tukun, llajtaj jatun punkunkunapis phirisqallataj.

¹³ Chay ñak'areyqa ajinapuni kanqa kay pachapi kaj chhika suyukunapi. Chayrayku pisilla puchonqanku, imaynatachus olivo poqoyta k'aspiwan thallanku, chayrí poqoy pasayta uva puchojta chajmanku, ajina kanqa.

¹⁴ Chaywanpis chay ñak'ariymanta puchojkuna manchay kusiywan jatunmanta qhaparenqanku. Tata Diospa may jina jatun kayninta rikuspa, inti yaykuynejmantapacha takenqanku.

¹⁵ Inti llojsimuynejpi jallp'akunapipis Tata Diosta jatunchaychej ari. Israelpa Tata Diosninpa sutinta mama qochaj tukuy kantunpipis pataman oqhariychej.

¹⁶ Kay pachaj k'uchunmantapacha takejkunata uyariyku: Cheqan Kaj jatunchasqa kachun, nispa nejta. Noqatajrí nerqani: May llakisqa kashani, sonqoypis llakiywan phatashanña, imaraykuchus tukuy kay pacha wasanchaj runakunawan junt'a kashan.

¹⁷ Kay pachapi tiyakojkuna, qankunapaj manchachikuy wakichisqa kashan, t'oqoman urmaykuna, tojllapi jarap'asqa kay ima.

¹⁸ Pichus manchachikuymanta ayqejqa t'oqoman urmaykonqa. T'oqomanta llojsimojtaj tojllapi jarap'asqa rikhurenqa. Janajmanta jatun para urmamonqa, kay pachaj sonqontaj ikhakonqa.

¹⁹ Kay pacha manchaytapuni kharkatitenqa, lajrakonqataj, chay jinatapuni thalakusqanpitaj phirikonqa.

²⁰ Kay pachaqa machasqa runa jina chankaykachanqa, wayraj phukusqan ch'ujlla jinataj kaynejman jaqaynejman wajtaykachakonqa. Diospa contranta oqharikuspa juchallikusqanqa kay pachata manchaytapuni llasaykonqa urmachinankama, manañataj ujtawan sayarenqachu.

²¹ Chaypacha Tata Diosqa janaj pachapi atiyniyojkunata jasut'enqa, jinallataj kay pachapi kaj kuraj kamachejkunatapis.

²² Ujllaman tantaykuspa, paykunata wisq'aykonqa, chaypitaj wisq'asqa qhepakonqanku. Unaymanta orqhomuspatajrí, paykunata jasut'enqa.

²³ Jerusalenpi, jinataj Sión orqopi Tukuy Atiyniyoj Tata Dios kamachiyta qallarejtin, intiwan, killawan p'enqakuspa laqhayaykonqanku. Chay llajtamanta kurajkunataj Tata Diospa jatun kayninpa lliphipiyninta rikonqanku.