Isaías 23 - DIOSPA QHELQACHISQ

Tiro llajtaj contranpi sut'inchay

¹ Tiro llajtaj contranpi Isaías kay jinata nerqa: Tarsismanta barcota purichejkuna, waqaychej, imaraykuchus Tiroj barco sayachina cheqawan, wasinkunawan ima thuñisqa kashanku. Chayrayku barcokuna ni mayman chayanankupaj kanchu. Quitín suyumantapacha chayta willamunku.

² Tiropi kaj runakuna, ch'inlla kaychej, jinallataj Sidonmanta ranqherokunapis, pikunapajchus barcokunapi tukuy imata apamoj kanku, chaykuna.

³ Mama qochanejta paykuna Sijormanta granota apamoj kanku, jinallataj chajra poqoytapis Nilo mayu kantupi jallp'akunamanta. Chaywantaj Tiromanta runakuna qhapajyaj kanku, chaypitaj tukuy suyu qhatoj kanku.

⁴ Qanrí Sidón llajta, p'enqakuy ari, mama qochapi jark'achasqa llajta, imaraykuchus mama qocha nin: Kunan mana wawayoj kashani, manañataj qhari wawata nitaj warmi wawata paqarikusajchu, nispa.

⁵ Egiptomanta kajkuna Tiro llajta urmasqanta yachaspa, mayta llakikonqanku.

⁶ Tarsiskama riychej. Mama qochaj kantunpi tiyakojkuna, waqarikuychej.

⁷ Kaychu chay ñawpa llajtaykichej karqa, maypichus mayta kusikoj kankichej, chay? Kaymantachu runakunata kacharqankichej karu suyukunapi tiyakunankupaj?

⁸ Kunantajrí Tiro llajtaj contranta pitaj kayta wakicherqari? Chay llajtaqa kuraj kamachejkunaj llajtanku karqa, ranqheronkunapis kamachejkuna jina, kay pachapi sumaj runakunapaj qhawasqa karqanku.

⁹ Kaytaqa Tukuy Atiyniyoj Tata Diosmin wakicherqa, Tiro llajtayoj may jatun kasqankuta yuyakojkunata p'enqaypi rikhurichinanpaj, jinallataj kay pachapi atiyniyojkunata mayta k'umuykuchinanpaj.

¹⁰ Tarsis llajtamanta runakuna, jallp'ata llank'aspa kawsaychej, imaynatachus Nilo mayu kantupi llank'anku, ajinata, imaraykuchus manaña barcokunata ruwayta atinkichejchu.

¹¹ Tata Dios mama qocha pataman makinta oqharerqa, jinataj tukuy suyuta kharkatiticherqa. Canaanpi sumaj perqakunawan jark'achasqa llajtakunatapis thuñinankuta kamacherqa.

¹² Chantá nerqa: Manaña kusikunkichu, jatun ñak'ariypi kaj Sidonpa ususin. Sayariytawan, Quitinman chimpay, chaypipis qan manapuni samarikuyta tarinkichu, nispa.

¹³ Caldeokunaj suyunkuta qhawariy. Chaypeqa runa manaña kanchu. Chay llajtataqa asiriokuna ch'innejpi tiyakoj k'ita animalkunallapajña saqerparerqanku. Paykunaqa Babiloniaj muyuyninpi torrekunata sayachiytawan, llajtata jap'ispa, kamachina wasikunata thuñerqanku. Ajinamanta Babilonia llajtataqa laqayallataña saqerqanku.

¹⁴ Tarsismanta barcokunata purichejkuna, waqaychej kunanqa, imaraykuchus maypichus barcokunata sayachinaykichej thuñisqañamin.

¹⁵ Chaypacha Tiro llajta qanchis chunka watata qonqasqa kanqa, uj kuraj kamachej kawsasqan watakunata jina. Qanchis chunka wata junt'akojtintaj, Tiro llajtaman phisu warmej kay takiyninta takiponqanku:

¹⁶ Qonqarparisqa phisu warmi, arpaykita oqharispa, llajtata muyumuy. Sumajta tocay, sumajtataj takiy, yuyarisqa kanaykipaj, nispa.

¹⁷ Chaywanpis qanchis chunka wata junt'akojtin, Tata Dios Tiro llajtamanta yuyarikonqa. Chay llajtarí watej millay kawsayman kutirenqa, kay pachapi kaj tukuy suyukunawantaj khuchichakonqa.

¹⁸ Qhatusqanwan ganasqanrí Tata Diospaj t'aqasqa kanqa. Chayqa mana waqaychasqachu nitaj jallch'asqachu kanqa, manachayqa Tata Diospaj ruwanayoj kajkunapaj kanqa, sacerdotekuna sajsakunankukama mikhunankupaj, sumajtataj p'achallikunankupaj ima.