Isaías 22 - DIOSPA QHELQACHISQ

Jerusalén llajtaj contranpi sut'inchay

¹ Isaías mosqoypi jina rikuna vallej contranta kay jinata nerqa: Imataj tiyan wasi pataman tukuyniykichej wicharinaykichejpajri?

² Jerusalén kusikuspa, raymita ruwaj llajta karqa. Kunanrí imaymana qhapariywan, ch'ajwawan ima junt'a kashan. Runaj ayan tukuynejpi wijch'urayashan. Chaywanpis chay runakuna mana maqanakupichu wañorqanku. Manachayqa yarqhaywan chantá onqoywan wañorqanku.

³ Tukuy kurajniykikuna ayqekorqanku. Paykuna arcowan flechajkunamanta ayqeshaspa, jap'isqa karqanku. Wapu runaykikuna karuman ayqeshaspapis, jap'ichikullarqankupuni.

⁴ Chayrayku noqa Isaías nerqani: Noqamanta ithiriychej, noqataj llajta tukuchisqa kasqanmanta jik'un jik'unta waqarikusaj. Ama sonqochawayta yuyaychejchu, llajta phirisqa kasqanmanta.

⁵ Tukuy Atiyniyoj Tata Dios nerqa jatun manchachikuy p'unchay chayamunanta. Chaymanta mosqoypi jina rikuna vallepi perqakunata urmachinku, runakunaj qhaparisqankutaj orqokunaman chayan.

⁶ Elammanta kajkuna arcowan flechanapaj wakichikunkuña, carretankukunaman, caballonkukunamanpis wicharinkuña. Quirmanta kajkunapis jark'akuna escudonkuta orqhomunkuña.

⁷ Chay sumaj valleykikunaman carretakuna junt'aykunku, caballopi lloq'ajkunataj llajta punkupi sayaykunku.

⁸ Judá suyoj jark'akunanqa manaña kanchu. Chay p'unchaypi qankunaqa montepi arma waqaychana cuartoman rinkichej armaykichejta mask'aj.

⁹ Davidpa llajtanpa perqankunapi lajrakusqanta qhawamorqankichej, ura kaj qochamantaj yakuta junt'acherqankichej.

¹⁰ Chantá Jerusalenpi wasimanta wasi purispa, wakin wasikunata urmacherqankichej, llajtata muyuykoj perqakunata sumajta sayachinaykichejpaj.

¹¹ Chay iskay perqa chawpipi uj qochata ruwarqankichej, chay ñawpa qochamanta yakuta jap'inaykichejpaj. Chaywanpis pichus kay pachata Ruwajmanta yanapananta mana mañakorqankichejchu, nitaj pichus ñawpajmantaña chay tukuy imata wakichejpi atinikorqankichejchu.

¹² Chay p'unchaypi Tukuy Atiyniyoj Tata Dios wajyasorqachej mayta llakikuspa waqanaykichejpaj, llakikusqaykichejta rikuchispa umaykichejta ruthukunaykichejpaj, qhashqa p'achata churakunaykichejpaj ima, chay millay ruwasqaykichejmanta.

¹³ Qankunarí aswanpis asikorqankichej, kusikorqankichejtaj. Ovejakunata, wakakunatapis ñak'aytawan, sumaj aychata mikhuspa, vinotapis ujyaspa, nerqankichej: Mikhunachej, ujyanachej, imaraykuchus q'aya wañupusun, nispa.

¹⁴ Tukuy Atiyniyoj Tata Diosrí chaymanta kay jinata sut'inchawarqa: Wañunankukama juchankuta mana jayk'ajpis pampachasajchu, nispa. Tukuy Atiyniyoj Tata Dios ajinata nin.

Mayordomo Sebnaj contranpi sut'inchay

¹⁵ Tukuy Atiyniyoj Tata Dios niwarqa: Rispa, kamachina wasipi mayordomo Sebnaman nimuy:

¹⁶ Imata kaypi ruwashankiri? Pi qan kanki aya p'ampanata kaypi ruwachikunaykipajri? Pitaj kamachisunki aswan patanej chhankapi jusk'uspa aya p'ampanata ruwanaykita, chaypi wañuspa samarinaykipaj?

¹⁷ Atiyniyoj runa, Tata Dios sinch'ita jap'iykususpa, karuman choqasonqa.

¹⁸ Pelotata jina morq'oykususpa, karu jatun suyukama bolalachisonqa. Chaypi wañunki, chaypitaj may uyarisqa carretaykikuna qhepakonqanku, qantaj kuraj kamachejpaj p'enqay kanki.

¹⁹ Chay maypichus kashanki, chaymanta qharqosqayki, mayordomo kasqaykimanta wijch'usqayki, nispa.

²⁰ Tata Dios nillarqataj: Chaypacha Hilciaspa churin kamachiy Eliaquinta wajyasaj.

²¹ Payta p'achaykikunawan p'achallichisaj, kamachina chumpiykiwantaj chumpichisaj. Eliaquinman kamachej kanaykita qopusaj, paytaj Jerusalenpi tiyakojkunapaj tata jina kanqa, jinallataj Judá suyupajpis.

²² Davidpa wasinta kicharina llavetapis kunkanman warkhuykusaj. Pay kicharejtin, ni pipis wisq'ayta atenqachu, wisq'ajtintaj, nillataj pipis kichariyta atenqachu.

²³ Noqataj Eliaquinta clavota jina sinch'ita perqaman takaykusaj, tatanpa ayllunta allinpi rikhurichinaypaj.

²⁴ Tatanpa wasinpi imachus allin kajqa chaypi warkhusqa kanqa: Wawankuna, allchhinkuna ima, tukuy vasokuna, imaymana kaj yurukuna ima.

²⁵ Aswan qhepamanrí perqapi sumaj takasqa karqa, chay clavo sik'ikaponqa, jinataj urmanqa. Chaypi warkhusqa kajkunataj tukuyninku phirikonqanku. Ajinata noqa Tukuy Atiyniyoj Tata Dios nini.