Isaías 21 - DIOSPA QHELQACHISQ

Babilonia suyoj contranpi sut'inchay

¹ Mama qocha kantupi ch'innejpi imachus Babiloniata qhatirinanmanta Isaías kay jinata nerqa: Neguevmanta sinch'i muyoj wayra jina jatun llakiy jamun, manchachikuytaj ch'innejmanta.

² Diosqa mosqoypi jina manchachikunata rikuchiwan. Wasanchajtaqa wasanchanku, chinkachejtataj chinkachillankutaj. Sayarikuy ari, Elam suyu, soldadoykikunawan, qanpis Media suyu, soldadoykikunawan llajtata jap'inapaj muyuykuy. Babilonia wajkunata ayqochisqanta tukuchisaj.

³ Chayrayku tukuy ukhuy nanawan, paqarichikoj warmi imaynatachus nanaywan q'ewiykachakun, ajinata q'ewiykachakuni. Chay phutikusqayqa mana uyarejta saqewanchu, manchachikuywantaj mana rikuytapis atinichu.

⁴ Yuyayniy chinkarparin, manchachikuywantaj kharkatitini. Ch'isiyaykunanta suyasqayqa manchachikunaman tukupun.

⁵ Mesaqa mikhunankupaj churasqaña, patanmanpis mast'ata churankuña. Chantá jatun mikhuy qallarikunña. Chaywanpis kamachejkuna, sayariychej ari, jark'akuna escudokunatapis wirawan jawiychej.

⁶ Tukuyta Kamachej Diospuni ajinata niwan: Qanqa uj qhawajta llajtaj perqanman churamuy tukuy rikusqanta willananpaj.

⁷ Payqa caballokunapi iskaymanta iskay lloq'asqata jamushajta rikonqa, jinallataj wakinta burrokunapi, chayrí camellokunapi lloq'asqata. Chayta rikuspa, allinta qhawachun, nispa.

⁸ Chantá qhawajqa león jina qhaparerqa: Wiraqochíy, noqaqa sapa p'unchay maypichus kanaypi kashani. Sapa ch'isitaj imachá qhawanay kajta qhawashani.

⁹ Kunantajrí uj carretata iskay caballokuna qhatatamushajta rikuni, nispa. Chaymantataj waj runa nerqa: Babilonia urmanña, urmanña, jinallataj lantinkunapis pampapi p'akirasqa rikhurinku, nispa.

¹⁰ Ayllúy, erapi trillasqa trigo jina karqanki chaymantataj wayrachisqa. Noqaqa imatachus Israelpa Diosnin Tukuy Atiyniyoj Tata Diosmanta uyarisqayta willarqayki.

Edom suyoj contranpi sut'inchay

¹¹ Edompa contranta kay jinata willay: Pichá Seirmantapacha qhaparimushawan: Qhawaj runa, kunan ch'isi ima phaniñatajri? Qhawaj runa, unayrajchus sut'iyamunanpaj? nispa.

¹² Qhawaj runataj kuticherqa: Sut'iyamushanña, chaymantaqa ch'isiyayñataj jamonqa. Sichus tapukuyta munankichej chayqa, tapukuychej, munaspataj ujtawanpis tapukullaychejtaj, nispa.

Arabia suyoj contranpi sut'inchay

¹³ Arabiaj contranta kay jinata willay: Dedanmanta qhatuwan purejkuna, Arabia ch'innejpi pakakuychej.

¹⁴ Temapi tiyakojkuna, yakumanta ch'akichikojkunaman yakuta apaychej, jinallataj mikhunatapis jaywariychej.

¹⁵ Paykunaqa espadawan wañuchisqa kanamanta ayqekushanku, sumaj filochasqa espadamanta, flechanapaj arcomanta, sinch'i maqanakuymantawan.

¹⁶ Tukuyta Kamachej Diostaj niwarqa: Imaynatachus kamachi runa parlasqan p'unchaykamalla ruwananta junt'an, ajinallatataj kaymanta uj wataman Cedarpa tukuy jatun kaynin tukukonqa.

¹⁷ Cedarpa wapu soldadonkuna arcowan wach'ejkunamanta pisilla qhepakonqanku. Ajinata Israelpa Tata Diosnin nin.