Isaías 20 - DIOSPA QHELQACHISQ

Asiria suyoqa Egiptota, Etiopiatawan jap'enqa

¹ Asiriata kuraj kamachej Sargón soldadokunata kamachejta Asdod llajtaman kacharqa. Paytaj soldadonkunawan Asdod llajtapi tiyakoj filisteokunaj contranpi maqanakuspa jap'ikaporqa.

² Chaypacha Tata Diosqa Amozpa churin Isaiasta nerqa: Qhashqa p'achaykita lluch'ukuy, jinallataj chakiykimanta juk'utaykitapis, nispa. Isaías ajinata ruwaspa, mana juk'utayoj, ukhunchana p'achallayoj purerqa.

³ Chantá Tata Dios nerqa: Kamachiy Isaías kinsa wata junt'ata ukhunchana p'achayojlla, q'ara chakillataj purerqa, Egiptota Etiopiatawan ima imachus qhatirinanta rikuchispa.

⁴ Ajinata Asiriata kuraj kamachejqa Egipto llajtayojkunata, Etiopía llajtayojkunatawan, waynakunata, jinataj machu runakunatawan ukhunchana p'achayojllata waj suyukunaman apachenqa. Paykunaqa q'ara chakilla, sikinku rikhurishaj ima purenqanku, Egipto p'enqakunanpaj.

⁵ Filisteokunaqa Etiopía yanapananta suyakorqanku, jinallataj Egiptopipis atinikorqanku. Chaywanpis p'enqakuspa pawichikonqanku.

⁶ Chaypacha mama qocha kantupi tiyakojkuna nenqanku: Qhawariychej atinikusqanchej suyu imapichus rikhurisqanta. Ima mana allin kajtinpis, payman qayllakoj kanchej, Asiriata kuraj kamachejmanta jark'akunawanchejpaj. Kunanrí imaynallatataj ayqekusunri? nispa.