Isaías 19 - DIOSPA QHELQACHISQ

Egipto suyoj contranpi sut'inchay

¹ Isaías Egipto suyoj contranpi sut'inchaspa, kay jinata nerqa: Qhawariychej, Tata Diosqa Egiptoman phuyu patapi usqhayta jamushan. Chantá Egiptopi kaj lantikuna payta rikuytawan, kharkatitenqanku, Egiptomanta runakunataj maytapuni mancharikonqanku.

² Tata Dios nin: Chaypacha Egipto llajtayojkunata paykunapurata maqanachisaj, sapa ujninkuta wawqepurata maqanachisaj, jinallataj runa masinkupurawan, uj llajtata waj llajtawan, uj jap'iyta waj jap'iywan.

³ Egiptomanta runakunaj yuyayninkuta q'ewisaj. Imatachus ruwanankuta wakichikusqankutapis manakajman tukuchisaj. Chantá paykuna tapukonqanku lantinkukunata, layqakunata, aysirikunata ima.

⁴ Noqarí Egiptota millayta ruwajkunaj makinman jaywasaj, paykunatataj rumi sonqoyoj kuraj kamachej kamachenqa, nispa. Ajinata Tukuy Atiyniyoj Tata Dios nin.

⁵ Mama qochapi yakoqa pisiyanqa, Nilo mayupi yakupis ch'akiponqa.

⁶ Larq'akunapis millayta asnarenqa, soqosokuna, t'uturakuna ima ismusqanrayku. Jinallataj Egiptopi mayukuna pisimanta pisi ch'akiponqanku.

⁷ Nilo mayu patapi kaj q'omerkuna, mayu kantupi chajrakunapis ch'akipullanqankutaj. Jinamanta ch'akipojtintaj, wayra apakaponqa.

⁸ Challwirikunapis maytapuni llakikonqanku mana challwa kajtin. Nilo mayupi anzuelota choqajkunapis sinch'illatataj llakikonqanku. Challwa jap'ina ch'ipata mayuman choqajkunapis mayta q'enaqakonqanku.

⁹ Linota ruthojkunapaj mana lino ruthuna kanqachu, nitaj awajkunapaj q'aytu kallanqatajchu.

¹⁰ Telata awajkuna umphu qhepakonqanku, tukuy phushkajkunataj musphanqanku.

¹¹ Cheqapuni Soán jap'iypi kamachejkuna ancha wampu kanku. Faraonpa aswan sumaj yuyaychajninkunapis wampu yuyaychajkunallataj kanku. Ajina kashaspapis, imaynatataj faraonta ninkichej: Noqaykoqa yachayniyojkunaj churinku kayku, ñawpa kamachejkunaj churinku, nispari?

¹² Faraón, yachayniyojniykikuna maypitaj kunan kashankuri? Kunanqa paykuna Tukuy Atiyniyoj Tata Dios imatachus Egiptoj contranpi ruwananta nisuchunku.

¹³ Soanpi kamachejkunaqa wampukuna kanku, Menfispi kamachejkunataj ch'awkiyachikunku. Jap'iykunata kamachejkunapis Egiptota pantayman pusanku.

¹⁴ Tata Diosqa paykunapi musphay yuyayta rikhuricherqa. Paykunaqa Egiptota tukuy ima ruwasqanpi pantacherqanku, imaynatachus machasqa runa lansasqan patapi last'aykachan, ajinata.

¹⁵ Egiptoraykoqa manaña pipis ni imata ruwayta atinchu, ni uma kajpis, nitaj chupa kajpis, chayrí ni palmera kajpis, ni t'uturapis.

¹⁶ Chaypacha Egipto llajtayojkunaqa warmi jina manchachikuywan kharkatitenqanku, Tukuy Atiyniyoj Tata Dios paykunaj contrankupi makinta oqharejtin.

¹⁷ Egipto llajtayojkunaqa Judá suyuta maytapuni manchachikonqanku. Judáj sutinta uyarispalla mayta pawichikonqanku, Tukuy Atiyniyoj Tata Dios Egiptoj contranpi imatachus ruwananta wakichisqanrayku.

¹⁸ Chaypacha Egiptopi phishqa llajtakuna Tukuy Atiyniyoj Tata Diosta mana wasanchanankuta tilonqanku, chantá cananeokunaj hebreo rimayninpi parlanqanku. Ujnin kajtaj Intej Llajtan sutichasqa kanqa.

¹⁹ Chaypacha kikin Egipto suyu chawpipi Tata Diospaj uj altar kanqa, chay jallp'aj mojonninpitaj Tata Diospa sutinpi uj rumita sayachenqanku.

²⁰ Chaytaj uj señal kanqa Tukuy Atiyniyoj Tata Diospa sutinta Egipto suyupi yuyarikunankupaj. Awqanku paykunata ñak'arichejtinku, paykuna Tata Diosman qhaparikonqanku, paytaj uj kacharichejta kachamonqa paykunata kacharichinanpaj.

²¹ Chaypacha Tata Diosqa Egiptomanta runakunawan rejsichikonqa, paykunataj Tata Diosta rejsenqanku, yupaychanqanku ima, uywa ñak'asqata chantá ch'aki mikhuy jaywanata q'olachispa. Paykunaqa Tata Diosta munayninta ruwanankuta nenqanku, imatachus nisqankutataj junt'anqanku.

²² Tata Dios Egipto llajtayojkunata ñawpajta k'iriykonqa, chantá paykunata qhaliyachillanqataj. Paykunaqa Tata Diosman kutirikonqanku, paytaj mañakusqankuta uyarispa, qhaliyachenqa.

²³ Chaypacha Egiptomanta Asiriaman jatun ñan kanqa. Asiriamanta kajkunaqa Egiptoman renqanku, jinallataj Egiptomanta kajkunapis Asiriaman rillanqankutaj. Paykunataj khuska Tata Diosta yupaychanqanku.

²⁴ Chay p'unchaypi israelitakunaqa egipciokunawan, asiriokunawan allinpi kawsakonqanku, Tata Diostaj Israelnejta paykunata saminchanqa.

²⁵ Chaypacha Tukuy Atiyniyoj Tata Dios paykunata nenqa: Noqaj aylluy Egiptota, ruwasqay asiriokunata, chayaqey Israelta ima saminchasaj, nispa.