Isaías 18 - DIOSPA QHELQACHISQ

Etiopía suyoj contranpi sut'inchay

¹ Ay, imarajchus kanqa qanmanta, phinki phinkikunaj sonarisqanwan jina junt'a suyu, mayu kantupi kaj Etiopía suyu.

² Nilo mayunta kachakunata kachanku t'uturamanta ruwasqa usqhayta purej barcokunapi. Kachakuna, usqhayta riychej, qarankoj k'ancharishaj jatunkaray runakunaj llajtankuman. Paykunaqa tukuynejpi manchachikuna suyu kanku, atiyninkuwan atipaj suyu, chay jallp'ankupitaj ashkha mayu tiyan.

³ Tukuy kay pachapi kaj runakuna, kay jallp'a patapi tiyakojkuna, orqo puntapi wiphalata sayachejtinku, sumajta qhawariychej, cornetata waqachejtinkukamataj, sumajta uyarinkichej.

⁴ Ajinata ruwaychej, imaraykuchus Tata Dios kay jinata niwan: Ch'inlla kakuspa, tiyakunaymanta qhawamullasaj, imaynatachus inti k'ancharimuspa k'ajarin, ajinata, jinallataj poqoy oqharina p'unchaypi q'oñimojtin chhulla phuyu phuyuykun, ajinata.

⁵ Uva sach'a t'ikariy pasajtin, uva llulluyta qallarishajtintaj, manaraj poqoy oqharina p'unchay chayamushajtin, Tata Dios thansanta k'uturanqa. Aysarikoj thansanta k'utuspataj, wijch'onqa.

⁶ Ajinamanta Etiopiamanta tukuy wañusqa soldadokuna suwintukunapaj, k'ita animalkunapajwan saqesqa kanqanku. Chaypi q'oñi tiempopi suwintukuna ayankuta p'itiranqanku. Chantá chiri tiempopitaj k'ita animalkunañataj ayankoj tullunkuta k'uturanqanku.

⁷ Chaypacha chay runakunaqa Tukuy Atiyniyoj Tata Diosman t'inkata apamonqanku. Paykuna qaranku k'ancharishaj jatunkaray runakuna kanku, qallariymantapacha tukuypa manchachikunan ayllu, atiyninkuwan tukuyta atipaj. Jallp'ankupitaj ashkha mayu tiyan. Paykunataj t'inkata Sión orqoman apamonqanku, maypichus Tukuy Atiyniyoj Tata Diospa sutinta yupaychanku, chayman.