Isaías 17 - DIOSPA QHELQACHISQ

Damasco llajtaj contranpi sut'inchay

¹ Damasco llajtaj contranpi Isaías kay jinata nerqa: Damascoqa manaña llajtachu kanqa, manachayqa laqayaman tukonqa.

² Aroerpa llajtankunaqa wiñaypaj saqerpayasqa kanqanku, chayqa uywa michinallaña kanqa. Chaypi uywakuna puñonqanku, nitaj pipis mancharichej kanqachu.

³ Efrainpi perqawan jark'achasqa llajtakuna manaña kanqachu, Damascoj kamachiyninpis nillataj kanqachu. Imaynatachus israelitakunaj jatun kayninku chinkarqa, ajinallatataj Siriamanta puchojkunawan kanqa. Ajinata Tukuy Atiyniyoj Tata Dios nin.

Israel suyu jasut'isqa kanqa

⁴ Chay p'unchaypi Jacobpa jatun kaynin pisiyaponqa, jinallataj ukhunpis tulluyanqa.

⁵ Imaynatachus ruthojkuna trigota ruthuspa rastrojollataña saqerparinku, ajinallataj chay jallp'apis kanqa. Chayrí imaynatachus Refayin vallepi uj runa makinwan trigo umata pallan, ajina Israelwan kanqa.

⁶ Chay suyupi pisi runakunalla qhepakonqanku, imaynatachus olivo sach'ata thalajtinchej puntanpi uj iskayllaña aceituna qhepakun, chayrí thansanpi tawa phishqallaña qhepakun, ajina. Ajinata Israelpa Tata Diosnin nin.

⁷ Chay p'unchaypi runakuna yanapananta mask'aspa, Ruwajninkuman kutirenqanku. Kikin ñawinkuwan Israelpa May Llimphu Kaj Diosninta qhawanqanku.

⁸ Manaña lantikuna yanapananta mask'anqankuchu, nitaj makinkuwan ruwasqa lantikunata yupaychanqankuchu, nillataj k'ullu lantikunatapis. Manañataj k'ullumanta Asera lantikunata yupaychanqankuchu, nitaj maypichus lantikunaman inciensota q'oshñichinku, chay altarkunamanpis k'umuykukonqankuchu.

⁹ Chay p'unchaypi sumaj perqawan jark'achasqa llajtaykikuna saqerpayasqa kanqanku, imaynatachus unayña amorreokuna, heveokuna ima llajtankuta saqerparerqanku israelitakunata manchachikusqankurayku, ajina. Jinamanta chay llajtakuna ch'inpachaman tukonqanku.

¹⁰ Ajina kanqa, imaraykuchus qanqa kacharichisoj Diosmanta qonqaporqanki, manataj waqaychasoj Diosniykimanta yuyarikorqankichu. Astawanpis qanqa sumaj uva sach'akunata mallkerqanki, waj dioskunata yupaychanaykipaj.

¹¹ Ichá chay p'unchayllapipuni mallkisqayki ijimunman, q'ayantinpachataj t'ikarinman. Chaywanpis poqoynintaqa mana pallankichu, manachayqa nanayta, onqoyta, mana jampisqa kayta ima oqharinki.

¹² Ashkha suyumanta soldadokunaj ch'ajwasqanku uyarikun, mama qochaj qhollchoqeyasqan jina. Chayqa ashkha atiyniyoj soldadokunaj ch'ajwasqanku, paykunataj ashkha yakoj sonasqanpis kanman jina sonarichispa jamushanku.

¹³ Chaywanpis Tata Dios paykunata k'amejtinkama, karuman ayqerikaponqanku, orqopi wayraj apaykachasqan q'opa jina, chayrí imaynatachus muyoj wayra sach'ata ujllata oqharin, ajinata.

¹⁴ Israelitakunaqa ch'isiyaykuyta may jina mancharichisqa kashanqanku, chaywanpis sut'iyamuyta awqankukunaqa wañusqa rikhurenqanku. Ajinaman patanchejpi purejkunaqa chayanqanku, jinallataj suwawajninchejkunapis.