Isaías 16 - DIOSPA QHELQACHISQ

Moab llajtayojkuna Judá suyuman ayqekunku

¹ Ch'innejpi Sela llajtamantapacha uj corderota apachiychej Sión orqoman, chay suyuta kamachejman.

² Moabpi warmikunaqa Arnón wayq'o kantupi mana thapayoj p'isqokuna jina saqerparisqa kashanku.

³ Moabmanta runakuna Sionta kamachejkunata ninku: Awqaykukunamanta pakanawaykupaj wakichikuychej, waqaychanawaykupajtaj parlarinakuychej. Chawpi p'unchaypi llanthuykichejwan pakaykuwayku ari ch'isipis kanman jina. Waj suyukunaman apasqa kajkunata pakaykuy ari, amataj ayqekojkunata makinkuman jaywaykuwaykuchu.

⁴ Moabmanta ayqekojkunata wajyarikuy ari, chay ñak'arichejkunamantataj paykunata pakaykuriy ari, chay ñak'ariy tukukunankama, nispa. Aswan qhepanejman chay soldadokuna manaña paykunata ñak'arichenqankuchu, jinallataj imankuta qhechoj awqakuna riponqanku.

⁵ Chaypacha Tata Diosqa Davidpa ayllunmanta uj kuraj kamachejta churanqa. Paytaj khuyakuspa, cheqanta juzgaspa kamachenqa. Jinallataj cheqantapuni ruwanqa.

⁶ Moabmanta runakunaj mayta wapuykachasqankumanta uyarinchej, mayta runaykachasqankumanta, machu machu kasqankumantapis. Chaywanpis may kasqankumanta parlasqankoqa yanqhalla.

⁷ Chayrayku Moabpi tiyakojkunaqa suyunkumanta waqanku, may llakisqataj Quir Jaréset llajtapi uva k'isa mana kasqanmanta waqarikunku.

⁸ Jesbonpi chajrakuna, chantá Sibemapi kaj uva huertakunapis ch'akipunku, waj suyukunamanta kamachejkuna phiriykusqankurayku. Chay uva sach'akunaj thansankoqa Jazerkama chayaj, ch'innejtataj aysarikuspa, mama qocha chimpakama chayaj.

⁹ Chayrayku Jazermanta, Sibemapi kaj uva huertamanta ima llakikuspa waqarikuni. Jesbonmanta, Elealemantawan waqayniy jich'akun, imaraykuchus poqoy oqharina kusikuy manaña kanchu.

¹⁰ Llank'ana jallp'akunapi kusiy takiy tukukapun, uva huertakunapipis manaña takiykuna uyarikunchu. Manaña vino ruwanapaj uvatapis ch'irwankuchu, imaraykuchus kusiywan ch'ajwasqankuta ch'inyachini.

¹¹ Chayrayku tukuy sonqoywan Moab suyumanta arpa jina waqani, jinallataj Quir Jeresmantapis.

¹² Moabmanta runakuna lomakunaman wicharispa, sayk'unankukama may jinatapis mañakuchunku, yupaychana wasinkumanpis mañakoj yaykuchunku, manapuni imatapis tarenqankuchu.

¹³ Tata Diosqa unaymantapachaña Moab suyumanta kaykunata nisqa.

¹⁴ Kunantajrí Tata Dios kay jinata nin: Imaynatachus kamachi runa parlasqan p'unchaykamalla imachus ruwananta ruwan, ajinallatataj kinsa wataman Moabpa may uyarisqa atiynenqa phirisqa kanqa. Ashkha runayoj kasqanmantataj pisillaña puchonqanku, nitaj imatapis ruwayta atenqankuchu, nispa.