Isaías 14 - DIOSPA QHELQACHISQ

Waj suyuman apasqa kajkuna kutimpunku

¹ Chaywanpis Tata Diosqa Jacobpa ayllunmanta khuyakonqa. Israelitakunatataj watejmanta ayllun kanankupaj ajllakonqa, jinaspataj jallp'ankupi paykunata watejmanta tiyachenqa. Chaypacha karu llajtayojkunapis paykunaman ujchakonqanku, Jacobpa ayllunwantaj tiyakonqanku.

² Waj suyukuna israelitakunata yanapanqanku jallp'ankuman kutimpunankupaj. Chay runakunataj Diospa jallp'anpi israelitakunaj wata runanku kanqanku. Chantá israelitakunañataj, pikunachus paykunata ñak'arichejkunata presochanqanku, munayninkutataj paykunawan ruwanqanku, pikunachus israelitakunata llakichej kanku, chaykunawan.

Babilonia kuraj kamachejta asipayanapaj takiy

³ Israel ayllu, maypachachus Tata Dios samarikuyta qosonqachej chay jinata ñak'arisqaykichejmanta, jinallataj phutikusqaykichejmanta chantá chay jina sinch'i ruwaymanta ima chaypacha,

⁴ kay jina yarawiwan Babiloniaj kuraj kamachejninpa contranta asikunkichej: Qhawariychej ñak'arichej runa imapichus rikhurisqanta, runaykachaj imaynatachus tukukusqanta.

⁵ Tata Diosqa paypa llakichina atiyninta p'akirparin, chay millay kamachiynintapis t'unata ruwan.

⁶ Payqa phiñakuyninwan tukuy suyukunata jasut'ej, mana sayk'uspataj seq'oj. Chantá phiñakuyninwan suyukunata chakin uraman churaj, mana khuyakuywan qhatiykachaspa.

⁷ Kunantajrí tukuy kay pachapi runakuna allinta kawsakuspa samarikushanku, kusiywantaj takishanku.

⁸ Pino sach'akunapis, Libanopi cedro sach'akunapis mayta kusikuspa, ninku: Babilonia, wañusqaykimantapacha manaña pipis k'utoj jamuwaykuñachu, nispa.

⁹ Ukhu pachapi kajkuna chayanaykita mayta suyashasunku. Qanta taripamusoj jamuspa, pikunachus unay kay pachapi kamachejkuna karqanku, paykuna kamachinanku tiyanamanta sayarikonqanku.

¹⁰ Chantá qhaparispa nisonqanku: Qanpatapis kallpayki pisiyallantaj, noqayku jinallamantaj tukunki.

¹¹ Wapu kayniykitawan, atiyniykitawan ima qanwan khuska p'ampaykorqanku. Kamachinayki wasipipis manaña arpaykej waqayninpis uyarikunchu. Kunan mast'akunaykeqa khurukunalla, qhatakunaykipis sillwi khurukunallaña kanku.

¹² Sut'iyay ch'aska, kay jinatachu janaj pachamanta urmamunki? Qanqa tukuy suyuta atipaj karqanki, kunantajrí kay pachaman wijch'usqa rikhurinki.

¹³ Qanqa sonqoykipi nerqanki: Janaj pachaman wicharisaj, Diospa ch'askankunamanta aswan pataman kamachinay tiyanata churasaj. Chantá patanejpi, maypichus dioskuna tantakunku, chaymanta kamachimusaj.

¹⁴ Phuyu pataman wicharisaj, Patapi Kaj Dios jinataj kasaj, nispa.

¹⁵ Aswanpis qanqa, maypichus wañusqakuna kashanku, chayman urayk'unki, ukhu pachaj sonqonman.

¹⁶ Jaqaypi qanta tukuy rikusojkuna t'ukuspa qhawasonqanku, nenqankutaj: Kaychu tukuy kay pachata kharkatitichej chay runaqa? Kaychu tukuy suyuta manchachej runaqa?

¹⁷ Kaychu kay pachata ch'inllata saqej runaqa? Kaychu chay jatuchaj llajtakunata phiriraj, presokunamantapis mana khuyakoj runaqa? nispa.

¹⁸ Tukuy suyukunata kuraj kamachejkunaqa may jatunchasqa samarikunku, sapa ujtaj covachankupi.

¹⁹ Qantajrí covachaykimanta q'opa jina wijch'usqa kanki alqo wañusqa jina. Maqanakupi wañuchisqa runakunawan khuska t'oqoman choqaykusqa kanki.

²⁰ Qantaqa mana kuraj kamachejta jinachu p'ampasonqanku, imaraykuchus llajtaykita chinkacherqanki, runaykitapis wañuchillarqankitaj. Chantá millay runaj mirayninmanta ni pi yuyarikonqachu.

²¹ Wakichikuychej chay runaj churinkunata wañuchinaykichejpaj, ñawpa tatankukuna may millayta ruwasqankurayku. Amaña chay churikuna oqharikuspa, watejmanta suyukunata jap'ikuchunkuchu, nillataj kay pachata llajtankukunawan junt'achichunkuchu.

²² Tukuy Atiyniyoj Tata Dios nin: Noqamin paykunaj contrankupi oqharikusaj. Noqa Babiloniaj sutinta chinkarparichisaj, jinallataj paykunamanta puchojkunata, wawankuta, allchhinkuta ima wañurachisaj.

²³ Llajtankuta yaku qhochiman tukuchisaj, ch'useqakunaj tiyakunankutataj ruwasaj. Chaymantaqa chinkachiy pichanawan paykunata picharparisaj, nispa. Ajinata Tukuy Atiyniyoj Tata Dios nin.

Asiria suyoj contranpi sut'inchay

²⁴ Tukuy Atiyniyoj Tata Dios tiluspa, nillantaj: Cheqapuni imatachus yuyasqayqa junt'akonqapuni, imatachus nisqaypis ruwakonqapuni.

²⁵ Asiriokunataqa suyuypi chinkachisaj, orqoypitaj paykunata sarurasaj. Aylluyta kacharichisaj paykuna yugota churasqankumanta, aylluypa wasankumantataj paykunaj churasqanku q'epita phaskarasaj.

²⁶ Chaymin chay yuyasqayqa tukuy kay pachaj contranpi, makiytaj tukuy llajtata jasut'inaypaj oqharisqa kashan.

²⁷ Noqa Tukuy Atiyniyoj Tata Diospuni ajina kananta nini. Chaytaqa mana pipis pantachiyta atinchu. Makeyqa jasut'inaypaj oqharisqallapuni kashan, manataj pipis jark'awayta atenqachu, nispa.

Filistea suyoj contranpi sut'inchay

²⁸ Israelta kuraj kamachej Ajazpa wañupusqan watapi Isaías kay willayta sut'incharqa:

²⁹ Filisteamanta runakuna, ama kusikuychejchu qankunata maqana k'aspi p'akikusqanmanta. Chay wañoj katarimanta waj katariñataj rikhurimonqa, chaytaj phawaj nina katari kanqa.

³⁰ Wajchakunaj kuraj kaj wawankukuna jallp'ankupi poqojta mikhonqanku, mana imayoj runakunapis mana ima llakiyniyoj samarikonqanku. Runaykikunatatajrí yarqhaywan wañurachisaj, chaymanta puchojkunatataj chinkarparichisaj.

³¹ Filisteapi llajtakuna, aullakuychej, nanaywantaj qhapariychej. Manchariywan kharkatitiychej, imaraykuchus wichaynejmanta soldadokuna manchay yana q'oshñi jina jamusunkichej, manataj ni ujpis paykunamanta qhepakunchu.

³² Filisteokunaj kachankukunaman ima ninkichejtajri? Sión llajtataqa Tata Diospuni sayachin, chayraykutaj ayllunmanta llakisqa kajkunaqa chay llajtapipuni pakakonqanku.