Isaías 13 - DIOSPA QHELQACHISQ

Babiloniaj contranpi willay

¹ Amozpa churin Isaiasqa Babilonia imaynachus kananmanta mosqoypi jina uj sut'inchayta rikorqa.

² Uj q'ara orqo puntapi maqanakuna wiphalata sayachiychej, chaypitaj maqanakuman yaykunapaj jatunmanta qhapariychej. Makiykichejwan soldadokunata wajyaychej, kurajkunaj punkunkuta yaykunankupaj.

³ Noqa, Tata Dios, ajllakusqay soldadokunata imatachus ruwanankuta kamachiniña, chantá wajyallanitaj wapu soldadoykunata k'araj phiñakuyniyta rikuchinankupaj. Paykunataj atipasqaymanta kusikunku.

⁴ Orqokunapi ashkha runaj ch'ajwasqan jina uyarikun. May chhika soldadokunaj purisqanpis, suyukunaj purisqanku, ch'ajwasqanku ima uyarikullantaj. Tukuy Atiyniyoj Tata Dios soldadonkunata maqanakupaj tantaykun.

⁵ Chaykunaqa karu llajtamanta jamunku, kay pachaj k'uchunmantapacha. Chaykunaqa Tata Diospa kachamusqan kanku, paypa k'araj phiñakuyninpi jasut'iwan tukuynin kay pachata tukuchinankupaj.

⁶ Qhaparispa waqaychej, imaraykuchus Tata Diospa p'unchaynenqa qayllapiña kashan. Chay p'unchay chayamojtin, Tukuy Atiyniyoj Tata Dios tukuyta phirenqa.

⁷ Chayrayku tukuy runaj makinku llawch'iyanqa, jinallataj kallpankupis liwikaponqa.

⁸ Manchachikuywan kharkatiylla junt'aykonqa. Phutiywan, nanaywan ima paykunata jap'enqa, imaynatachus wijsallisqa warmi nanaywan q'ewiykachakun, ajinata. Mancharisqa paykunapura qhawanakonqanku, imaraykuchus uyankupis p'enqaymanta pukayarenqa.

⁹ Tata Diospa p'unchaynenqa manchaytapuni jamushan, chay p'unchaytaj manchay ñak'ariy p'unchay kanqa. K'araj phiñakuytaj kay pachata ch'inpachata saqenqa, tukuy juchasapakunatapis chinkarparichenqa.

¹⁰ Janajpi kaj ch'askakuna, imachus k'anchajkuna ima manaña k'anchanqankuchu. Inteqa llojsimuspapis laqhayaykaponqa, killapis manaña k'anchanqachu.

¹¹ Tata Dios nin: Kay pachapi kajkunata juchankumanta jasut'isaj, millayta ruwaj runakunatataj millay ruwasqankumanta jasut'isaj. Millay runakunaj machu machuykachayninkuta chinkachisaj. May kasqankuta yuyakojkunatataj k'umuykachachisaj.

¹² Ofirmanta sumaj qori imaynatachus sinch'ita pisiyan, ajinallatataj runakunapis astawan pisi kanqanku.

¹³ Chantá janajqa kharkatitenqa, kay pachapis kananmanta kuyurenqa, Tukuy Atiyniyoj Tata Diospa k'araj phiñakuynin t'ojyasqanrayku.

¹⁴ Babilonia suyupi tukuy runakuna mancharichisqa kanqanku, qhatiykachasqa taruka jina, mana michejniyoj ovejakuna jinataj. Sapa uj llajtankuman ayqenqanku, jallp'ankumantaj riponqanku.

¹⁵ Pillapis jap'ichikojqa t'ojsisqa kanqa, pichus taripachikojpis espadawan wañuchisqa kanqa.

¹⁶ Chay soldadokunaqa wawakunata tatankoj ñawpaqenpi pampaman ch'allpanqanku. Wasinkumanta tukuy imata suwarakaponqanku, warminkutapis alqochanqanku.

¹⁷ Noqaqa Medo suyumanta kajkunata Babiloniaj contranta sayarichisaj, pikunachus qolqewan mana lluk'ichikunkuchu, nitaj qoritapis munapayankuchu, chaykunata.

¹⁸ Medomanta soldadokunaqa arcowan flechaspa, waynakunata wañurachenqanku. Juch'uy wawakunamantapis mana khuyanqankuchu, nillataj wawakunata wañuchiymantapis llakikonqankuchu.

¹⁹ Babiloniaqa waj suyukunapaj sumaj lliphipirishaj rumi jina karqa, caldeokunaj may uyarisqa llajtanku. Jinapis chay llajtata Tata Dios tukuchenqa, imaynatachus Sodomata, Gomorratawan tukucherqa, ajinata.

²⁰ Chaymanta qhepaman Babiloniapi manaña runakuna tiyakonqankuchu, nitaj llajtachakonqankuchu. Arabekunapis manañapuni chaypi jarakonqankuchu, nitaj michejkunapis chaypi uywankuta michenqankuchu.

²¹ Chay suyupeqa phiña k'ita animalkunallaña kawsanqanku, wasikunapipis ch'useqakunallaña junt'a kanqanku. Chantá surikunalla chaypi purenqanku, k'ita cabrakunataj chaypi phinkiykachanqanku.

²² Kamachinanku wasikunapi atojkunalla waqanqanku, sumachaj wasinkupitaj k'ita alqokunallaña kawsanqanku. Babiloniaj ñak'arinan p'unchay qayllamushanña, chay p'unchaytaj usqhayllata chayarparimonqa.