Isaías 11 - DIOSPA QHELQACHISQ

Davidpa mirayninmanta cheqan kamachej

¹ Davidpa tatan Yeseqa uj k'ullu jina, chay k'ullumantataj ijimonqa, chay saphinmanta ijimojtaj poqonqa.

² Tata Diospa Espíritun paywanpuni kanqa, chay Espiritutaj qonqa yachayta, yuyayta, yuyaychayta, atiyta, tukuy imata rejsiyta, Tata Diosta may jatun respetowan qhawayta ima.

³ Payqa Tata Diosta kasuypi misk'irichikonqa. Payqa mana rikusqanman jinallachu juzganqa, nitaj uyarisqanman jinallachu justiciata ruwanqa.

⁴ Manachayqa cheqan kajman jina wajchakunata juzganqa, kay pachapi llamp'u sonqoyojkunapajtaj justiciata ruwanqa. Kay pachataqa simi nisqallanwan varawan jina jasut'enqa, samayninwantaj millay ruwajkunata wañuchenqa.

⁵ Cheqan kaywan ñañu wasanta chumpiwan jina chumpiykukonqa. Cheqa kajta junt'aj kaynintataj ukhunchana p'achata jina churakonqa.

⁶ Chaypacha atojwan, ovejawan ujllapi kawsarikonqanku. Leonwan, chivitowanpis ujllapi winkurenqanku. Waka uñawan, leonwanpis khuska mikhonqanku, chaykunatataj wawalla michenqa.

⁷ Wakawan, jukumariwanqa khuska mikhonqanku, uñankupis khuskallataj winkurenqanku. Leonpis waka jina pastota mikhonqa.

⁸ Ñuñoj wawaqa katarej jusk'un patapi pujllaspa mana imanakonqachu, ñuñumanta p'itisqa wawapis nina katarej puñunanman makinta sat'illanqataj.

⁹ Tata Diospaj t'aqasqa orqopeqa mana ima millaytapis ruwanqankuchu, imaraykuchus tukuy kay pacha Tata Diosta rejsej runakunawan junt'a kanqa, imaynatachus mama qochaman yaku junt'aykun, ajinata.

¹⁰ Chaypacha Yesejpa saphinmanta ijimojqa tukuy suyupaj wiphala jina uj señal kanqa. Tukuy runakuna payta mask'anqanku, tiyakunantaj jatun kayninwan lliphipirenqa.

Waj suyukunaman wijch'usqa kajkuna kutimpunku

¹¹ Chaypacha Tata Dios ujtawan atiyninta rikuchillanqataj, maykunapichus ayllunmanta kajkuna puchorqanku, chaykunata kutichimunanpaj: Asiriamanta, Egiptomanta, Patrosmanta, Etiopiamanta, Elammanta, Sinarmanta, Jamatmanta, mama qochaj kantunmanta ima.

¹² Tata Diosqa uj wiphalata señalta jina oqharenqa, karu suyuman apasqa israelitakunatataj ujllaman tantaykonqa. Judá suyumanta ch'eqerasqa kajkunatapis kay pachaj tukuy k'uchunmanta tantamonqa.

¹³ Efraín suyoj munapayasqanqa tukukonqa, Judá suyoj awqankunapis chinkachisqa kanqanku. Efraín suyuwan Judá suyuwan manaña jap'inakonqankuchu.

¹⁴ Iskayninku ujllata kallpakuspa, inti yaykuynejman kachaykukonqanku, filisteokunamantaj wasallankumanta phinkiykonqanku. Jinallataj inti llojsimuynejpi tiyakojkunamanta tukuy imankuta qhechumonqanku. Edom suyu, Moab suyu ima israelitakunaj kamachiyninpi ruwanayoj kanqanku, jinallataj Amón suyupi kajkunapis israelitakunaj kamachiyninpi kanqanku.

¹⁵ Tata Diosqa Egiptopi Puka Mama Qochata ch'akichenqa. Éufrates mayunejman makinta oqharispa, uj sinch'i wayrawan chay mayuta qanchis juch'uychaj mayukunaman t'aqarparenqa, runakuna mana juk'utankuta lluch'ukuspa chimpanankupaj.

¹⁶ Ajinamanta Tata Dios allin ñanta wakichenqa ayllunmanta puchojkuna Asiriamanta kutiripunankupaj, imaynatachus israelitakuna Egiptomanta llojsimunankupaj ruwarqa, ajinata.