Isaías 10 - DIOSPA QHELQACHISQ

¹ Ay, qankunata imallachus qhatirisonqachej, mana allin kamachisqakunata wakichejkuna, runakunata ñak'arichinapaj kamachisqakunata qhelqajkuna.

² Chaywan wajchakunapaj mana justiciata ruwankichejchu, jark'ankichejtaj ñak'arichisqa kajkunapaj cheqan justicia kananta. Warmisapakunamantapis chay kamachisqakunawan tukuy kapuyninkuta suwankichej, wajcha wawamantapis suwallankichejtaj.

³ Imanankichejtaj jasut'ina p'unchaypiri? Piwantaj yanapachikunkichej karumanta jasut'iy jamusojtiykichejri? Maymantaj chay jina qhapaj kapuyniykichejta pakankichejri?

⁴ Manachus presochasqakunawan k'umuykuchisqa kankichej chayqa, maqanakupi wañuchisqapuni kankichej. Chay tukuywanpis Tata Diospa k'araj phiñakuynenqa manarajpuni thasnukunchu. Payqa jasut'inanpaj makin oqharisqallarajpuni kashan.

Diosqa asiriokunawan israelitakunata jasut'ichin

⁵ Tata Dios nin: Asiria, qanqa phiñakuyniypi wajtanay k'aspi kanki, phiñakuspa oqharinay varaytaj.

⁶ Noqaqa asiriokunata millayta ruwaj runakunaman kachasaj, k'arajta phiñachiwaj llajtamantaj pusasaj. Paykuna chaykunaj imankuchus kajta, tukuy kapuyninkutapis qhechumonqanku, callekunapi t'uruta jina paykunata saronqanku.

⁷ Chaywanpis Asiriata kuraj kamachej mana jinatachu yuyashan, nitaj sonqonpipis ajinatachu tanteyashan. Manachayqa payllamanta ashkha suyuta chinkarparichiyllata yuyashan.

⁸ Pay jatunchakuspa, ajinata nin: Tukuy yanapawajkuna kuraj kamachejkuna kanqanku.

⁹ Calno llajtata phirerqanchej, imaynatachus ñawpajta Carquemista ruwarqanchej, ajinallatataj. Jamat llajtatapis jap'ikapullanchejtaj Arfad llajtata jina. Chantá Samaria llajtatapis phirillarqanchejtaj Damasco llajtata jina.

¹⁰ Ashkha lantiyoj llajtakunata atipaspa, jap'ini. Chay llajtakunaqa Jerusalenmanta, Samariamantapis astawan ashkha lantiyoj karqanku.

¹¹ Imaynatachus Samaria llajtata, lantinkunatawan ruwarqani, ajinallataj Jerusalén llajtata, lantinkunatawan ruwasaj, nispa.

¹² Chaywanpis Tata Dios Sión orqopi, Jerusalenpiwan Asirianejta imachus ruwananta ruwaytawan, Asiriata kuraj kamachejtañataj jasut'enqa wapuykachasqanmanta, may kasqanta yuyakusqanmantataj.

¹³ Asiriata kuraj kamachej nin: Kaytaqa kallpaywan ruwani, yachayniywan ruwani yuyayniyoj kasqayrayku. Tukuy suyukunaj jallp'ankuman yaykuykuspa jap'ikapuni, tukuy kapuyninkutataj qhechumuni. Kuraj kamachejninkutapis may wapu kayniywan atiparparini.

¹⁴ Tukuy llajtaj kapuyninkuta jap'ikaporqani. Imaynatachus uj runa saqerpayasqa thapamanta runtuta pallan, ajinata chay tukuynin jallp'akunata jap'ikaporqani. Mana pipis karqachu lijranta kuyuchej, nitaj siminta kicharispa, chhur nejllapis.

¹⁵ Jachaqa k'utoj runamanta nisqa aswan sumaj kasqanta yuyakunmanchuri? Sierrapis khuchoj runamanta nisqa may kasqanta yuyakullanmantajchu? Chayqa kanman uj k'aspi, chayrí tojnupis runata apaykachanman jina.

¹⁶ Chayrayku Tukuy Atiyniyoj Tata Diosqa runaykachaj Asiriaman llawch'iyay onqoyta apachimonqa, Asiriata kuraj kamachejpa jatun kaynintataj ninawan jap'iykuchenqa llant'ata jina.

¹⁷ Israelpa K'anchaynin Tata Diosqa nina lawray jina kanqa. May Llimphu Tata Diosqa lawrarishaj ninaman rijch'akonqa. Uj p'unchayllapi ch'uminta, khishkantawan rupharparenqa.

¹⁸ Tata Dios runaykachaj Asiriata chinkachenqa, imaynatachus nina tukuy sumaj sach'arara jallp'ata, sumaj jallp'atawan ruphaykuspa chinkachin, ajinata. Uj onqosqa mana kallpayoj runata jina saqerparenqa.

¹⁹ Sach'arara jallp'api uj iskay sach'akunalla qhepakonqa, uj wawaj yupanan jinalla.

Tata Dios ayllunta yanapanqa

²⁰ Chaypacha Israelpi pisi qhepakojkunaqa, Jacobpa mirayninmanta puchoj israelitakuna manaña paykunata ñak'arichejpichu atinikonqanku, manachayqa israelitakunaj May Llimphu Kaj Tata Diospi tukuy sonqo atinikonqanku.

²¹ Jacobpa mirayninmanta kaj israelitakunamanta pisi puchojkunaqa Tukuy Atiyniyoj Diosman kutirikonqanku.

²² Israel, aylluyki mama qocha kantupi t'iyu chhikapis kachun. Chaywanpis chaymanta pisi puchojkunalla kutimonqanku. Tukuchisqa kananku nisqaqa junt'akonqapuni, ajinamantataj justicia ruwakonqa.

²³ Tukuy Atiyniyoj Tata Dios imatachus ruwasaj nisqanta kay pachapi junt'anqapuni.

²⁴ Chayrayku Tukuy Atiyniyoj Tata Dios ajinata nin: Sionpi tiyakoj ayllúy, Asiria runakunamanta ama manchachikuychu. Paykunaqa qanpa contraykipi varankuta oqharenqanku, imaynatachus Egipto runakuna k'aspiwan wajtasorqanku, ajinata.

²⁵ Pisi p'unchaykunamantawan qankunapaj phiñakuyniy tiyaykonqa, chay k'araj phiñakuyniywantaj paykunatañataj tukuchisaj.

²⁶ Tukuy Atiyniyoj Tata Dios paykunata sinch'ita jasut'enqa, imaynatachus Gedeón Oreb chhankapi madianitakunata wañuracherqa, ajinata, imaynatatajchus Tata Dios egipciokunaj contrankuta mama qochapi varanta oqharerqa, ajinata.

²⁷ Chaypacha wasaykiman llasa q'epi churasusqankuta qhechusaj, jinallataj yugota churasusqankutapis p'akisaj, nispa.

Asiriokuna suyuta jap'ispa purinku

²⁸ Asiriamanta soldadokuna Ayat llajtamanña chayanku, chaymanta Migrón llajtamanñataj rinku, Micmas llajtapitaj q'epinkuta saqenku.

²⁹ Wayq'onta rispataj, Gebapi jarakunku. Ramá llajtaqa maytapuni manchachikuspa kharkatitin, Saulpa llajtan Gabaapi tiyakojkunapis llojsispa, ayqenku.

³⁰ Galinmanta runakuna manchachikuspa, jatunmanta qhapariychej. Lais llajtakama uyarikuchun, jinallataj wajcha Anatot llajtayojkunapis uyarichunku.

³¹ Madmenamanta runakunaqa mayta qhollpirakushanku, Guebinpi tiyajkojkunapis pakakunata mask'aspa ayqeshanku.

³² Chay awqakunaqa Nobpi qhepakonqanku, chaymantataj maqanakunankupaj, k'acha Sionpa contranta, Jerusalenpa contrantawan makinkuta oqharenqanku.

³³ Chaywanpis Tukuy Atiyniyoj Tata Diosta qhawariychej, imaraykuchus manchay kallpanwan Asiria sach'ata k'ajllaranqa. Astawan jatuchaj kaj sach'akunapis k'utusqa kanqanku, aswan jatunchajkunatataj pampaman urmachenqa, chay runaykachaj sach'atataj k'uturanqa.

³⁴ Jachawan tukuy sach'akunata k'uturanqa. Libanopi sach'akunapis Tukuy Atiyniyoj Diospa ñawpaqenpi manchayta sonaspa urmaykonqanku.