Hechos 8 - DIOSPA QHELQACHISQ

Sauloqa Jesusta qhatejkunata qhatiykachan

¹ Saulopaj Estebanta wañuchisqankoqa allillan karqa. Chaymantapachataj Jerusalenpi ashkha runakuna Jesuspa iglesianta qhatiykachayta qallarerqanku. Chayrayku iglesiamanta ashkha ayqekorqanku Judea jap'iyman, Samaria jap'iyman ima. Jesuspa kuraj kachankunalla Jerusalenpi qhepakorqanku.

² Jinallataj wakin khuyakuyniyoj runakuna Estebanta p'amparqanku, chantá unayta pay wañusqanmanta waqarqanku.

³ Saulorí Jesuspa iglesianta manchayta qhatiykacharqa tukuchiyta munaspa. Wasikunaman yaykuspataj, Jesusta qhatikoj qharikunata, warmikunata ima jap'irarqa, qhatataspataj, carcelman wisq'aracherqa.

Felipeqa Jesusmanta sumaj willayta Samariapi willan

⁴ Jesusta qhatikojkuna Jerusalenmanta ayqespa, maymanchus risqankupi Jesusmanta sumaj willayta willararqanku.

⁵ Jinapi Felipeqa Samariaman rispa, Cristomanta willarqa.

⁶ Ashkha tantakamoj runakunataj Felipej nisqanta tukuy sonqo uyarerqanku, rikorqankutaj runaj mana jayk'aj rikusqan t'ukunata ruwasqanta.

⁷ Chaykuna ukhupi ashkha runakuna millay supayniyoj karqanku, Felipe kamachejtintaj, supaykunaqa sinch'ita qhaparispa, chay runakunamanta llojserqanku. Jinallataj ashkha suchu runakunata puriricherqa.

⁸ Chayrayku Samariapi may kusiy karqa.

⁹ Chay llajtapi uj runa Simón sutiyoj karqa. Pay layqa kaspa, layqeriyonwan Samariapi tiyakojkunaj umankuta muyurachisqa, atiyniyoj kasqanta rejsichikuyta munaspa.

¹⁰ Tukuy runataj juch'uymanta jatunkama Simonmanta nej kanku: Kay runapi Diospa jatun atiynin tiyan, nispa.

¹¹ Jinataj tukuyninku Simonpa nisqanta kasoj kanku, imaraykuchus unaytaña layqeriyonwan paykunata q'otiyaykusqa.

¹² Chantá Dios kamachinanmanta sumaj willayta, jinallataj Jesucristo Diospa kachamusqan kasqanmanta ima Felipe willajtin, qharikunamanta, warmikunamanta ashkha nisqanta jap'ikorqanku, bautizachikorqankutaj.

¹³ Kikillantataj Simonpis Jesuspi atinikuspa, bautizachikorqa. Chaymantataj Felipewanpuni purerqa, may t'ukuna imakunata, runaj mana jayk'aj rikusqanta ruwashajta rikuspataj, mayta t'ukorqa.

¹⁴ Jinapi Jesuspa kuraj kachankuna Jerusalenpi kashaspa, uyarerqanku Samariapi tiyakojkunapis Diospa Simi nisqanta jap'ikusqankuta. Chayta yachaspataj, paykuna Pedrota, Juantawan chayman kacharqanku.

¹⁵ Pedrowan, Juanwan ima Samariaman urayk'orqanku, chayaspataj Diosmanta mañakorqanku, Jesuspi atinikojkunaman Santo Espirituta qonanpaj.

¹⁶ Chaypacha Santo Espíritu manaraj mayqenninkumanpis jamusqarajchu, imaraykuchus Felipe paykunata bautizasqa Tukuyta Kamachej Jesuspa sutillanpi.

¹⁷ Chantá Pedrowan, Juanwan Jesucristopi atinikojkunaj umankuman makinkuta churaykojtinku, Santo Espíritu paykunaman jamorqa.

¹⁸ Jinapi Simón rikorqa imaynatachus Jesuspa kuraj kachankuna Jesuspi atinikojkunaj umankuman makinkuta churajtinku, Santo Espíritu jamusqanta. Chantá Simón Jesuspa kuraj kachankunaman qolqeta jaywayta munarqa, nerqataj:

¹⁹ Noqamanpis chay atiyta qowaychej, ajinata pimanpis makiyta churajtiy, Santo Espíritu paymanpis jamunanpaj, nispa.

²⁰ Pedrotajrí Simonman kuticherqa: Qanwan qolqeykiwan ima maldicisqa kaychej, imaraykuchus qan imatachus Dios qhasilla qosqanta qolqewan rantiyta munarqanki.

²¹ Qanqa noqaykuwan mana ima ruwanayki kanchu, manataj chay atiyta jap'inaykipaj jinachu kanki, imaraykuchus Dios yachan sonqoyki mana cheqanchu kasqanta.

²² Chay millay yuyasqaykimanta Tukuyta Kamachej Diosman kutirikuy, paymantataj mañakuy. Ichapis sonqoykipi millay yuyasqaykita Dios pampachanman.

²³ Noqarí sut'ita reparayki envidiawan junt'a kasqaykita, juchaj jarap'asqantaj, nispa.

²⁴ Simontaj nerqa: Ama jina kaspa, qankuna Diosmanta mañaripuwaychej ari, chay nisqaykichejmanta ama imapis chayamunawanpaj, nispa.

²⁵ Chaymanta Pedrowan, Juanwan Samariapi Jesusmanta testigo jina willarqanku, Diospa Simi nisqantataj yachacherqanku. Chantá Jerusalenman kutiporqanku. Ñanta rej jinataj, Samariaj ranchonkunapipis Jesusmanta sumaj willayta willarallarqankutaj.

Felipe Etiopía llajtayoj runaman Jesusmanta willan

²⁶ Chay qhepata Diospa uj angelnenqa Felipeta nerqa: Riy ura kaj ñanta, mayqenchus Jerusalenmanta Gaza llajtaman ch'innejta rin, chayman, nispa.

²⁷ Felipetaj kasuspa rerqa, jinataj Etiopiamanta uj eunuco runawan tinkukorqa. Payqa Candace nisqa qoyaj kapuyninta waqaychaj karqa. Chay runataj Diosta yupaychaj Jerusalenman jamusqa.

²⁸ Carretanpi llajtanman kutipushaspataj, Diosmanta ñawpa sut'inchaj Isaiaspa qhelqasqanta ñawirisharqa.

²⁹ Jinapi Santo Espiritoqa Felipeta nerqa: Jaqay carretaman chimpaspa, qayllanta riy, nispa.

³⁰ Felipetaj qayllaykuspa, eunuco runa imatachus Diosmanta sut'inchaj Isaiaspa qhelqasqanpi ñawirisharqa, chayta uyarerqa. Chantá payta taporqa: Ñawirishanki, chay imatachus niyta munasqanta entiendenkichu? nispa.

³¹ Chay runataj kuticherqa: Mana pipis sut'inchawajtin, imaynamantataj entiendesajri? nispa. Jinapi eunucoqa Felipeta mañarikorqa carretanman wicharinanta, paywan khuska tiyarikunanpaj.

³² Maypichus eunuco ñawirisharqa chay qhelqasqapi kay jinata nerqa: Payqa oveja jina ñak'anaman apasqa karqa. Imaynatachus corderoqa millmanta ch'inllamanta ruthuchikun, ajinallatataj paypis mana siminta kicharerqachu.

³³ K'umuykachachisqa kashajtin, paypaj justicia mana karqachu. Ni miraynillanpis karqachu aswan qhepaman paymanta parlanankupaj, paytaj kay pachamanta chinkarparichisqa karqa, nispa.

³⁴ Chantá eunucoqa Felipeta nerqa: Willariway ari, pimantataj Diosmanta sut'inchaj chayta nisharqari? Paymantachu parlasharqa chayrí wajmantachu? nispa.

³⁵ Jinapi Felipeqa, maypichus eunuco ñawirisharqa, chaymantapacha qallarispa, Jesusmanta sumaj willayta sut'inchayta qallarerqa.

³⁶ Ñanta rishaspataj, chayarqanku, maypichus yaku karqa, chayman. Chantá eunucoqa Felipeta nerqa: Kaypi yaku tiyan. Manachu atiyman noqa bautizasqa kayta? nispa.

³⁷ Felipetaj kuticherqa: Sichus cheqatapuni tukuy sonqoykiwan Jesuspi atinikunki chayqa, bautizasqa kayta atinki, nispa. Eunucotaj kuticherqa: Arí, atinikuni, yachanitaj Jesucristo Diospa Churin kasqanta, nispa.

³⁸ Chantá eunucoqa carretanta sayachinankuta kamacherqa. Iskayninkutaj urayk'uspa, yakuman yaykorqanku, Felipetaj chaypi eunucota bautizarqa.

³⁹ Yakumanta llojsimusqankutawan, Diospa Espiritonqa Felipeta wajnejman apakaporqa, Etiopiamanta runataj Felipeta manaña rikorqachu. Jinapis may kusisqa llajtanman riporqa.

⁴⁰ Chay qhepata Felipeqa Azoto llajtapi rikhurerqa. Chaymantataj llajtamanta llajta purispa, Jesusmanta sumaj willayta willararqa Cesarea llajtaman chayanankama.