Hechos 7 - DIOSPA QHELQACHISQ

Esteban Jatun Juntapi kutichikuspa parlan

¹ Chaymanta kuraj kaj sacerdoteqa Estebanta taporqa: Imamantachus ch'ataykususqankoqa ajinapunichu? nispa.

² Estebantaj kuticherqa: Wawqeykuna, tatakuna ima, uyariwaychej: Ñawpa tatanchej Abraham manaraj Jaranman tiyakoj ripushaspa, Mesopotamiapi tiyakusharqa, chaypitaj Jatun Atiyniyoj Dios payta nerqa:

³ Llajtaykita, aylluykita ima saqespa, noqa rikuchisqayki, chay cheqaman ripuy, nispa.

⁴ Ajinamanta Abrahamqa Caldea suyuta saqespa, Jarán llajtaman tiyakoj riporqa. Tatan wañupusqanmanta qhepamantaj, Diosqa Abrahamta pusamorqa kay cheqaman, maypichus qankuna kunan tiyakushankichej, chayman.

⁵ Diosqa kay cheqapi mana Abrahamman chayaqeta jina qorqachu ni chaki sarunan chhikallantapis. Chaywanpis Diosqa kay cheqata Abrahammanpuni qonanta nerqa paypata kananpaj, wañupojtinpis mirayninpaj qhepakunanpaj. Chayta Dios nishajtintaj, manaraj Abrahampata ni uj wawanpis karqachu.

⁶ Dios payman nillarqataj: Qanpa mirayniyki karu suyupi wata runa kanqanku, chay llajtayojkunataj mirayniykita 400 watata mayta ñak'arichenqanku.

⁷ Noqatajrí mirayniykita ñak'arichej suyuta jasut'isaj. Qhepamantaj mirayniyki chay suyumanta llojsimuspa, kay cheqapi yupaychawanqanku, nispa.

⁸ Chantá Diosqa Abrahamwan circuncisión nisqa tratota ruwarqa. Ajinamanta Abraham churin Isaacta circuncidarqa paqarikusqanmanta pusaj p'unchayninman. Isaacpis churin Jacobta circuncidarqa. Jacobpis kikillantataj chunka iskayniyoj jatun ayllukunaj tatankukunata circuncidallarqataj.

⁹ Jacobpa churinkuna, pikunachus ñawpa tatanchej kajkunaqa wawqenku Joseta chejnispa, wata runata jina venderqanku, Egipto suyuman apasqa kananpaj. Diostajrí Josewan karqa, payta waqaychaspa.

¹⁰ Jinapi Diosqa Joseta tukuy ñak'ariyninpi yanaparqa, jinallataj payman yuyayta, yachaytawan qorqa Egiptopi kuraj kamachej faraón allin ñawiwan qhawananpaj. Chaymantataj faraonqa Joseta churarqa tukuy Egiptota kamachinanpaj, ajinallatataj kamachinan wasitapis.

¹¹ Chaypacha manchay yarqhay karqa Egipto suyupi, Canaán suyupi ima. Ñawpa tatanchejkunapis manallataj mikhunata tariyta aterqankuchu.

¹² Jinapi Egiptopi trigo kasqanta uyarispa, Jacob ñawpa tatanchejkunata kacharqa. Chayqa ñawpaj kuti risqanku karqa.

¹³ Qhepan risqankupitajrí, Joseqa wawqenkunaman rejsichikorqa. Ajinapi faraón Josejpa ayllunta rejserqa.

¹⁴ Chaymanta qhepamantaj Joseqa tatan Jacobta wajyacherqa, tukuy ayllunwan Egipto suyuman jampunankupaj. Chaypacha Jacobpa ayllonqa qanchis chunka phishqayoj karqanku.

¹⁵ Ajinamanta Jacobqa Egiptoman tiyakoj riporqa, aswan qhepamantaj chaypi wañuporqa. Paypa qhepantataj ñawpa tatanchejkunapis wañupullarqankutaj.

¹⁶ Unaymantaj mirayninku paykunaj tullunkukunata aparqanku Sichem nisqa cheqaman. Chaypitaj chay tullunkuta p'amparqanku, mayqen jallp'atachus Abraham rantikusqa Jamorpa churinkunamanta, chaypi.

¹⁷ Dios imatachus Abrahamman nisqa mirayninpaj ruwananta, chay p'unchay junt'akunanpaj qayllamushajtin, israelitakuna Egiptopi manchay ashkhamanña mirasqanku.

¹⁸ Chantá Egiptopi waj kuraj kamachej rikhurerqa. Paytajrí mana yacharqachu pichus José kasqanta.

¹⁹ Chay kuraj kamachejtaj ñawpa tatanchejkunata chejnikuspa, manchayta paykunata ñak'aricherqa. Kamacherqataj israelitakuna qhari wawankukunata paqarisqantawankama wijch'unankuta wañunankupaj.

²⁰ Chaypachallataj Moisés paqarikorqa, paytaj Diospajqa ima munay karqa. Kinsa killakamataj tatanpa wasinpi uywasqa karqa.

²¹ Chantá tatan maman payta wijch'ojtinku, faraonpa ususin tarikuspa, wawanta jina uywakaporqa.

²² Ajinamanta Moisesqa Egipto llajtayojkunaj yachasqankupi yachachisqa karqa. Chayraykutaj Moisesqa may yachaywan parlasqanpi, ruwasqanpi ima respetasqa karqa.

²³ Moisés tawa chunka watayojña kashajtin, sonqon aysarerqa israelita masinkunata waturikamunanpaj.

²⁴ Jinallaman, uj egipcio uj israelitata maqashajta rikorqa. Moisestaj israelita masinman kutikuspa, Egipto llajtayoj runata wañurparicherqa.

²⁵ Chayta ruwaspa, Moisés yuyarqa israelita masinkuna reparanankuta, Dios paynejta paykunata chay ñak'ariymanta kacharichinanta. Paykunatajrí chayta mana repararqankuchu.

²⁶ Q'ayantenqa Moisés iskay israelitakunañataj maqanakushajta rikorqa. Allinyachiyta munaspataj, paykunata nerqa: Wawqekuna kaspa imaraykutaj qankunapura maqanakushankichejri? nispa.

²⁷ Llajta masinta maqajtajrí Moisesta tanqarparispa, nerqa: Pitaj qanta churasunki kamachejniyku, juezniykutaj kanaykipajri?

²⁸ Kunanqa, noqatañatajchu wañuchiwayta munanki, imaynatachus qayna Egipto llajtayoj runata wañucherqanki, ajinata? nispa.

²⁹ Moisestaj chayta uyarispa, Egiptomanta Madián cheqaman ayqerikaporqa. Chaypitaj waj llajtayoj jina tiyakuspa, casarakorqa jinataj iskay qhari wawayoj karqa.

³⁰ Tawa chunka wataña pasarqa. Uj kuti Moisés ch'innejpi purishajtin, Sinaí orqo qayllapi uj ángel payman rikhurerqa t'ankar sach'api nina lawrashaj ukhupi.

³¹ Moisés chayta rikuspa, t'ukorqa. Imachus kasqanta allinta yachananpaj ninaman qayllaykushajtintaj, Diospa parlamusqanta uyarerqa:

³² Noqa ñawpa tataykikuna Abrahampa, Isaacpata, Jacobpata Diosnin kani, nispa. Moisestaj mancharikuywan kharkatitispa, mana qhawariyllatapis munarqachu.

³³ Jinallapi Tata Dios payta nerqa: Juk'utaykita lluch'ukuy, imaraykuchus maypichus sayashanki, chayqa noqapaj t'aqasqamin.

³⁴ Noqa rikuni Egiptopi imaynatachus israelita aylluy ñak'arishasqankuta, sonqo nanayta ayqosqankuta ima uyarillanitaj. Chayrayku urayk'amuni chaymanta paykunata kacharichinaypaj. Kunanqa oqharikuy ari, Egiptoman kachasunaypaj, nispa.

³⁵ Kaymin chay Moisesqa, pitachus israelitakuna qhesachaspa, nisqanku: Pitaj qanta churasorqa kamachejniyku, juezniykutaj kanaykipajri? nispa. Jinapis paytamin Dios kacharqa paykunaj kamachejninku, kacharichejninkutaj kananpaj, lawrashaj t'ankar sach'api rikhurej angelnejta.

³⁶ Moisés israelitakunata kacharichispa, may t'ukuna imakunata, runaj mana jayk'aj rikusqanta ima Egiptopi ruwarqa. Chantá Puka Mama Qochanejta, ch'innejta ima tawa chunka wata junt'ata pusarqa.

³⁷ Kay Moisesllataj israelitakunata nerqa: Qankuna ukhullamantataj Dios noqata jina uj sut'inchajta sayarichenqa, qankunataj paytamin uyarinkichej, nispa.

³⁸ Jinallataj israelitakuna ch'innejpi tantasqa kashajtinku, Sinaí orqopi ángel imatachus Moisesman nerqa, chayta pay ñawpa tatanchejkunaman willarqa. Payllataj Diosmanta kawsayta qoj simi nisqata jap'erqa, noqanchejman willanawanchejpaj.

³⁹ Chaywanpis ñawpa tatanchejkuna Moisesta mana kasuyta munaspa, payta qhesacharqanku, sonqonkupitaj Egiptoman kutiripuyta yuyarqanku.

⁴⁰ Chayrayku Aaronta nerqanku: Dioskunata ruwapuwayku pusanawanchejpaj, imajtinchus Egiptomanta orqhomuwarqanchej, chay Moisés imanakunchus, mana yachanchejchu, nispa.

⁴¹ Ajinamanta israelitakuna waka uña lantita ruwakorqanku. Jinapitaj uywakunata ñak'aspa, waka uña ruwasqankuman q'olachispa jaywarqanku, chay ruwasqanku lantej sutinpitaj raymita ruwaspa, kusikorqanku.

⁴² Chayrayku Dios paykunamanta t'aqakuspa, saqerqa patapi kaj ch'askakunata yupaychanankuta, imaynatachus sut'inchajkunaj qhelqasqankupi nin, ajina: Israelitakuna, tawa chunka watata ch'innejpi kashaspa, noqamanchu uywakunata ñak'aspa jaywawarqankichej?

⁴³ Mana, qankunaqa aswanpis Molocpa toldontaraj apaykacharqankichej, Refán nisqa diosniykichejpa ch'askanpa lantintawan. Chay lantikunata qankunalla ruwakorqankichej chayta yupaychanaykichejpaj. Chayrayku noqa suyuykichejmanta wijch'usqaykichej, Babilonia suyumantapis aswan karumanraj, nispa.

⁴⁴ Ch'innejpi ñawpa tatanchejkuna Diospa trato ruwasqanmanta toldota aparqanku. Chayta ruwananku karqa Dios Moisesman rikuchisqanman jina, chayta.

⁴⁵ Chay toldotaqa ñawpa tatanchejkuna chayaqeta jina jap'erqanku. Aswan qhepamantaj paykunawan, Josuewan ima chay toldota aparqanku waj suyukunamanta qhechusqanku chay jallp'aman. Dios chay suyukunapi tiyakojkunata ñawpa tatanchejkunaj ñawpaqenkumanta qharqorqa. Jinataj toldo chay jallp'api karqa David wañupunankama.

⁴⁶ Dios Davidta khuyakuywan qhawarisqanrayku pay Diosmanta mañakorqa uj Templota ruwajta saqenanta, chaypi israelitakuna Diosninkuta yupaychanankupaj.

⁴⁷ Jinapis Salomonmin Diospaj Templota sayaricherqa.

⁴⁸ Chaywanpis Patapi Kaj Diosqa mana runaj makinwan ruwasqa wasipichu tiyakun, imaynatachus sut'inchajkunaj qhelqanpi Dios nin, ajina:

⁴⁹ Janaj pachaqa kamachinay tiyana, kay pachataj chakiy churana. Jina kajtenqa, maypitaj samarikunaypaj wasita ruwapuwankichejmanri?

⁵⁰ Manachu noqa janaj pachata, kay pachatawan ruwarqani? nispa.

⁵¹ Esteban nillarqataj: Qankunarí Diosta mana kasukoj rumi sonqo, mana uyarej kankichej. Chayrayku qankunapis ñawpa tatanchejkuna jina Santo Espirituta mana uyariyta munankichejchu.

⁵² Diosmanta mayqen sut'inchajtataj ñawpa tatanchejkuna mana qhatiykacharqankuchu ñak'arichinankupaj? Chantá wañuchillarqankutaj pikunachus unaymantapacha willarqanku cheqan kaj runa jamunanta, chaykunata. Pay jamojtintaj, qankunaqa payta wasanchaspa wañuchillarqankichejtaj.

⁵³ Qankunaqa angelkunanejta Diospa kamachisqanta jap'ishaspapis, manapuni chayta kasuyta munarqankichejchu, nispa. Ajinata Esteban kutichikorqa.

Estebanta wañuchinku

⁵⁴ Jatun Juntapi kajkunaqa Estebanpa parlasqanta uyarispa, maytapuni phiñarikorqanku, maqanankupaj jinataj qhawarqanku.

⁵⁵ Estebanrí Santo Espíritoj kamachiyninpi kashaspa, patata qhawarerqa, chantá Diospa jatun kayninpa lliphipiyninta rikorqa. Jesustapis Diospa pañanpi sayashajta rikullarqataj.

⁵⁶ Chantá pay nerqa: Qhawariychej, janajta kichasqata rikushani, Runaj Churintataj Diospa pañanpi sayashajta, nispa.

⁵⁷ Jatun Juntapi kajkunarí chayta uyarispa, ninrinkuta llup'aykukorqanku, sinch'ita qhaparispataj ujllata Estebanman phinkiykorqanku.

⁵⁸ Jinaspataj, llajtamanta jawaman payta qhatatarqanku rumiwan ch'anqaykunankupaj. Llullakuspa ch'ataykojkunataj patanchana p'achankuta lluch'ukuspa, Saulo sutiyojman saqerqanku qhawananpaj.

⁵⁹ Chay jinata payta ch'anqaykushajtinku, Estebanqa Diosmanta mañakuspa, nerqa: Tukuyta Kamachej Jesusníy, almayta jap'ikapuy, nispa.

⁶⁰ Qonqoriykukuspataj, sinch'ita qhaparerqa: Tukuyta Kamachej Jesusníy, kay ruwasqankumanta ama paykunata juchachaychu, nispa. Chayta niytawantaj, wañorqa.