Hechos 5 - DIOSPA QHELQACHISQ

Ananiaswan Safirawan

¹ Chantá Ananiaswan, warmin Safirawan ima jallp'ankuta vendellarqankutaj.

² Chay runataj warminwan yachachinakorqanku, vendesqankumanta wakin qolqeta pakaykunankupaj. Chantá Ananías wakillanta Jesuspa kuraj kachankunaman aparqa.

³ Jinapi Pedro payta nerqa: Ananías, imaraykutaj Supay Satanasta sonqoykipi kasunki? Qanqa Santo Espirituta q'otiyayta munaspa vendesqayki qolqemanta wakinta pakaykorqanki.

⁴ Manaraj vendeshajtiyki, chay jallp'a qanpata karqa. Vendejtiykipis, chay qolqe qanpallatataj karqa. Imaraykutaj sonqoykipi ajinata llullakuyta yuyarqanki? Qan mana runallamanchu llullakorqanki, aswanpis Diosman, nispa.

⁵ Ananiasqa Pedroj nisqanta uyariytawan, pampaman wañusqa wijch'ukorqa. Chayta yachajkunataj maytapuni manchachikorqanku.

⁶ Chaymanta waynakuna qayllaykuytawan, Ananiaspa ayanta mayt'uykorqanku, jawaman orqhospataj, p'ampamorqanku.

⁷ Chaymanta mana unaymanchu Ananiaspa warmin Safira yaykumorqa, imachus qosanta qhatirisqanmanta mana yachaspa.

⁸ Pedrotaj Safirata taporqa: Niway, kay chhika qolqepichu jallp'aykichejta venderqankichej? nispa. Paytaj kuticherqa: Arí, chay chhikapi venderqayku, nispa.

⁹ Chantá Pedroqa Safirata nerqa: Imaraykutaj qosaykiwan yachachinakorqankichej Tukuyta Kamachej Jesuspa Espiritunman llullakunaykichejpajri? Kunitan kay punkuman chayamushanku qosaykita p'ampamojkuna, paykunataj qantapis p'ampaj apallasonqankutaj, nispa.

¹⁰ Chaypachallataj Safiraqa Pedroj ñawpaqenpi wañusqa wijch'ukullarqataj. Chantá chay waynakuna yaykumuspa, Safirata wañusqataña tariparqanku. Ajinamanta paytapis apaspa, qosanpa qayllanman p'ampaykorqanku.

¹¹ Chantá tukuy iglesiawan, chaymanta tukuy uyarejkunawan ima maytapuni manchachikorqanku.

Jesuspa kuraj kachankunaqa onqosqakunata qhaliyachinku

¹² Jesuspa kuraj kachankunanejta Diosqa runakuna ukhupi runaj mana jayk'aj rikusqanta, may t'ukuna imakunata ima ruwarqa, ajinamanta yachayta qospa Diosmanta kasqankuta. Chaypachataj Jesucristota qhatejkuna uj sonqolla tantakoj kanku Salomonpa Corredornin nisqa cheqapi.

¹³ Waj runakunataj mana paykunawan tantakuyta munarqankuchu. Chaywanpis paykuna Jesucristota qhatejkunata allin ñawiwan qhawaj kanku.

¹⁴ Chantá qharikuna jinallataj warmikunapis Tukuyta Kamachej Jesuspi atinikuspa, payman kutirikorqanku, ajinamantataj Jesusta qhatikojkuna astawan ashkhayasharqanku.

¹⁵ Jinallataj runakunaqa onqosqakunatapis calleman orqhospa, chaypi suyachej kanku phullupi sirisqata chayrí kallapupi ima, Pedro chaynejta purishajtin, mayqellanmanpis llanthun chayaykunanpaj.

¹⁶ Chantá qayllapi juch'uy llajtakunamantapis runakuna Jerusalenman jamullarqankutaj, onqosqakunata, supaykunaj ñak'arichisqan runakunatawan ima apamuspa. Jesuspa kuraj kachankunataj tukuyninkuta qhaliyacherqanku.

Jesuspa kuraj kachankunaj contranpi ch'ajwa

¹⁷ Chantá kuraj kaj sacerdote, payman sayasqa saduceokuna ima Jesuspa kuraj kachankunawan maytapuni chhoqonakorqanku.

¹⁸ Jinataj Jesuspa kuraj kachankunata jap'ichiytawan, carcelman wisq'aykucherqanku.

¹⁹ Chay tutarí Diospa ujnin kaj angelnin cárcel punkuta kicharispa, Jesuspa kuraj kachankunata jawaman orqhorqa, paykunatataj nerqa:

²⁰ Temploman riychej, chaypitaj runakunaman kay mosoj kawsaymanta willaychej, nispa.

²¹ Chayta uyariytawan, Jesuspa kuraj kachankuna q'ayantin sut'iyayta Temploj pationman yaykuspa, Jesusmanta yachachiyta qallarerqanku. Chaykama kuraj sacerdote, paywan kajkuna ima tukuy israelitakunamanta kurajkunata wajyacherqanku Jatun Juntapi tantakunankupaj. Chantá carcelman soldadokunata kacharqanku Jesuspa kuraj kachankunata pusamunankupaj.

²² Chay soldadokunarí carcelman chayaspa, Jesuspa kuraj kachankunata mana tarerqankuchu. Kutirimuspataj, maychus kasqanta kurajkunaman willarqanku.

²³ Nerqankutaj: Noqayku carcelpa punkunta sumaj wisq'asqata taripayku, qhawajkunapis kanankupipuni kasharqanku. Carcelpa punkuta kicharispatajrí, chaypi mana pitapis tarerqaykuchu, nispa.

²⁴ Chayta uyarispa, Templota qhawajkunaj kamachejnin, kuraj sacerdotekuna ima mana yachayta atisharqankuchu imapichus chay tukukunanta.

²⁵ Jinallapi uj runa jamuspa, paykunaman willarqa: Pikunatachus carcelman wisq'acherqankichej, chaykuna kunitan Temploj pationpi runakunaman yachachishanku, nispa.

²⁶ Chantá soldadokunata kamachejqa soldadonkunawan rispa, Jesuspa kuraj kachankunata allillamanta pusarimorqanku. Chayta ruwarqanku imaraykuchus manchachikorqanku runakuna phiñakuspa paykunata rumiwan ch'anqaykunankuta.

²⁷ Chantá paykunata Jatun Juntaman pusaykamojtinku, kuraj kaj sacerdoteqa Jesuspa kuraj kachankunata tapuyta qallarerqa:

²⁸ Manachu qankunata sinch'ita kamacherqayku amapuni chay Jesuspa sutinpi yachachinaykichejta? Kunantajrí paymanta yachachisqaykichejwan tukuy Jerusalén llajtamanña junt'aykuchinkichej. Qankunataj chay runaj wañusqanmanta noqaykutapuni juchachayta munashawayku, nispa.

²⁹ Chantá Pedrowan, Jesuspa chay waj kuraj kachankunawan ima kuticherqanku: Diostapuni astawanqa kasunayku tiyan, runakunata kasunaykumantaqa.

³⁰ Ñawpa tatanchejkunaj Diosnenqa Jesusta wañusqamanta kawsarichimorqa, pitachus qankuna cruzman chakataspa wañucherqankichej, chayta.

³¹ Diostaj atiyninwan Jesusta aswan pataman oqharerqa Tukuyta Kamachej chantá runata Qhespichej kananpaj. Dios munallantaj noqanchej israelitakuna payman kutirikunanchejta, tukuy juchanchej pampachasqa kananpaj.

³² Noqaykutaj chaymanta testigo kayku, ajinallatataj Santo Espiritupis, pitachus Dios payta kasojkunaman qon, chay, nispa.

³³ Chayta uyariytawan, kurajkuna mayta phiñarikuspa, Jesuspa kuraj kachankunata wañuchiyta munarqanku.

³⁴ Jinallapi Diospa kamachisqanmanta yachachej Gamaliel sutiyoj uj fariseo sayarerqa. Payqa tukuy runapaj respetasqa karqa. Jinataj Jesuspa kuraj kachankunata jawaman orqhonankuta nerqa.

³⁵ Chantá juntapi kajkunata nerqa: Israelitakuna, sumajta unanchariychej imatachus kay runakunawan ruwanaykichejmanta.

³⁶ Yuyarikuychej imaynatachus unay Teudas sutiyoj runa rikhurimusqanta. Pay may kasqanta yuyakuspa, Romaj contranta oqharikusqa. Payta kasuspataj, 400 runakuna qhatisqanku. Wakinkuna Teudasta wañuchejtinkurí, payta tukuy qhatejkuna ch'eqerasqanku, paypa ruwasqantaj manakajman tukuporqa.

³⁷ Chay qhepaman, Galileamanta Judasñataj rikhurimorqa, runa yupay kashajtin. Paytapis ashkha runakuna qhatillarqankutaj. Chaywanpis payta wañuchisqankutawan, qhatejninkunapis kikillantataj ch'eqerarqanku.

³⁸ Kunanqa kayta niykichej: Ama imanaspalla, kay runakunata kacharipuychej. Sichus yachachisqanku, ruwasqanku ima runallamanta kanman chayqa, manakajman tukuponqa.

³⁹ Diosmanta kanman chayrí, chayta manapuni chinkachiyta atiwajchejchu. Pajtataj Diospa contranpi maqanakushawajchej, nispa.

⁴⁰ Chantá tukuyninku Gamalielta kasorqanku. Jinataj Jesuspa kuraj kachankunata wajyaspa, jasut'icherqanku, paykunatataj kamacherqanku Jesuspa sutinpi amaña parlanankuta. Chaymantataj paykunata kachariporqanku.

⁴¹ Chaywanpis Jesuspa kuraj kachankuna chay juntamanta llojsispa, mayta kusikorqanku Jesuspa sutinrayku ñak'arichisqa kasqankumanta.

⁴² Paykunataj sapa p'unchay mana sayk'uspa Cristo Jesusmanta sumaj willayta willararqanku Temploj pationpi, jinallataj wasimanta wasi purispa ima.