Hechos 27 - DIOSPA QHELQACHISQ

Pablota Romaman apachinku

¹ Maypachachus Italiaman barcopi rinayku yachakorqa chaypacha, Pablota, waj presokunatawan ima capitán Julio sutiyojpa makinman jaywarqanku. Kay capitán Julioqa kamachej karqa Kuraj Kamachejpa Soldadonkuna nisqa tropamanta.

² Chantá noqayku Adramitio puertomanta barcoman wicharerqayku Asiaman rinaykupaj. Noqaykuwan rillarqataj Macedonia jap'iypi kaj Tesalónica llajtayoj Aristarcopis.

³ Q'ayantenqa Sidón llajtaman chayarqayku. Ajinaqa capitán Julio k'acha runa kasqanrayku, Pablota saqerqa kawsaqenkunata waturikamojta, paykuna imallapipis Pablota yanaparinankupaj.

⁴ Chaymantataj rerqayku Chipre churu wasanta, imaraykuchus wayra anchatapuni ñawpaqeykumanta wayramusharqa.

⁵ Noqayku mama qochallantapuni rerqayku, jinataj Ciliciaj kantunta, Panfiliaj kantunta ima rispa, Licia jap'iypi kaj Mira llajtaman chayarqayku.

⁶ Chaypitaj capitán Julioqa Alejandriamanta uj barcota tarerqa Italiaman llojsishajta. Paytaj chay barcoman wicharichiwarqayku.

⁷ Chantá ancha alliyllamanta barcopi rispa, unaypi Gnido llajtaman ñak'ayta qayllarqayku. Wayra ñawpaqeykumanta phukumojtintaj, Salmonpa chimpanta rerqayku, Creta churuta muyuykuspa.

⁸ Chaymantataj qochaj kantullantapuni rispa, ñak'aymanta chayarqayku Sumaj Puertos nisqaman. Lasea llajtapis chay qayllallapitaj karqa.

⁹ Alliyllawan rispa, noqayku anchata qheparikorqayku. Chayrayku barcopi rinapaj mana walejñachu karqa, Jucha Pampachana p'unchay pasayta, chiri tiempo kasqanrayku. Chayrayku Pabloqa barcota purichejkunata kay jinata yuyaycharqa:

¹⁰ Noqa reparani kaymanta ñawpajman llakiykuna jamunanta. Cargata chinkachisun, barcopis p'ultikullanqataj. Chantá noqanchejpis wañuyta atisunman, nispa.

¹¹ Chaywanpis capitán Julioqa Pabloj nisqanta kasunantaqa, pay kasorqa barcoj dueñonta, barcota purichej runatawan.

¹² Chay cheqaqa barcota chiri tiempopi sayachinapaj mana allinchu karqa. Chayrayku tukuyninku chaymanta Feniceman riyta munarqanku chaypi qhepakunaykupaj chiri tiempo pasanankama. Feniceqa Creta churupi karqa, inti yaykuy qhawarisqa.

Jatun Qochapi sinch'i wayra

¹³ Uranejmanta wayra pisita phukumushajtin, paykuna yuyarqanku barcopi rinapaj allillan kananta. Chayrayku barcota sayachina anclata yakumanta aysamuytawan, Creta churu qayllanta puriyta qallarerqayku.

¹⁴ Chaywanpis manaraj karuta rishajtiyku, Euroclidón nisqa sinch'i wayra barcota mana ñawpajman rejta saqerqachu.

¹⁵ Ñawpaqeykumanta sinch'ita wayramuspa, kayman jaqayman barcota apaykachasharqa. Ajinaqa mana imaynamanta barcota cheqanchayta atispa, wayrawan tanqachikullarqayku.

¹⁶ Chantá Cauda nisqa juch'uy churoj wasanpi wayramanta tumpata pakakorqayku. Chaypitaj pisillata wayrasqanrayku ñak'ayllata barcoj aysasqan juch'uy boteta barcoman wicharichimorqayku.

¹⁷ Boteta wicharichiytawantaj, barcota purichejkunaqa barcotañataj waskhawan mat'ita watarqanku. Chantá Sirte nisqa t'iyuman barco sat'iykukunanta manchachikuspa, barcota purichina telata urayk'ucherqanku. Ajinamanta wayrapis ñak'ayllataña barcota tanqarqa.

¹⁸ Q'ayantintaj wayra manapuni thañejtin, barcota purichejkuna cargata yakuman wijch'uykuyta qallarerqanku.

¹⁹ Minchhantintaj, barcoj imankunatañataj yakuman wijch'uykullarqaykutaj.

²⁰ Unaytaña noqayku mana intita, nitaj ch'askakunatapis rikorqaykuchu. Jinallataj sinch'ita paramusharqa, wayramusharqataj, noqaykutaj yuyarqayku p'ultikuspa wañunaykuta.

²¹ Unaytaña mana mikhusqa kasqaykurayku, Pabloqa sayarikuspa, nerqa: Runa masikuna, sichus kasuwankichejman karqa chayqa, Cretamanta mana puririmusunmanchu karqa nitaj kay jinata ñak'arishasunmanchu karqa, nillataj imanchejkunatapis qochaman wijch'uykusunmanchu karqa.

²² Chaywanpis kunanqa sonqochakuychej. Mana mayqenninchejpis wañusunchu, barcolla p'ultikonqa.

²³ Chayta niykichej, imaraykuchus kunan ch'isi Diospa angelnin rikhuriwarqa. Noqaqa chay Diospata kani, jinataj paypa munasqantapuni ruwaspa kashani.

²⁴ Chay angeltaj niwarqa: Pablo, ama manchachikuychu. Imapis kachun kuraj kamachej Cesarpa ñawpaqenman chayanaykipuni tiyan. Diostajrí qanrayku barcopi tukuy rejkunamanta ni pitapis wañojta saqenqachu, nispa.

²⁵ Chayrayku, runa masikuna, sonqochakuychej. Noqa Diospa nisqanta jap'ikuni, jinataj yachani angelninpa nisqanman jina tukuy ima junt'akunanta.

²⁶ Chaywanpis wayraqa uj churuman wijch'urpariwasunchej, nispa. Ajinata Pabloqa barcopi purejkunaman nerqa.

²⁷ Chaymanta chunka tawayoj tutatawan, wayraqa kayman jaqayman apaykachawarqayku Adriático nisqa mama qochapi. Uj ch'isirí chawpi tutanejta, barcota purichejkuna reparaspa jinarqanku jallp'aqa qayllapiña kashasqanta.

²⁸ Jinapi may ukhuchus yaku kasqanta yachanankupaj waskhata kachaykuspa, yacharqanku kinsa chunka qanchisniyoj metro kasqanta. Astawan ñawpajman riytawan, kikillantataj waskhata kachaykuspa, yacharqanku iskay chunka qanchisniyoj metrollaña kasqanta.

²⁹ Jinapi barcota purichejkuna manchachikorqanku barcoqa chhankaman takakunanta. Chayrayku barcoj qhepanmanta tawa sayachina anclakunata kachaykorqanku. Chantá Diosmanta mañakorqanku usqhayta sut'iyamunanta.

³⁰ Chaykamaqa barcota purichejkuna wakin ayqeyta munarqanku, chaypajtaj barcoj ñawpaqenmanta juch'uy boteta urayk'ucherqanku, anclakunata kachaykoj jinalla.

³¹ Pablotajrí capitán Juliota, soldadonkunatawan ima nerqa: Manachus barcota purichejkuna barcopi qhepakonqanku chayqa, manallataj qankunapis wañunamanta llusp'inkichejchu, nispa.

³² Pabloj nisqanta uyarispa, soldadokunaqa juch'uy botejpa waskhanta khuchurparispa, yakuman kacharparerqanku ama pipis ayqenanpaj.

³³ Sut'iyamushajtin, Pabloqa tukuyniykuta mayta mañawarqayku imatapis mikhunaykuta: Ñapis chunka tawayoj p'unchaytaña mana mikhuspa, nitaj puñuspa kankichej.

³⁴ Ama jinachu kaychej. Kawsayta munaspaqa, imitallatapis mikhurikuychej ari. Ama manchachikuychejchu, imaraykuchus ni uj chujchallapis umaykichejmanta chinkanqachu, nispa.

³⁵ Chayta niytawantaj, Pabloqa t'antata oqharispa, tukuypa rikunanta Diosman pachis nerqa, tukuyman rak'iraspataj, mikhuyta qallarerqa.

³⁶ Jinaqa tukuyniyku sonqochakuspa, mikhullarqaykutaj.

³⁷ Chay barcopi kajkuna 276 runakuna karqayku.

³⁸ T'antata sajsakunankukama mikhuytawantaj, barcota chhallayachinankupaj, trigo cargatañataj yakuman wijch'uykorqanku.

Barcoqa t'iyuman sat'iykukun

³⁹ Sut'iyamojtenqa, jallp'ata rikuspapis, barcota purichejkuna mana yacharqankuchu may cheqachus kasqanta. Jinapi uj t'iyu pampa kasqanta rikuspa, munarqanku atikojtenqa barcota chaykama chayachiyta.

⁴⁰ Chantá anclaj waskhanta k'uturparispa, yakupi saqerparerqanku. Jinallataj barcoj timonninta watana waskhatapis phaskararqanku. Chantá barcota purichina telata sayachejtinku, wayraqa barcota t'iyu pampaman qayllacherqa.

⁴¹ Chaywanpis barcoqa ujllata t'iyuman sat'iykukorqa mana kuyuriyniyojta. Qhepanmantataj qhollchoqeyashaj yakoqa wajtakamuspa, barcota phiriyta qallarerqa.

⁴² Chaypacha soldadokuna tukuynin presokunata wañurachiyta munarqanku, ni mayqenninku wayt'aspa ayqerikapunankupaj.

⁴³ Capitán Juliotajrí Pablo mana wañuchisqa kananta munaspa, jark'akorqa. Aswanpis kamacherqa tukuy wayt'ayta yachajkuna wayt'aspa ñawpajta qocha kantuman llojsinankuta.

⁴⁴ Mana wayt'ayta yachajkunatataj nerqa ñawpajta rejkunata qhatinankuta, tablakunaman mak'allikuspa, chayrí barcomanta ima p'akisqallamantapis ch'ipakuspa. Chay jinamanta tukuyninku mana imanasqa qocha kantuman chayarqanku.