Hechos 20 - DIOSPA QHELQACHISQ

Pabloqa Macedoniaman Greciamanwan rin

¹ Éfeso llajtapi ch'ajwa ch'inyajtin, Pabloqa Jesusta qhatikojkunata wajyacherqa. Chantá paykunaj sonqonkuta oqharerqa, jinataj tinkunakama kachun, nispa Macedonia jap'iyman rerqa.

² Macedoniaman chayaspataj, Pabloqa llajtamanta llajta purerqa. Paytaj sapa llajtapi wawqe panakunata watukorqa, Diospa simi nisqanwan sonqochaspa, Greciaman chayanankama.

³ Chaypi Pablo kinsa killata qhepakorqa. Chaywanpis Siriaman barcopi rinanpaj wakichikushaspa, yacharqa judiokuna payta jap'iyta munashasqankuta. Chayrayku Macedonianejta kutimporqa.

⁴ Chaypacha Pablowan khuska Asiaman rejkuna karqanku: Bereamanta Pirroj churin Sópater, Tesalonicamanta Aristarco, Segundo ima, Derbemanta Gayo, Timoteowan, Asiamanta Tíquico, Trofimowan ima.

⁵ Paykuna ñawpaykuspa, Troaspi suyawarqayku.

⁶ Noqaykutaj Filiposmanta barcopi purirerqayku Mana Levadurayoj T'anta mikhuna p'unchay qhepata. Phishqa p'unchayninmantaj noqayku paykunawan Troaspi tinkukorqayku, chaypitaj qanchis p'unchaytawan qhepakorqayku.

Pabloqa Troas llajtapi wawqe panakunata watukun

⁷ Noqayku semanaj qallariynin p'unchaypi Jesusta qhatikojkunawan khuska tantakorqayku, Jesuspa Cenanta mikhunaykupaj, chaypitaj Pabloqa Diospa simi nisqanta yachachisharqa. Q'ayantin puririnan kasqanraykutaj, chawpi tutakama yachacherqa.

⁸ Maypichus tantasqa kasharqayku, chay altopata wasipi ashkha lamparakuna k'anchasharqanku.

⁹ Jinapi Eutico sutiyoj uj wayna ventanapi tiyasharqa. Pablo unaytapuni yachachejtintaj, Euticoqa puñuywan atipachikuspa, sinch'ita puñurparerqa. Chantá chay kinsa kaj pisomanta pampaman urmaykamorqa, wawqe panakunataj payta wañusqata oqharerqanku.

¹⁰ Pablotajrí urayk'uspa, waynaj patanman k'umuykorqa, marq'ariykukuspataj wawqe panakunata nerqa: Ama mancharikuychejchu, pay kawsakushan, nispa.

¹¹ Chantá ujtawan altopataman wicharispa, Pabloqa wawqe panakunawan khuska Jesuspa Cenanta mikhorqa. Chantá sut'iyanankama Pablo yachachillarqapuni, chaymantataj riporqa.

¹² Wawqe panakunatajrí chay wañusqa waynata kawsashajta pusaykakaporqanku, may sonqochasqataj qhepakorqanku.

Pabloqa Troasmanta Miletoman rin

¹³ Chantá noqayku Asón llajtaman barcopi ñawpaykorqayku chaypi Pablota suyanaykupaj, imaraykuchus pay chakillapi riyta munarqa.

¹⁴ Noqaykuwan Asonpi tinkukuspataj, Pablopis barcoman wicharimullarqataj, jinataj khuska rerqayku Mitilene llajtaman.

¹⁵ Chaymantataj barcollapipuni rispa, q'ayantin chayarqayku Quío chimpaman, qhepan p'unchaypitaj Samos puertoman. Q'ayantintaj Mileto llajtamanñataj chayarqayku.

¹⁶ Chaypacha Pablo mana Efesoman riyta munarqachu, nillataj Asiapi unayta qhepakuyta munarqachu, Jerusalenman usqhayta chayananrayku. Aswanpis atispaqa, Pentecostés p'unchaypaj Jerusalenman chayayta munarqa.

Pabloqa Éfeso iglesiamanta kurajkunata yuyaycharin

¹⁷ Miletopi kashaspa, Pabloqa Éfeso iglesiamanta kurajkunata wajyacherqa.

¹⁸ Paykuna chayamojtinkutaj, Pablo nerqa: Qankuna allinta yachankichej, Asiaman chayamusqaymantapacha imaynatachus qankuna ukhupi purisqayta.

¹⁹ Noqaqa may llamp'u sonqowan, waqan waqan Diospa kamachiwasqanta ruwarqani, jinallataj ñak'arerqani judiokuna qhatiykachawasqankurayku.

²⁰ Manataj imatapis qankunamanta pakarqaykichejchu. Aswanpis qankunapaj imachus allin kaj chhikata willarqaykichej. Wasiykichejpi uyapura qankunaman parlarqaykichej jinallatataj tukuypa uyarinantapis yachachillarqaykichejtaj.

²¹ Ajinallatataj noqa judiokunaman, mana judío kajkunamanpis sut'ita yachacherqani Diosman kutirikunamanta, Tukuyta Kamachej Jesucristopi atinikunamanta ima.

²² Kunantajrí Santo Espirituta kasuspa, noqa Jerusalenman rishani, manataj yachanichu jaqaypi imachus noqata qhatirinawanta.

²³ Kayllata yachani: Santo Espíritu willawan sapa llajtapi runakuna carcelman wisq'anawankuta, chaypitaj ñak'arichinawankuta.

²⁴ Chaywanpis manapuni chayta manchachikunichu, nitaj wañuytapis. Aswanpis kusiywan kawsayniyta tukuchiyta munani Tukuyta Kamachej Jesuspa kamachiwasqanta junt'aspa. Jinallataj munani Diospa qhasilla k'acha yanapayninmanta sumaj willaytapis tukuyman willarayta.

²⁵ Noqaqa Diospa kamachiyninmanta tukuyniykichejman willarqaykichej. Kunanrí yachani manaña ujtawan uyayta rikunawaykichejta.

²⁶ Chayrayku sut'ita niykichej: Pillapis chinkayman rejtenqa, mana juchayojchu kasaj,

²⁷ imaraykuchus mana imata pakaspa, imatachus Dios ruwayta munasqanta qankunaman willarqaykichej.

²⁸ Chayrayku qankuna Dioswan imaynatachus purisqaykichejta qhawakuychej. Jinallataj tukuy wawqe panakunatapis michillaychejtaj, imaraykuchus Santo Espíritu qankunata churasorqachej paykunata qhawanaykichejpaj, Diospa Iglesianta michinaykichejpaj ima, mayqentachus Jesucristo kikin yawarninwan rantikorqa, chayta.

²⁹ Noqa yachani ripojtiykama, chawpiykichejman wajkuna phiña k'ita animal jina yaykuykamunankuta, tropata chinkachiyta munaspa.

³⁰ Jinallataj qankuna ukhumantapis wakinkuna sayaykonqanku, paykunataj cheqa kajta q'ewispa, Jesusta qhatikojkunamanta wakinta yachachisqankuman tukuchenqanku.

³¹ Chayrayku allinta qhawakuychej. Jinataj yuyarikuychej imaynatachus noqa kinsa wata junt'ata, tuta p'unchay waqan waqan sapa ujniykichejta yuyaychasqaymanta.

³² Kunanqa Diospa makinman churaykichej, mañaykichejtaj Diospa sonqochaj simi nisqanman jina kawsanaykichejta. Paypa simi nisqanqa manchay atiyniyojmin qankunata kallpachasunaykichejpaj, Diostaj chaynejta chayaqeykichejtapis qankunaman qosonqachej tukuy ajllakusqankunawan khuska.

³³ Noqaqa mana pejpa qolqenta, qorinta, nitaj p'achanta munapayarqanichu.

³⁴ Aswanpis qankuna yachankichej kawsanaypaj imaynatachus llank'aspa ganakusqayta, chantá noqawan purejkunapajpis.

³⁵ Ajinata ruwaspa, yachacherqaykichej llank'asqanchejwan pisichikojkunata yanapana kasqanta. Jinapi Tukuyta Kamachej Jesuspa nisqanmanta yuyarikuna: Wajmanta imatapis qorichikuspaqa kusikunchej. Wajman imatapis qosparí, astawanraj kusikunchej, nispa.

³⁶ Iglesiaj kurajninkunaman parlayta tukuytawan, Pablo qonqoriykukorqa, tukuyninkutaj Dioswan parlarikorqanku.

³⁷ Chantá tukuyninku waqarikorqanku, Pablota ojllaykuspataj, much'aykorqanku.

³⁸ Paykuna astawan sonqonkuta nanachikorqanku Pabloj nisqanmanta: Manaña ujtawan rikuwankichejchu, nispa. Chantá barcokama paywan rerqanku kacharpayamunankupaj.