Hechos 2 - DIOSPA QHELQACHISQ

Santo Espíritu jamun

¹ Pentecostés raymi p'unchay chayamojtin, Jesusta tukuy qhatejkuna uj cheqallapi tantasqa kasharqanku.

² Chantá ujllata janaj pachamanta uj sonay sinch'ita uyarikorqa, sinch'itapis wayramushanman jina. Chay sonaytaj wasi ukhuman junt'aykorqa, maypichus paykuna kasharqanku, chayman.

³ Chaymantataj paykunaman nina lawray qallu jina rikhurispa, sapa ujpa patanman tiyaykorqa.

⁴ Tukuyninkutaj Santo Espíritoj kamachiyninpi rikhurerqanku. Jinapitaj waj parlaykunapi parlayta qallarerqanku, Santo Espíritu atiyta qosqanman jina.

⁵ Chaypacha Jerusalén llajtapi kasharqanku Diosta manchachikoj judiokuna, pikunachus kay pachapi kaj tukuy suyumanta jamorqanku, chaykuna.

⁶ Chay runakunataj sonajta uyarispa, tantakamorqanku. Chantá paykuna Jesuspa kuraj kachankunata uyarerqanku sapa ujninku kikin parlayninkupi parlajta. Chayrayku chay runakuna imachus kasqanta mana yuyaychakuyta aterqankuchu.

⁷ Jinapi manchaytapuni t'ukuspa, ninakorqanku: Manachu kay tukuy parlajkuna Galileamanta kankuri?

⁸ Imaynamantataj sapa ujninchej parlayninchejpi parlajta uyarishanchej?

⁹ Noqanchej wakin kanchej Partiamanta, Mediamanta, Elammanta, Mesopotamiamanta, Judeamanta, Capadociamanta, Pontomanta, Asiamanta ima.

¹⁰ Chantá kallankutaj Frigiamanta, Panfiliamanta, Egiptomanta, Cirene qayllapi Libiamanta kajkuna ima. Kallankutaj Roma llajtamanta jamojkunapis. Wakinninchej judiokuna kanchej, wakintaj judiokunaj yachachiyninta qhatikojkuna.

¹¹ Kallankutaj Cretamanta, Arabiamantapis. Chaywanpis kunan tukuyninchej kikin parlayninchejpi Diospa may jatuchaj t'ukuna ruwasqanmanta willashajta uyarishanchej, nispa.

¹² Paykunataj mayta t'ukuspa, tapunakusharqanku: Ima niytataj kay munanri? nispa.

¹³ Wajkunatajrí alqochakuspa, nerqanku: Kaykuna machasqa kashanku á, nispa.

Pedroqa Jesusmanta willan

¹⁴ Chantá Pedroqa Jesuspa chunka ujniyoj kuraj kachankunawan khuska kashaspa, sayariytawan jatunmanta parlarqa: Judiokuna, Jerusalenpi tukuy tiyakojkuna ima, kayta qankuna yachanaykichej tiyan. Chayrayku allinta uyariwaychej.

¹⁵ Kaykuna machasqa kasqankuta nishankichej chaypis, paykuna mana machasqachu kashanku, imaraykuchus jisq'on kaj phanillaraj kashan.

¹⁶ Aswanpis kaymanta Diosmanta ñawpaj sut'inchaj Joel kay jinata sut'incharqa:

¹⁷ Dios nin imachus qhepa p'unchaykunapi kananta: Tukuy runaman Espirituyta qosaj. Jinataj churiykichej, ususiykichejpis Diosmanta sut'inchanqanku. Qankuna ukhumanta waynakunaqa mosqoypi jina rikonqanku, machu runaykichejkunapis mosqokullanqankutaj.

¹⁸ Chay p'unchaykunallapitaj Espirituyta qosaj qhari kamachiykunaman, ajinallatataj warmi kamachiykunamanpis, paykunataj noqamanta sut'inchanqanku.

¹⁹ Janajpi t'ukuna imakunata ruwasaj, kay pachapitaj runaj mana jayk'aj rikusqanta rikhurichisaj: Yawar kanqa, nina lawray, q'oshñi phuyutaj.

²⁰ Jinallataj inti laqhayaykonqa, killataj yawar jina pukayaykonqa, manaraj Tata Diospa may t'ukuna jatun p'unchaynin rikhurimushajtin.

²¹ Chaywanpis pillapis Tata Diospa sutinta oqharispa Diosninpaj rejsikapojqa qhespichisqa kanqa, nispa.

²² Israelitakuna, kay nisqayta uyariwaychej: Diosqa qankunaman sut'ita rejsicherqa Nazaret llajtayoj Jesuspuni paypa kachamusqan kasqanta, qankuna ukhupi paynejta t'ukuna imakunata, runaj mana jayk'aj rikusqanta ima ruwaspa. Chayta allinta yachankichej, imaraykuchus qankuna ukhupipuni chay karqa.

²³ Chaywanpis Dios imachus kananta yacharqaña, jinataj ñawpajmantapacha imatachus wakichisqanman jina Jesús qankunaman jaywaykusqa karqa. Qankunataj millayta ruwaj runakunawan payta cruzman chakatachispa, wañucherqankichej.

²⁴ Diostajrí Jesusta wañusqamanta kawsarichimporqa, jinataj wañuypa ñak'arichiyninmanta kacharicherqa, imaraykuchus wañoyqa mana payta atiyninpi jap'iyta aterqachu.

²⁵ Kuraj kamachej Davidpis Jesusmanta nerqa: Tata Dios noqallawanpuni kashasqanta rikuni. Pay pañaypi kashan, nitaj imapis urmachiwanqachu.

²⁶ Chayrayku sonqoy kusikun, simiytaj may kusisqa takirin, jinallataj tukuy ukhuypis Diosmanta allin kajta suyakuspa, samarin.

²⁷ Diosníy, qanqa wañusqakunatawan khuska mana saqerpayawankichu, nitaj noqa ajllakusqaykej aychay asnapunantapis.

²⁸ Manachayqa kawsayman pusaj ñanta rejsichiwanki. Qan noqawan kaspataj, kusiywan junt'achiwanki, nispa.

²⁹ Munasqa israelita wawqekuna, kayta sut'ita niyta munaykichej ñawpa tatanchej Davidmanta. Yachankichej jina, pay wañuporqa, p'ampasqa karqa, jinataj kunan p'unchaykama covachan noqanchejwan kakushan.

³⁰ Davidrí Diosmanta sut'inchaj karqa, paymantaj Dios tiluspa nisqa Davidpa mirayninmanta ujnin kajta kamachinan tiyanapi tiyaykuchinanta.

³¹ Davidtaj ñawpajmantaña yacharqa imachus kananta. Chayrayku Cristoj kawsarimpunanmanta parlaspa, nerqa aya p'ampanapi p'ampasqa mana qhepakunanta, nitaj aychanpis asnapunanta.

³² Diosqa kay Jesustamin wañuymanta kawsarichimorqa. Chaytataj tukuyniyku rikorqayku.

³³ Chaymantataj Diosqa Jesusta pañanman tiyaykucherqa. Payllataj Santo Espirituta Jesusman qorqa. Kunantaj Jesús Santo Espirituta kachamun, imaynatachus kunan rikushankichej, uyarishankichej, ajinata.

³⁴ Mana Davidchu janaj pachaman oqharisqa karqa. Chaywanpis pay kay jinata nerqa: Tata Diosqa Tukuyta Kamachejniyta nerqa: Kay pañaynejpi tiyakuy,

³⁵ awqaykikunata chakiyki uraman churanaykama, nispa.

³⁶ Chayrayku tukuy israelitakuna, kayta allinta yachaychej: Kay Jesusta, pitachus qankuna cruzman chakatarqankichej, paytamin Dios churan Tukuyta Kamachej kananpaj, Cristo kananpajtaj, nispa.

³⁷ Pedro imatachus nisqanqa sonqonkuman chayarqa, paykunataj maytapuni llakikorqanku. Chayrayku Pedroman, Jesuspa chay ujkuna kuraj kachankunamanwan nerqanku: Kunanqa, wawqekuna, imatataj ruwasqaykuri? nispa.

³⁸ Pedrotaj kuticherqa: Sapa ujniykichej Diosman kutirikuychej, jinaspataj, Jesucristoj sutinpi bautizachikuychej, Jesusqa Diospa kachamusqan kasqanta rejsikapuspa. Ajinamanta Dios juchaykichejta pampachanqa, jinataj Santo Espirituta qosonqachej.

³⁹ Ajinata Dios ruwanqa, imaraykuchus pay nisqaña Santo Espirituta qankunaman qonanta, wawaykichejkunaman, tukuy karu suyukunapi kajkunamanpis, pikunatachus Dios wajyan, chaykunaman, nispa.

⁴⁰ Ajinata Pedroqa parlaspallapuni chay runakunata sumajmanta tukuy sonqo reparacherqa. Paykunata sonqochaspataj, nerqa: Qankuna kay mana kasukoj runakunaj mirayninmanta t'aqakuychej, nispa.

⁴¹ Ajinamanta Pedroj yachachisqanta jap'ikojkuna bautizachikorqanku, chaypachataj Jesusta qhatikojkunaman 3.000 jina yapakorqanku.

⁴² Paykunataj Jesuspa kuraj kachankunaj yachachisqankuta tukuy sonqo jap'ikorqanku. Jinataj ujkuna ujkuna k'achata kawsakorqanku, Jesuspa Cenantapis khuska mikhoj kanku, Dioswantaj parlarikoj kanku ima.

Ñawpa iglesiaj kawsaynin

⁴³ Chaypacha Jesuspa kuraj kachankunanejta Dios ashkha t'ukuna imakunata, chantá runaj mana jayk'aj rikusqan t'ukunata ima ruwarqa yachayta qonanpaj Diosmantapuni kasqankuta. Chayraykutaj chayta tukuy rikojkuna t'ukorqanku.

⁴⁴ Chantá Jesucristopi tukuy atinikojkunaqa khuskallapuni kaj kanku, tukuy kapuyninkuwantaj yanapanakoj kanku.

⁴⁵ Wakinkunaqa jallp'ankuta, waj kapuyninkutawan ima vendespa, chay qolqewan yanapanakoj kanku sapa uj pisichikusqanman jina.

⁴⁶ Chantá Temploj pationpi tukuyninku sapa p'unchay uj sonqolla tantakojpuni kanku. Wasinkupipis paykuna Jesuspa Cenanta ruwaj kanku, jinataj mikhunatapis khuska mikhoj kanku may kusiywan, llamp'u sonqowantaj.

⁴⁷ Jinallataj paykuna Diosta yupaychallarqankupuni, runakunataj allin ñawiwan paykunata qhawaj kanku. Chantá Tukuyta Kamachej Jesusqa sapa p'unchay Iglesiaman yapasharqa, pikunachus qhespichisqa kananku karqa, chaykunata.