Hechos 18 - DIOSPA QHELQACHISQ

Pabloqa Corintopi

¹ Chay qhepata Pabloqa Atenas llajtamanta ripuspa, Corinto llajtamanñataj rerqa.

² Chaypitaj tinkukorqa Ponto llajtayoj Aquila nisqa uj judío runawan. Paywan, Priscila warminwan Italiamanta jampusqankoqa mana unayrajchu karqa. Paykuna Corintoman jampusqanku, imaraykuchus kuraj kamachej Claudio tukuy judiokuna Roma llajtamanta ripunankuta kamachisqa. Jinapi Pabloqa paykunata watukamoj rerqa.

³ Chantá Pablo paykunawan qhepakorqa toldokunata ruwaysikuspa, imaraykuchus Pabloqa paykuna jina toldo ruwayta yacharqa.

⁴ Sapa samarina p'unchaypitaj Pabloqa judiokunaman, griegokunaman ima Jesusmanta sumaj willayta yachachej, paykuna Jesuspi atinikunankuta munaspa.

⁵ Jayk'ajchus Silaswan, Timoteowan Macedoniamanta chayamorqanku, chaymantapacha Pablo toldo ruwanata saqespa, Diospa simi nisqanta judiokunaman willaspa purerqa, Jesusqa Cristopuni kasqanta sut'inchaspa.

⁶ Paykunarí Pabloj contranpi oqharikuspa, Diospa contranta rimaspa ima churanakojtinku, Pabloqa ñawpaqenkupi p'achanta thalarakorqa mana allinta ruwasqankuta yachayta qospa. Paykunamantaj nerqa: Dios jasut'isojtiykichejqa, noqaqa mana juchayojchu kasaj. Kunanmantapacha mana judío kajkunaman yachachej risaj, nispa.

⁷ Chayta niytawan, Pabloqa judiokunaj tantakunanku wasimanta llojsispa, Ticio Justo sutiyojpa wasinman riporqa. Payqa Diosta yupaychaj mana judío karqa, wasintaj judiokunaj tantakuna wasi qayllapi karqa.

⁸ Chaymantataj judiokunaj tantakunanku wasipi kamachej Crispopis Jesuspi atinikorqa, tukuy wasi ayllunwan ima. Corintopi tiyakojkunamantapis ashkha runakuna Jesusmanta uyarispa, paypi atinikorqanku, chantá bautizachikorqanku ima.

⁹ Uj tutarí Tukuyta Kamachej Jesús mosqoypi jina Pabloman rikhurispa, nerqa: Ama manchachikuspa, noqamanta wajkunaman willallaypuni, amataj ch'inyakuychu.

¹⁰ Noqamin qanwan kashani, manataj pipis imanasonqachu, imaraykuchus kay llajtapi may chhika runakuna noqapi atinikonqanku, nispa.

¹¹ Ajinamanta Pabloqa Corintopi qhepakorqa wata sojta killayojta Diospa simi nisqanta yachachispa.

¹² Ajaya suyupi Galión kamachishajtin, wakin judiokuna uj yuyaylla Pabloj contranpi oqharikuspa, kamachejman payta aparqanku ch'ataykunankupaj.

¹³ Chaypitaj kamachej Galionta nerqanku: Kay runaqa yachachishan waj jinamanta Diosta yupaychanata, mana Diospa kamachisqanman jinachu, nispa.

¹⁴ Chaywanpis Pablo parlananpaj jina kashajtin, kamachej Galionqa judiokunata nerqa: Sichus kay runa ima mana allinkunata ruwanman karqa, chayrí ima jatun juchatapis chayqa, noqaqa cheqamanta uyariykichejman karqa.

¹⁵ Qankunarí ch'ajwashankichej wakin simi nisqakunallamanta, sutikunamanta, chantá Diosniykichejpa kamachisqankunamanta ima. Chayrayku qankunapuralla chaymanta allinchaychej. Chaykunamantaqa noqa mana juez kayta munanichu, nispa.

¹⁶ Ajinata nispataj, kamachej Galión juzgadomanta judiokunata qharqorqa.

¹⁷ Chantá paykuna tantakunanku wasi kamachej Sóstenes sutiyojta jap'ispa, juzgadopi payta maqarqanku. Galiontajrí mana rikoj tukorqa.

Pablo Antioquiaman kutirin

¹⁸ Pabloqa unaytaraj Corintopi qhepakorqa. Chaymantataj wawqe panakunaman: Tinkunakama kachun nispa, Aquilawan, warmin Priscilawan khuska Cencrea llajtaman purirerqanku. Cencrea llajtapitaj Pabloqa umanta raphachikorqa, yachayta qonanpaj imatachus Diosman ruwasaj nisqanta junt'asqanmanta. Chantá boteman wicharerqanku Siria jap'iyman rinankupaj.

¹⁹ Éfeso llajtaman chayajtinkutaj, Pabloqa Priscilata, Aquilatawan chaypi saqerqa, chaymantataj judiokunaj tantakunanku wasiman yaykorqa. Chaypitaj paykunaman Jesusmanta yachacherqa, paypi atinikunankuta munaspa.

²⁰ Chantá paykuna Pablota nerqanku paykunawan aswan unayta qheparikunanta, paytajrí mana munarqachu.

²¹ Puririshaspataj, paykunata nerqa: Dios munajtenqa, ujtawan kutimusaj qankunata watukunaypaj, nispa. Chayta niytawantaj, Éfeso llajtaman riporqa.

²² Cesareaman chayaspataj, Pabloqa Jerusalenmanñataj rerqa iglesiata watukoj. Chaymantataj Antioquiaman kutirerqa.

²³ Pabloqa uj chhikanta Antioquiapi qheparikorqa, chaymantataj pay rerqa tukuy Galacia jap'iynejta, Frigia jap'iynejta ima. Kantumanta purispataj, Jesusta tukuy qhatikojkunata kallpacharqa.

Apolos Efesopi Jesusmanta willan

²⁴ Chaypacha Alejandriamanta Apolos sutiyoj uj judío Efesoman chayamorqa. Pay sumajta parlaj, Diospa Qhelqachisqantapis allinta yachaj.

²⁵ Apolos wakin imakunallata Tukuyta Kamachej Jesuspa cheqan ñanninmanta yacharqa, paytaj tukuy sonqo Jesusmanta maychus kajta yachachej. Chaywanpis payqa Bautizaj Juanpa yachachisqallanmanta yacharqa.

²⁶ Payqa mana manchachikuspa, Jesusmanta willayta qallarerqa judiokunaj tantakunanku wasipi. Apolosta uyarispataj, Priscila, Aquilawan wasinkuman pusarqanku, chaypitaj payman Diospa cheqan ñanninmanta aswan sut'ita yachacherqanku.

²⁷ Chantá Apolos Ajaya jap'iyman riyta munajtin, Efesopi wawqe panakuna nerqanku pay rinantapuni. Jinaspataj, Jesusta qhatikojkunaman cartata apacherqanku, Ajayapi Apolosta tukuy sonqo jap'inankupaj. Ajayaman chayaspataj, Apolosqa Diospa qhasilla k'acha yanapayninnejta Jesuspi atinikojkunata mayta yanaparqa.

²⁸ Tukuypa uyarinanta Apolosqa judiokuna pantasqa kasqankuta sut'ita reparacherqa. Jinataj Diospa Qhelqachisqannejta sut'ita rikucherqa Jesusqa Cristopuni kasqanta.