Hechos 12 - DIOSPA QHELQACHISQ

Santiagota wañuchinku, Pedrotataj wisq'achinku

¹ Chaypacha kuraj kamachej Herodesqa iglesiamanta wakinkunata ñak'arichiyta qallarerqa.

² Ajinamanta Juanpa wawqen Santiagota espadawan wañuchicherqa.

³ Chay ruwasqan judiokunapaj sumaj kasqanta rikuspa, Herodesqa Pedrotañataj jap'icherqa. Chay karqa Mana Levadurayoj T'anta Mikhuna raymi p'unchay qayllapi.

⁴ Herodesqa Pedrota jap'ichispa, carcelman wisq'acherqa. Chaypitaj tawa t'aqa soldadokuna Pedrota qhawasharqanku. Sapa t'aqapi tawa soldadokuna karqanku. Herodesqa Pascua raymi pasayta Pedrota orqhomuyta munarqa runakunaj ñawpaqenman payta juzgaspa, wañuchichinanpaj.

⁵ Ajinamanta Pedro carcelpi wisq'asqa kashajtin, iglesiamanta kajkuna mana sayk'uspa paypaj Diosmanta mañapusharqanku.

Uj ángel Pedrota carcelmanta orqhon

⁶ Herodes Pedrota juzgananpaj orqhochimunan kashajtin, chay tuta Pedro iskay soldadokuna chawpipi puñusharqa, iskay cadenawan watasqa. Waj soldadokunapis cárcel punkuta qhawasharqanku.

⁷ Chayllaman Tukuyta Kamachej Jesuspa angelnin rikhurimorqa, chay carcel ukhumantaj k'anchay junt'aykorqa. Angeltaj Pedrota wajtanninpi takaspa, rijch'aricherqa, nerqataj: Usqhayta jatariy, nispa. Jinapi Pedroj makinpi watasqa cadena ujllata phaskarasqa t'akarakorqa.

⁸ Chantá chay ángel nillarqataj: Chumpiykita mat'iykukuy, juk'utaykitapis churakuy, nispa. Pedro ajinata ruwajtintaj, angelqa payta nerqa: Kunanqa patanchana p'achaykiwan qhataykukuspa, qhatiway, nispa.

⁹ Pedroqa angelpa qhepanta carcelmanta llojsishaspa, mana yacharqachu angelpa ruwasqan mosqoypichus, sut'ipichus kasqanta. Aswanpis pay yuyasharqa mosqoypi jinalla rikushasqanta.

¹⁰ Chaywanpis ñawpaj kaj t'aqa soldadokunaj ñawpaqenta pasallarqanku, jinallatataj iskay kaj t'aqatapis pasallarqankutaj fierro punkuman chayanankukama. Calleman llojsej punkutaj pachallanmanta kicharikorqa. Chantá llojsispataj, uj calleta rishajtinku, angelqa Pedromanta t'aqakuspa, chinkarerqa.

¹¹ Jinapi Pedroqa yuyayninman kutirispa, nerqa: Kunanqa yachani cheqatapuni Tukuyta Kamachej Jesusqa angelninta kachamusqanta Herodespa makinmanta kacharichinawanpaj, jinallataj judiokunaj millay ruwayta munasqankumantawan, nispa.

¹² Pedro chayta reparakuspa, Marcos nisqa Juanpa maman Mariajpa wasinman kachaykukorqa. Chaypitaj ashkha wawqe panakuna tantakuspa, Dioswan parlarikusharqanku.

¹³ Chantá chayman chayaspa, Pedro calle punkuta takarqa, chaymantaj uj sipas Rode sutiyoj punkuman rerqa, pichus kasqanta yachaj.

¹⁴ Jinapi Rodeqa Pedroj parlasqanta rejsirparispa, kusiywan punkuta mana kicharispalla, wawqe panakunaman kutiykorqa, nerqataj: Pedro punkupi kashan, nispa.

¹⁵ Paykunatajrí nerqanku: Locayapunkichu imatajri? nispa. Paytaj nillarqapuni Pedro kasqanta. Paykunarí nerqanku: Chayqa Pedroj angelnillanchá, nispa.

¹⁶ Chaykama Pedroqa punkuta takashallarqapuni. Chaymantaña punkuta kicharejtinkukamataj, payta rikuspa, t'ukushaj qhepakorqanku.

¹⁷ Pedrotaj makinwan señata ruwaspa, paykunata ch'inyacherqa. Chantá paykunaman willarqa imaynatachus Tukuyta Kamachej Jesús carcelmanta payta orqhochimusqanta. Nerqataj: Kay tukuy imamanta Santiagoman willamuychej, wawqe panakunaman ima, nispa. Chaymanta llojsispataj, wajnejman riporqa.

¹⁸ Q'ayantin paqarin, soldadokuna ukhupi manchay ch'ajwa karqa Pedro chinkasqanmanta.

¹⁹ Herodestaj tukuynejta mask'acherqa, nitaj Pedrota tarerqankuchu. Chantá chay qhawaj soldadokunatañataj allinta tapucherqa, mana imatapis yachajtinkutaj, paykuna wañuchisqa kanankuta kamacherqa. Chaymantataj Herodesqa Judeamanta Cesareaman rerqa, chaypitaj qhepakorqa.

Herodes khuruykusqa wañun

²⁰ Kuraj kamachej Herodesqa chaypacha manchay phiñasqa karqa Tiro llajtamanta kajkunapaj, Sidón llajtamanta kajkunapajwan. Chayrayku paykuna uj yuyaylla tantaykukuspa, kamachej Herodeswan parlaj rerqanku. Ñawpajtaqa Herodespa mayordomon Blastoman lluk'iykorqanku, paynejta Herodeswan allinyakunankupaj, imaraykuchus paykuna Herodespa suyunmanta mikhunata rantej kanku.

²¹ Jinapi Herodesqa wajyachisqan p'unchaypi kamachinan p'achawan p'achallisqa kamachinan tiyanapi tiyaykukorqa. Chantá paykunaman unayta parlarqa.

²² Chay runakunataj qhaparerqanku: Kayqa Diospa parlasqanmin, mana runajtachu, nispa.

²³ Chay kikinpitaj Tukuyta Kamachej Diospa angelnenqa Herodesta sinch'ita onqoykucherqa, Diosta mana jatunchasqanrayku. Jinataj kuraj kamachej Herodesqa khuroj tukusqan wañorqa.

²⁴ Jesucristota qhatejkunarí Diospa simi nisqanta tukuynejpi willasharqanku, ashkha runataj Jesuspi atinikorqanku.

²⁵ Chantá Bernabé, Saulo ima ruwanankuta Jerusalenpi tukuspa, Antioquiaman kutiporqanku, Marcos nisqa Juanta pusariykukuspa.