Hechos 11 - DIOSPA QHELQACHISQ

Pedroqa Jerusalén iglesiaman willan

¹ Jesuspa waj kuraj kachankuna, Judeapi kaj wawqe panakuna ima uyarerqanku mana judío kajkunapis Diospa simi nisqanta jap'ikusqankuta.

² Chantá Pedro Jerusalén llajtaman kutipojtin, Jesusta qhatikoj judiokunamanta payta k'amerqanku:

³ Imaraykutaj qan mana judío kajkunaj wasinkuman yaykorqanki, paykunawantaj mikhorqankiri? nispa.

⁴ Chantá Pedro paykunaman kantumanta imachus kasqanta willarqa.

⁵ Pay nerqa: Jope llajtapi kashaspa, noqa Dioswan parlarikusharqani. Chayllapi mosqoypi jina rikorqani janaj pachamanta urayk'amushajta uj jatun qhatanaman rijch'akojta, tawantin puntanmanta watasqata. Chay qhatanataj ñawpaqeyman urayk'amorqa.

⁶ Chantá qhatanata allinta qhawaykuspa, noqa rikorqani kay pachapi kaj tawa chakiyoj animalkunata, k'ita animalkunata, katarikunata, p'isqokunata ima.

⁷ Uj parlamojtataj uyarerqani: Pedro sayariy, kaykunamanta imatapis wañuchispa, mikhuy, nispa nejta.

⁸ Noqatajrí nerqani: Tukuyta Kamachej Jesusníy, manapuni noqaqa kunankama ni jayk'aj mikhorqanichu Moisespa kamachisqanpi imatachus ch'ichipaj qhawasqa kasqanta nin, chaykunata, nispa.

⁹ Chantá janaj pachamanta uj kutitawan nimuwarqa: Imatachus Dios llimphuña kasqanta nin, ama qan ch'ichi kasqanta niychu, nispa.

¹⁰ Chaytaj jina karqa kinsa kutikama, chaymantataj qhatanaman rijch'akojqa janaj pachaman oqharisqa karqa.

¹¹ Chay jinallapi kinsa runakuna Cesareamanta chayamorqanku, maypichus kasharqani, chay wasiman, paykunataj noqata mask'ashawarqanku.

¹² Santo Espiritutaj kamachiwarqa ama iskayrayaspa paykunawan rinayta. Jopemanta kay sojta wawqekunapis noqawan rerqanku. Chantá Cesareaman chayaspa, Cornelioj wasinman yaykorqayku.

¹³ Chaypacha pay willawarqayku imaynatachus uj angelta ñawpaqenpi sayashajta rikusqanta. Chay angeltaj payta nisqa: Runakunata Jopeman kachay, Simón Pedro nisqata pusamunankupaj.

¹⁴ Paytaj nisonqa imaynatachus qan, tukuy aylluykiwan qhespichisqa kanaykichejta, nispa.

¹⁵ Noqa Cesareapiña kashaspa, paykunaman parlayta qallarejtiykama, Santo Espíritu paykunaman urayk'amorqa, imaynatachus qallariypi noqanchejman urayk'amorqa, ajinallatataj.

¹⁶ Chaypachataj Tukuyta Kamachej Jesuspa kay nisqanmanta yuyarikorqani: Juanqa yakuwan bautizarqa, qankunatajrí Santo Espirituwan bautizasqa kankichej, nispa.

¹⁷ Sichus Dios paykunamanpis chay kikin Santo Espirituta qorqa, mayqentachus noqanchejman qowarqanchej Tukuyta Kamachej Jesucristopi atinikusqanchejrayku chayqa, pitaj noqa karqani Diosta jark'anaypajri? nispa.

¹⁸ Pedroj nisqanta uyarispa, chay wawqekunaqa manaña imatapis nerqankuchu. Astawanpis Diosta yupaycharqanku, nerqankutaj: Ajinaqa mana judío kajkunapis Diosman kutirikojtinku, Dios paykunamanpis wiñay kawsayta qollantaj, nispa.

Antioquía llajtapi kaj iglesia

¹⁹ Runakuna Estebanta wañuchisqankumanta qhepata, paykunallataj Jesusta qhatikoj chay waj wawqekunatapis ñak'arichiyta qallarerqanku. Chay wawqekunataj Jerusalenmanta ch'eqeraspa, Feniciakama, Chiprekama, chantá Antioquiakama ima chayasqanku. Chaypitaj Jesusmanta sumaj willayta judiokunallaman willasqanku, manataj wajkunamanqa.

²⁰ Jinallataj Jesusta qhatikojkunamanta wakinkuna Chipremanta, Cirenemanta ima, Antioquiaman chayaspa, mana judío kajkunamanpis Tukuyta Kamachej Jesusmanta willarqanku.

²¹ Jinataj Dios atiyninwan chay wawqekunata yanapasqanrayku, ashkha runakuna Diosman kutirikuspa Jesuspi atinikorqanku.

²² Jerusalén iglesiamanta kajkunataj chay tukuy imata yachaspa, Bernabeta Antioquía llajtaman kacharqanku.

²³ Bernabetaj Antioquiaman chayaspa, imatachus Dios qhasilla k'acha yanapayninnejta ruwashasqanta rikorqa. Chaymantataj kusikuspa, chay wawqe panakunata yuyaycharqa Tukuyta Kamachej Jesucristota tukuy sonqo kasunallankutapuni.

²⁴ Bernabeqa k'acha runa karqa, Santo Espíritoj kamachiyninpi purej, jinallataj Jesuspi sinch'ita atinikorqa. Chayrayku Jesusmanta willasqannejta ashkha runakuna Jesuspi atinikorqanku.

²⁵ Chay qhepata Bernabeqa Tarso llajtaman rerqa Saulota mask'aj.

²⁶ Payta tariytawantaj, Antioquiaman pusamorqa. Chantá iskayninku uj wata junt'ata chay iglesiawan qhepakorqanku, ashkha runaman Jesucristomanta yachachispa. Chaypacha Antioquiapi runakuna Jesusta qhatikojkunata sutichayta qallarerqanku: Cristota qhatikojkuna, nispa.

²⁷ Chaypacha Diosmanta wakin sut'inchajkuna Jerusalenmanta Antioquiaman rerqanku.

²⁸ Jinapi paykunamanta ujnin Agabo sutiyoj sayarerqa, Santo Espíritoj yuyaychasqan kaspataj, nerqa: Manchay jatun yarqhay jamonqa tukuy suyunchejman, nispa. Chay nisqantaj junt'akorqa Claudio kamachishajtin.

²⁹ Chantá Antioquiapi kaj wawqe panakuna nerqanku sapa uj kapusqanman jina qolqeta tantaspa, apachinankuta Judeapi kaj wawqe panakunaman.

³⁰ Ajinata ruwaspataj, chay qolqeta apacherqanku Bernabewan, Saulowan ima Jerusalenpi iglesiaj kurajninkunaman.