Hechos 10 - DIOSPA QHELQACHISQ

Diosqa Corneliota parlapayan

¹ Cesarea llajtapi uj runa karqa Cornelio sutiyoj. Payqa Italiano nisqa romano soldadokunata kamachej capitán karqa.

² Cornelioqa Diosta may jatun respetowan qhawaj karqa, cheqanta ruwaj runataj. Wasinpipis tukuy ayllunwan khuska Diosta yupaychaj. Payqa tukuy imapi wajcha runakunatapis yanapaj, jinallataj sapa kuti Dioswan parlarikoj.

³ Uj kuti, chawpi p'unchay pasayta, Cornelioqa mosqoypi jina sut'ita rikorqa Diospa angelninta, maypichus pay kasharqa, chayman yaykumojta. Chay angeltaj nerqa: Cornelio, nispa.

⁴ Corneliotaj angelta qhawarispa, manchachikuywan nerqa: Imatataj munashanki, wiraqochíy? nispa. Angeltaj kuticherqa: Diosqa mañarikusqaykita uyarisunki, jinallataj wajchakunata yanapasqaykitapis rikullantaj.

⁵ Chayrayku kunanqa Jopeman wakin runakunata kachay, Pedro nisqa Simonta wajyamunankupaj.

⁶ Payqa suela ruwaj Simonpa wasinpi kashan, mama qocha kantupi, nispa.

⁷ Chay parlapayaj ángel ripojtinkama, Cornelioqa wajyarqa iskay kamachinkunata, Diosta yupaychaj uj soldadotawan, pichus sumaj yanapajnin karqa, chayta.

⁸ Paykunaman tukuy imata willaspataj, Jope llajtaman kacharqa.

Diosqa Pedrota parlapayan

⁹ Q'ayantenqa chay kachakuna Jopeman qayllashajtinkuña, Pedroqa chawpi p'unchaynejta, wasi pataman wicharerqa, maypichus pampalla karqa chayman, Dioswan parlarikunanpaj.

¹⁰ Jinapitaj yarqhachikuspa, mikhuyta munarqa. Chantá wasiyojkuna mikhunata wayk'unankukama, Pedroqa mosqoypi jina janajta kicharisqata rikorqa.

¹¹ Chantá rikullarqataj uj jatun yuraj qhatanaman rijch'akojta tawa puntanmanta watasqata. Chaytaj janaj pachamanta pampaman urayk'amusharqa.

¹² Chay qhatanaman rijch'akojpitaj Pedro kay pachapi kaj tukuy imaymana animalkunata rikorqa: Tawa chakiyojkunata, katarikunata, p'isqokunata ima.

¹³ Chantá uj parlamojta uyarerqa: Pedro, sayariy, chaykunamanta mayqentapis wañuchispa, mikhuy, nispa nejta.

¹⁴ Pedrotajrí kuticherqa: Tukuyta Kamachej Jesusníy, manapuni noqaqa kunankama ni jayk'aj mikhorqanichu Moisespa kamachisqanpi imatachus ch'ichipaj qhawasqa kasqanta nin, chaykunata, nispa.

¹⁵ Parlamojtajrí watej nimorqa: Imatachus Dios llimphuña kasqanta nin, chayta ama qan ch'ichi kasqanta niychu, nispa.

¹⁶ Chaytaj jina karqa kinsa kutikama, chaymantataj chay qhatanaman rijch'akojqa pataman oqharisqa karqa.

¹⁷ Pedrorí chayta rikusqanmanta mayta t'ukusharqa: Imatataj chay niyta munanri? nispa. Jinallaman Cornelioj kachamusqankuna tapukuspa, tapukuspa Simonpa wasin punkukama chayamorqanku.

¹⁸ Wajyaspataj, taporqanku: Simón Pedro kaypichu? nispa.

¹⁹ Pedro chay rikusqanpi yuyashajtillanpuni, Santo Espíritu payta nerqa: Kinsa runakuna mask'ashasunku.

²⁰ Chayrayku sayarispa, urayk'ullay. Chantá mana iskayrayaspa, paykunawan rillay, imaraykuchus noqamin paykunata kachamuni, nispa.

²¹ Jinataj Pedro urayk'uspa, chay runakunata nerqa: Noqa kani, pitachus mask'ashankichej, chay. Imamantaj jamunkichejri? nispa.

²² Paykunataj kuticherqanku: Capitán Cornelio kachamuwayku. Payqa cheqan runa, Diostataj jatun respetowan qhawan. Judío masiykikunapis payta jatunpaj qhawanku. Chantá Diospa angelnenqa Cornelioman rikhurispa, nerqa qanta wasinman wajyachisunanta, imatachus parlanaykita uyarinanpaj, nispa.

²³ Chaymantataj Pedro chay kachakunata wasi ukhuman pusaykorqa, chaypitaj chay tuta puñorqanku. Q'ayantintaj, jatariytawan, Pedro chay kachakunawan rerqa. Jope llajtayoj wakin wawqekunapis Pedrowan khuska rillarqankutaj.

Pedroqa Jesucristomanta Cornelioman willan

²⁴ Q'ayantin p'unchayqa Cesareaman chayarqanku. Chaypitaj Cornelio paykunata suyasharqa tukuy ayllunwan, kawsaqenkunawan ima.

²⁵ Jinapi Pedro wasiman yaykushajtin, Cornelio taripaj llojsimuspa, Pedroj ñawpaqenman pampakama k'umuykukorqa payta yupaychananpaj.

²⁶ Pedrorí Corneliota aysarispa, nerqa: Ama chayta ruwaychu, sayarillay. Noqapis qan jina runallataj kani, nispa.

²⁷ Ajinata Pedroqa Corneliowan parlaspa, wasinman yaykorqa, chaypitaj ashkha runata tantasqata rikorqa.

²⁸ Pedrotaj paykunata nerqa: Qankuna yachankichej jina, noqayku judiokuna mana tantakuyta atiykuchu mana judío kajkunawanqa. Kunanrí, Dios yachachiwan ama pitapis ch'ichipaj nitaj pisipaj qhawanayta.

²⁹ Chayrayku wajyachimuwajtiykichejkama, mana iskayrayaspa jamuni. Kunantaj yachayta munayman imapajchus wajyachiwasqaykichejta, nispa.

³⁰ Chantá Cornelio kuticherqa: Tawa p'unchayña kashan, kunan jina samay phani jinata kay wasiypi Dioswan parlarikushajtiy, chayllapi lliphipej p'achayoj uj qhari ñawpaqeypi rikhurerqa.

³¹ Paytaj niwarqa: Cornelio, Diosqa mañakusqaykita uyarisunki, wajchakunata yanapasqaykimantapis yuyarikullantaj.

³² Chayrayku qan Jopeman runakunata kachay ari, Simón Pedro nisqata pusamunankupaj. Payqa suela ruwaj Simonpa wasinpi kashan mama qocha kantupi, nispa.

³³ Chay ratopachataj noqa kachaykunata qanman kachamorqani. Qantaj allinta ruwanki kayman jamurispa. Kunanqa tukuyniyku Diospa ñawpaqenpi tantasqa kashayku, imatachus Dios willasusqanta uyarinaykupaj, nispa.

³⁴ Chantá Pedro parlayta qallarerqa: Cheqatapuni reparani Diosqa mana wakillantachu allinpaj qhawasqanta.

³⁵ Manachayqa mayqen suyullamantapis kachun, pichá Diosta jatun respetowan qhawan, cheqa kajtataj ruwan, chay runatamin Dios allinpaj qhawan.

³⁶ Uyarinkichejña Dios Israelpa mirayninman kay sumaj willayta willasqanta: Payqa runakunata paywan allinyachin Jesucristonejta, pichus Tukuyta Kamachej kashan, chaynejta.

³⁷ Qankuna yachallankichejtaj tukuy Judeapi imachus kasqanta, Galileamantapacha qallarispa, Juan bautizachikuna kasqanta willasqanmanta qhepaman.

³⁸ Chantá yachankichej imaynatachus Diosqa Santo Espirituta, atiytawan qosqanta Nazaret llajtayoj Jesusman. Jesustaj tukuynejta purerqa allinta ruwaspa, jinallatataj Kuraj Supaypa atiyninpi tukuy ñak'arejkunata qhaliyachispa, Dios paywan kasqanrayku.

³⁹ Noqayku testigo kayku judiokunaj suyunpi, Jerusalén llajtapi ima Jesús tukuy imata ruwasqanmanta. Paykunarí Jesusta cruzman chakataspa, wañucherqanku.

⁴⁰ Chaywanpis Tata Diosqa kinsa p'unchayninman Jesusta wañusqamanta kawsarichimorqa, chaymantataj Dios munarqa runakuna payta rikunankuta.

⁴¹ Mana tukuy runamanchu Jesús rikhurerqa. Manachayqa noqallaykuman rikhuriwarqayku, pikunachus ñawpajmantapachaña Diospa ajllasqankuna karqayku testigo jina rikusqaykuta willanaykupaj, chaykunaman. Ajinaqa noqayku paywan khuska mikhorqayku wañusqamanta kawsarimpusqanmantaña.

⁴² Paytaj kamachiwarqayku kay tukuyta runakunaman willanaykuta, rejsichinaykuta ima: Diosmin kay kikin Jesusta churan kawsajkunata, wañusqakunatapis juzgananpaj, nispa.

⁴³ Tukuy ñawpa sut'inchajkunapis Jesusmanta willarqanku, Paypi tukuy atinikojkunaj juchanku sutinnejta pampachasqa kananta, nispa.

Diosqa Santo Espirituta qon mana judío kajkunaman

⁴⁴ Chayta Pedro parlashajtillanraj, Santo Espiritoqa tukuynin chay uyarejkunaman urayk'amorqa.

⁴⁵ Jinataj pikunachus Jopemanta Pedrowan jamoj judío wawqekunapis t'ukushaj qhepakorqanku, Diosqa mana judío kajkunamanpis Santo Espirituta qosqanmanta.

⁴⁶ Paykunataj mana judío kajkuna waj parlaykunata parlashajta uyarerqanku, Diosta yupaychashajta ima.

⁴⁷ Chantá Pedro nerqa: Kay runakunamanqa noqanchejman jinallataj Santo Espíritu jamun. Jina kajtenqa, mana pipis paykunata jark'ayta atinmanchu bautizachikunankupaj, nispa.

⁴⁸ Chaymantataj Pedro kamacherqa Tukuyta Kamachej Jesuspa sutinpi paykuna bautizasqa kanankuta. Chaymantataj chay wawqekuna Pedrota mañarikorqanku uj pisi p'unchayllatapis paykunawan qhepakunanta.