Hechos 1 - DIOSPA QHELQACHISQ

Jesusqa Santo Espíritu jamunanta nin

¹ Teofilóy, ñawpaj kaj qhelqasqaypi nerqaniña imaynatachus Jesús qallariymantapacha tukuy imata ruwasqanta, yachachisqanta ima,

² janaj pachaman riporqa, chay p'unchaykama. Chaywanpis Jesús manaraj janaj pachaman ripushaspa, Santo Espiritunejta kamacherqa ajllasqan kuraj kachankuna imatachus ruwanankuta.

³ Wañusqamanta kawsarimpuspataj, kikin Jesuspuni tawa chunka p'unchayta kuraj kachankunawan rikuchikorqa. Jinataj ashkha kutita paykunaman rikhurispa, tukuy imata ruwarqa, pay kawsashasqanta mana iskayrayaspa yachanankupaj. Chantá Diospa kamachiyninmantapis paykunaman yachachillarqataj.

⁴ Ajina kuraj kachankunawan tantasqa kashaspa, Jesús paykunata kamacherqa: Jerusalén llajtamanta amaraj ripuychejchu, manachayqa suyaychej Tata Diospa nisqan junt'akunanta, mayqenmantachus noqa willarqaykichej, chayta.

⁵ Yachankichej jina Bautizaj Juan yakuwan bautizarqa. Kaymanta pisi p'unchaykunamanrí, qankuna Santo Espirituwan bautizasqa kankichej, nispa.

Jesús janaj pachaman ripun

⁶ Chantá Jesuswan tantasqa kashaspa, kuraj kachankuna payta taporqanku: Tukuyta Kamachej Jesús, kunanpachachu Israel suyuta watej sayarichispa, kamachiyta qallarinki? nispa.

⁷ Jesustajrí kuticherqa: Mana qankunachu yachanaykichej tiyan mayk'ajchus, chayrí ima phanitachus Tata Dios jatun atiyninpi chay imakunata ruwanqa, chaytaqa.

⁸ Manachayqa Santo Espíritu qankunaman jamuspa, pay atiyta qosonqachej. Chantá rispa, qankuna noqamanta testigo jina willankichej Jerusalenpi, tukuy Judea jap'iypi, Samariapi, jinallataj tukuy kay pachaj k'uchunkama, nispa.

⁹ Chayta nisqantawantaj, kuraj kachankuna qhawashajtinku, Jesusqa janaj pachaman oqharisqa karqa. Phuyu ukhuman Jesús chinkaykojtinkamataj, kuraj kachankunaqa payta manaña rikorqankuchu.

¹⁰ Jinapi Jesuspa kuraj kachankuna payta janaj pachaman ripushajta qhawashajtinku, yuraj p'achayoj iskay qharikuna paykunaman rikhurerqanku.

¹¹ Chay qharikunataj nerqanku: Galileamanta kajkuna, imaraykutaj patata qhawaspallapuni kashankichejri? Kay kikin Jesús, imaynatachus qankuna ukhumanta janaj pachaman ripun, ajinallatataj aswan qhepaman ujtawan kutirimonqa, imaynatachus ripojta rikunkichej, ajinata, nispa.

Judaspa cuentanmanta Matiasta churanku

¹² Chay qhepata Jesuspa kuraj kachankuna Jerusalenman kutirerqanku Olivos nisqa orqomanta. Chay orqoqa Jerusalenmanta mana karupichu karqa, uj samarina p'unchay puriy jinalla.

¹³ Llajtaman chayaspataj, paykuna maypichus tiyakusharqanku, chay wasej alto patanman wicharerqanku. Paykuna karqanku: Pedro, Santiago, Juan, Andrés, Felipe, Tomás, Bartolomé, Mateo, Alfeoj churin Santiago, Zelote nisqa Simón, Santiagoj wawqen Judas ima.

¹⁴ Paykunataj tantakoj kanku, Jesuspa maman Mariawan, wawqenkunawan, chantá wakin warmikunawan ima. Jinataj uj sonqolla Dioswan parlarikuspallapuni karqanku.

¹⁵ Chay p'unchaykunallapitaj wawqe panakuna tantakorqanku, uj pachaj iskay chunkayoj jina. Chantá Pedro sayariytawan, paykunata nerqa:

¹⁶ Wawqe panakuna, Diospa Qhelqachisqan junt'akunanpuni karqa, imatachus Santo Espiritoqa Davidpa siminnejta Judasmanta nerqa, chay. Yachankichej jina pay runakunata pusarqa Jesusta presochanankupaj.

¹⁷ Chaypacha Judas noqanchejwan yupasqa karqa, imaraykuchus paypis ajllasqallataj karqa kay ruwanapi kananpaj.

¹⁸ Chaywanpis Jesusta wasanchasqanmanta qolqeta jap'isqanwan pay uj jallp'ata rantisqa. Chay jallp'apitaj umamanta urmasqanpi wijsan phatasqa, ch'unchulanpis thallikusqa.

¹⁹ Chantá Jerusalén llajtapi tukuy tiyakojkuna chaymanta yacharqanku. Chayrayku chay jallp'ata parlayninkupi Acéldama nispa, suticharqanku. Chay niyta munan “Yawar Jallp'a”.

²⁰ Chaymantaqa Salmos qhelqapi kay jinata nin: Wasenqa ch'inman tukuchisqa kachun, amataj pipis chaypi tiyakuchunchu, nispa. Nillantaj: Ruwanantapis waj jap'ichun, nispa.

²¹ Noqanchej ukhupi wakin qharikuna tiyan, pikunachus noqaykuwan khuska Tukuyta Kamachej Jesuswan purerqanku

²² Juan bautizayta qallarisqanmantapacha Jesús janaj pachaman ripusqankama. Kunantaj paykunamanta ujta ajllanachej Jesús kawsarimpusqanmanta testigo jina noqaykuwan khuska willarananpaj, nispa.

²³ Pedro chayta nejtin, tantasqa kajkuna iskay runakunata ajllarqanku. Ujnin karqa José Barsabás, paypa ujnin sutintaj Justo karqa. Ujnintaj karqa Matías sutiyoj.

²⁴ Chay wawqe panakunataj kay jinata Diosmanta mañakorqanku: Tukuyta Kamachej Jesús, qanqa tukuypa sonqonta rejsinki, chayrayku rikuchiwayku ari mayqentachus kay iskay runamanta ajllakusqaykita.

²⁵ Paytaj kuraj kachaykikunamanta ujnin kanqa, jinataj Judaspa ruwananta ruwanqa, imaraykuchus Judas juchanrayku ruwananta saqerparerqa, kunantaj maychus rinanman ripunña, nispa.

²⁶ Chaymanta paykuna suerteta choqajtinku, suerteqa Matiaspaj llojserqa. Paytaj chaymantapacha Jesuspa chunka ujniyoj kuraj kachakunawan yupasqa karqa.