Hebreos 8 - DIOSPA QHELQACHISQ

Jesús kuraj kaj sacerdotenchej

¹ Chay jinaqa imatachus parlasqanchejmanta aswan sumajqa kaymin: Kuraj Kaj Sacerdotenchej tiyapuwanchej, paytaj janaj pachapi Kuraj Kamachej Diospa kamachinan tiyanaj pañanpi tiyaykukorqa.

² Chay sacerdoteqa Jesucristo, pichus Diospaj T'aqasqa Cheqapi sacerdote jina ruwananta ruwan, Dioswan Tinkukuna chay cheqa kaj wasipi. Chay wasitaqa Tukuyta Kamachej Dios sayacherqa, mana runachu.

³ Tukuy kuraj kaj sacerdotekuna jaywanakunata, chantá uywa ñak'asqa q'olachinakunatawan Diosman jaywanankupaj churasqa kanku. Chayrayku Jesucristopis Kuraj Kaj Sacerdotenchej jina Diosman imata jaywanayojpuni kanan karqa.

⁴ Sichus Jesucristo kunan kay pachapi kashanman chayqa, mana sacerdotechu kanman, imaraykuchus sacerdotekuna kashallankuraj, Moisespa kamachisqanman jina Diosman jaywanata jaywanankupaj.

⁵ Chay sacerdotekuna imachus ruwanankuta ruwanku. Chay imatachus ruwanankurí janaj pachapi imakunaj llanthun jinalla kanku. Chayrayku Moisés Dioswan Tinkukuna Toldota ruwanan kashajtin, Dios nerqa: Allinta qhaway, tukuy imata Sinaí orqopi rikuchisusqayman jinatapuni ruwanaykimanta, nispa.

⁶ Kunanrí Kuraj Kaj Sacerdotenchej Jesusman Dios qorqa, ñawpa sacerdotekunaj imachus ruwanankumanta aswan sumaj ruwanata. Jinallataj paynejta aswan sumaj tratopi kanchej, imaraykuchus Dios paynejta aswan sumaj imakunata qonawanchejta niwanchej.

⁷ Ñawpaj kaj tratochus sumaj kanman karqa chayqa, mana waj tratota ruwana kanmanchu karqa.

⁸ Dios rikorqa ayllun trato ruwasqanta mana munasqanman jina junt'asqankuta. Chayrayku nerqa: Uj p'unchay chayamonqa, chay p'unchaypitaj noqa Tata Diosqa Israel aylluwan, Judá aylluwan ima uj mosoj tratota ruwasaj.

⁹ Kay tratoqa mana ñawpa tatankukunawan ruwasqay trato jinachu kanqa. Chay tratota ruwarqani maypachachus paykunata makinkumanta aysarispa, Egipto suyumanta orqhomorqani chaypacha. Paykunatajrí trato ruwasqayta mana junt'arqankuchu. Chayrayku noqapis paykunata mana rikoj tukorqani, nispa Tukuyta Kamachej Dios nin.

¹⁰ Chayrayku chay p'unchay, kay jina mosoj tratota Israel aylluwan ruwasaj, nispa Tata Dios nin: Yuyayninkuman kamachisqayta churasaj, sonqonkupitaj nisqayta qhelqasaj. Noqa Diosninku kasaj, paykunataj noqaj aylluy kanqanku.

¹¹ Manaña pipis runa masinta yachachenqañachu, nitaj wawqentapis nenqachu: Tata Diosta rejsinayki tiyan, nispa, imaraykuchus tukuy rejsiwanqanku, sullk'amantapacha kurajninkukama.

¹² Chaypacha noqa paykunamanta khuyakuspa, millay ruwasqankuta pampachasaj, juchallisqankumantapis manaña jayk'aj yuyarikusajñachu, nispa.

¹³ Maypachachus Dios mosoj tratomanta parlan chaypacha, niyta munan ñawpa trato ruwasqan unayniyojña kasqanrayku manaña valorniyojchu kasqanta. Ajina kasqanrayku chay ñawpa trato chinkapunan qayllapiña kashan.